കൽപറ്റ ∙ കൈനാട്ടി ജംക്ഷനിലെ ഓട്ടമാറ്റിക് ട്രാഫിക് സിഗ്നൽ ഇടയ്ക്കിടെ പണിമുടക്കുന്നത് യാത്രക്കാർക്കു ദുരിതമാകുന്നു. 3 മാസമായി ഇവിടുത്തെ ട്രാഫിക് സിഗ്നലുകൾ ഇടയ്ക്കിടയ്ക്ക് പണിമുടക്കുകയാണെന്ന് സമീപത്തെ വ്യാപാരികൾ പറയുന്നു. ചില ദിവസങ്ങളിൽ പൂർണമായും പ്രവർത്തിക്കാതെയാകും.
ഇതുകാരണം ജംക്ഷനിൽ ഗതാഗതക്കുരുക്ക് പതിവായി. കഴിഞ്ഞ ഒരാഴ്ചയായിട്ട് ഇവിടെ വാഹനത്തിരക്ക് രൂക്ഷമാണ്.
പൊലീസ് കിണഞ്ഞു പരിശ്രമിക്കുന്നുണ്ടെങ്കിലും ജംക്ഷനിലെ ഗതാഗതക്കുരുക്കിനു കുറവില്ല.
ഇന്നലെ രാവിലെയോടെ ഇവിടെ രൂപപ്പെട്ട ഗതാഗതക്കുരുക്ക് ദേശീയപാത 766ൽ പാറയ്ക്കൽ വരെയും മറുഭാഗത്ത് ബൈപാസ് ജംക്ഷൻ വരെയും നീണ്ടു.
ബൈപാസ് വഴി മാനന്തവാടി, ബത്തേരി ഭാഗങ്ങളിലേക്ക് വന്ന വാഹനങ്ങൾ ദേശീയപാതയിലേക്ക് കടക്കാനാകാതെ 20 മിനിറ്റോളം കുടുങ്ങി. കൂടുതൽ പൊലീസ് സംഘം സ്ഥലത്തെത്തിയാണു കുരുക്ക് ഒഴിവാക്കിയത്.
കൽപറ്റ ജനറൽ ആശുപത്രിയിലേക്കും കൽപറ്റ, ബത്തേരി, മാനന്തവാടി ഭാഗങ്ങളിലേക്കുമായി നൂറുകണക്കിന് വാഹനങ്ങൾ കടന്നുപോകുന്ന ഇടമാണ് കൈനാട്ടി ജംക്ഷൻ.
ഏറെനാളത്തെ മുറവിളികൾക്കൊടുവിൽ, പൊതുമരാമത്ത് വകുപ്പിന്റെ റോഡ് സേഫ്റ്റി ഫണ്ടിൽ നിന്നുള്ള 14 ലക്ഷം രൂപ ഉപയോഗിച്ച് 2022 ജൂലൈയിലാണു ജംക്ഷനിൽ ട്രാഫിക് സിഗ്നൽ സംവിധാനം സ്ഥാപിച്ചത്. സിഗ്നൽ പണിമുടക്കാൻ തുടങ്ങിയതോടെ, കൽപറ്റ–ബത്തേരി റൂട്ടിലോടുന്ന സ്വകാര്യ ബസുകളും കെഎസ്ആർടിസി ബസുകളും ജംക്ഷനിൽ ഒത്ത നടുക്കായി വീണ്ടും നിർത്താൻ തുടങ്ങി.
മാനന്തവാടി ഭാഗത്തു നിന്നുള്ള ബസുകളും ഇതേ പാതയാണ് പിന്തുടരുന്നത്.
ബസുകൾ നിർത്തുമ്പോൾ മറ്റു വാഹനങ്ങൾക്കു കടന്നുപോകാൻ സാധിക്കാതെ വരികയാണ്. ഇറക്കമായതിനാൽ കൽപറ്റ ഭാഗത്തു നിന്നുള്ള വാഹനങ്ങൾ അമിതവേഗത്തിലാണ് ജംക്ഷനിലേക്ക് എത്തുന്നത്. രാവിലെ 9 മുതൽ 11 വരെയും വൈകിട്ടു 3.30 മുതൽ 5.30 വരെയും ഇവിടെ ഗതാഗതം മുടങ്ങുന്നത് പതിവായിരുന്നു.
തലങ്ങും വിലങ്ങും പായുന്ന വാഹനങ്ങൾ ഇവിടത്തെ സ്ഥിരം കാഴ്ചയായിരുന്നു.
സിഗ്നൽ സംവിധാനം പണിമുടക്കിയതോടെ എല്ലാം പഴയപടിയായി. അമിതവേഗത്തിൽ പായുന്ന വാഹനങ്ങൾക്കിടയിലൂടെ വിദ്യാർഥികൾ അടക്കമുള്ള കാൽനടയാത്രക്കാർ ജീവൻ പണയം വച്ചാണു കടന്നുപോകുന്നത്. ജംക്ഷന് സമീപത്തെ ജനറൽ ആശുപത്രിയിലേക്കുള്ള രോഗികളും ബുദ്ധിമുട്ട് സഹിക്കേണ്ടി വരുന്നു.
സിഗ്നൽ സംവിധാനത്തിലെ പാകപ്പിഴ ഉടൻ പരിഹരിച്ചില്ലെങ്കിൽ ഗതാഗതക്കുരുക്ക് ഇനിയും രൂക്ഷമാകും. … FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
