വേടന്റെ പരിപാടിയിൽ ഉന്തുംതള്ളും; തിരക്കിൽപെട്ട് 15 പേർക്കു പരുക്ക്

വേടന്റെ പരിപാടിയിൽ ഉന്തുംതള്ളും; തിരക്കിൽപെട്ട് 15 പേർക്കു പരുക്ക് പാലക്കാട് ∙ കോട്ടമൈതാനത്ത് റാപ്പർ വേടന്റെ (ഹിരൺദാസ് മുരളി) പരിപാടിക്കിടെ തിരക്കിൽപെട്ട് 15 പേർക്കു പരുക്കേറ്റു. പട്ടികജാതി – പട്ടികവർഗ വകുപ്പും സാംസ്കാരിക വകുപ്പും ചേർന്നു സംഘടിപ്പിച്ച സംഗീത പരിപാടിയിലാണ് അനിയന്ത്രിതമായ തിരക്ക് അനുഭവപ്പെട്ടത്.

കാണികൾ തമ്മിൽ ഉന്തും തള്ളുമുണ്ടായതോടെ പൊലീസ് ലാത്തിവീശി. പരിപാടിക്കിടെ നാലു തവണയാണ് പൊലീസ് ലാത്തിവീശിയത്.

6നു തുടങ്ങേണ്ട പരിപാടി ആരംഭിച്ചത് എട്ടോടെയാണ്.

വേടൻ 8നു വേദിയിലെത്തി ആദ്യ പാട്ട് പാടിത്തുടങ്ങിയപ്പോൾ തന്നെ കാണികൾ തമ്മിൽ ഉന്തും തള്ളുമുണ്ടായി. തിരക്കിൽ ഞെരുങ്ങി ഒട്ടേറെ പേർക്കു നിസ്സാര പരുക്കേറ്റു.

സംസ്ഥാന സർക്കാരിന്റെ നാലാം വാർഷിക ആഘോഷത്തിന്റെ ഭാഗമായി പാലക്കാട് കോട്ട മൈതാനിയിൽ നടന്ന പട്ടികജാതി- വർഗ സംസ്ഥാനതല സംഗമത്തിന്റെ ഭാഗമായി സംഘടിപ്പിച്ച റാപ്പർ ഗാനരചയിതാവായ വേടന്റെ സംഗീത പരിപാടി കാണാൻ എത്തിയവർ.
ചിലർക്ക് ദേഹാസ്വാസ്ഥ്യവുമുണ്ടായി.

ആദ്യ പാട്ട് കഴിഞ്ഞതും പൊലീസ് കുറച്ചുനേരത്തേക്ക് പരിപാടി നിർത്തിവയ്ക്കാൻ ആവശ്യപ്പെട്ടു. എഎസ്പി രാജേഷ് കുമാറിന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തി ഗർഭിണികളെയും പ്രായമായവരെയും കുട്ടികളെയും സ്ഥലത്തുനിന്നു മാറ്റിയ ശേഷമാണു വീണ്ടും പരിപാടി ആരംഭിച്ചത്.

തിരക്ക് നിയന്ത്രിക്കാൻ  പൊലീസിനും കഴിഞ്ഞിരുന്നില്ല. തിരക്കും ക്രമസമാധാന പ്രശ്നങ്ങളും നിയന്ത്രിക്കാൻ കഴിയാതെ വന്നതോടെ മൂന്നു പാട്ട് മാത്രം പാടിയ ശേഷം 9 മണിയോടെ വേടൻ വേദിവിട്ടു.

പരുക്കേറ്റവർ ജില്ലാ ആശുപത്രിയിൽ ചികിത്സ തേടി.

…