റബർ വിപണിയിൽ പുതിയ ചരിത്രമെഴുതിക്കൊണ്ട് കിലോഗ്രാമിന് 300 രൂപ എന്ന നാഴികക്കല്ല് പിന്നിട്ടു. ആഭ്യന്തര ഓപ്പൺ മാർക്കറ്റിലാണ് ആർഎസ്എസ് 4 ഗ്രേഡ് റബറിന്റെ വില ഈ ഉയരത്തിലെത്തിയത്.
അതേസമയം, കോട്ടയം, കൊച്ചി മാർക്കറ്റുകളിൽ റബർ ബോർഡ് വില ആർഎസ്എസ് 4-ന് കിലോയ്ക്ക് 299 രൂപയാണ് രേഖപ്പെടുത്തിയിരിക്കുന്നത്. വിപണിയിലെ ലഭ്യതക്കുറവും റബറിനുള്ള വർധിച്ച ആവശ്യവുമാണ് ഈ കുതിച്ചുചാട്ടത്തിന് പ്രധാന കാരണം.
വരും ദിവസങ്ങളിലും വിപണിയിൽ വില ഉയർന്ന നിലവാരത്തിൽ തന്നെ തുടരുമെന്നാണ് വിലയിരുത്തപ്പെടുന്നത്. രാജ്യാന്തര മാർക്കറ്റിൽ നിലവിൽ ആർഎസ്എസ് 4 വില 267.78 രൂപയാണ്.
ഈ സാഹചര്യത്തിൽ പ്രതികരിച്ചുകൊണ്ട് റബർ ഉൽപാദക സംഘം ദേശീയ കൂട്ടായ്മ ജനറൽ സെക്രട്ടറി ബാബു ജോസഫ് വ്യക്തമാക്കി:
“കർഷകർ അനുകൂല സാഹചര്യം പ്രയോജനപ്പെടുത്തണം. സീസണായ നവംബർ, ഡിസംബർ, ജനുവരി മാസങ്ങളിൽ റബർ ഉൽപാദനം പരമാവധി വർധിപ്പിക്കുകയാണ് വേണ്ടത്”
വിലക്കയറ്റത്തിലേക്ക് നയിച്ച പ്രധാന കാരണങ്ങൾ:
* വിപണിയിലെ ലഭ്യതക്കുറവ്: രാജ്യത്ത് ആവശ്യത്തിന് റബർ ലഭ്യമല്ലാത്ത സാഹചര്യമാണ് നിലവിലുള്ളത്.
റബർ ബോർഡിന്റെ കണക്കുകൾ പ്രകാരം രാജ്യത്ത് ഏകദേശം 5.22 ലക്ഷം ടൺ റബറിന്റെ കുറവുണ്ട്.
* ഉത്തരേന്ത്യൻ ഷീറ്റ് വരവ് കുറഞ്ഞു: പ്രതികൂല കാലാവസ്ഥ കാരണം ഉത്തരേന്ത്യൻ സംസ്ഥാനങ്ങളിൽ നിന്നുള്ള ഷീറ്റ് റബറിന്റെ വരവ് വൻതോതിൽ ഇടിഞ്ഞത് കേരളത്തിലെ മാർക്കറ്റുകളിൽ വില വർധനയ്ക്ക് കാരണമായി.
* കർഷകർ ലാറ്റക്സിലേക്കു മാറിയത്: പല കർഷകരും ഷീറ്റാക്കാതെ ലാറ്റക്സ് നൽകുന്നതും ആർഎസ്എസ് 4 ഷീറ്റിന്റെ ലഭ്യത കുറച്ചു.
* രാജ്യാന്തര മാർക്കറ്റ് പ്രതിസന്ധി: പശ്ചിമേഷ്യൻ സംഘർഷങ്ങൾ കപ്പൽ വഴിയുള്ള ചരക്കുനീക്കത്തെ തടസ്സപ്പെടുത്തി. ഇത് ഇറക്കുമതിച്ചെലവ് വർധിപ്പിച്ചു.
* ക്രൂഡ് ഓയിൽ വിലവർധന: ക്രൂഡ് ഓയിൽ വില ഉയർന്നത് കൃത്രിമ റബറിന്റെ ഉൽപാദനച്ചെലവ് ഉയർത്തി.
ഇതോടെ വ്യവസായ സ്ഥാപനങ്ങൾ സ്വാഭാവിക റബറിനെ കൂടുതൽ ആശ്രയിക്കാൻ തുടങ്ങിയത് ഡിമാൻഡ് ഇരട്ടിയാക്കി.
* ചരക്ക് നീക്കം കുറഞ്ഞു: വില വീണ്ടും ഉയരുമെന്ന പ്രതീക്ഷയിൽ കർഷകർ സ്റ്റോക്കുകൾ പെട്ടെന്ന് മാർക്കറ്റിൽ എത്തിക്കാത്തതും നിലവിലെ വിലക്കയറ്റത്തിന് ആക്കം കൂട്ടി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
