സംസ്ഥാന സർക്കാരിന് കീഴിലുള്ള എൽ ബി എസ് സെന്റർ ഫോർ സയൻസ് ആൻഡ് ടെക്നോളജിയുടെ അംഗീകൃത സ്കിൽ സെന്ററുകൾക്കായി സംഘടിപ്പിച്ച സംസ്ഥാനതല മത്സരത്തിൽ കോഴിക്കോട് മർകസ് ഐ ടി ഐ ഒന്നാം സ്ഥാനം സ്വന്തമാക്കി. പ്രവർത്തന മികവ് മുൻനിർത്തിയാണ് ഈ നേട്ടം.
കാരന്തൂർ കേന്ദ്രീകരിച്ചാണ് സ്ഥാപനം പ്രവർത്തിക്കുന്നത്. സംസ്ഥാനത്തൊട്ടാകെയുള്ള 120 ഓളം എൽ ബി എസ് സ്കിൽ സെന്ററുകളിൽ നിന്നാണ് മർകസ് ഐ ടി ഐ ഈ അഭിമാനാർഹമായ നേട്ടം കൈവരിച്ചത്.
കോഴ്സുകളുടെ ഗുണനിലവാരം, വിദ്യാർഥികളുടെ പങ്കാളിത്തം എന്നിവ അടിസ്ഥാനമാക്കിയാണ് അവാർഡ് നിർണയിച്ചത്. മത്സരത്തിൽ തിരുവനന്തപുരം ജില്ലയിൽ നിന്നുള്ള ജോൺ കോക്സ് മെമ്മോറിയൽ ഇൻസ്റ്റിറ്റ്യൂട്ട്, റോയൽ ഇൻസ്റ്റിറ്റ്യൂട്ട് എന്നിവ യഥാക്രമം രണ്ടും മൂന്നും സ്ഥാനങ്ങൾക്ക് അർഹരായി.
എൽ ബി എസിന് കീഴിൽ ഡാറ്റാ എൻട്രി ആൻഡ് ഓഫീസ് ഓട്ടോമേഷൻ, പ്രീ-പ്രൈമറി ടീച്ചേഴ്സ് ട്രെയിനിങ്, പ്രൈമറി ടീച്ചേഴ്സ് ട്രെയിനിങ്, സർട്ടിഫൈഡ് കമ്പ്യൂട്ടർ ഓപ്പറേറ്റർ, അഡ്വാൻസ്ഡ് എക്സൽ, ഗ്രാഫിക് ഡിസൈനിങ്, ഫിനാൻഷ്യൽ അക്കൗണ്ടിങ് തുടങ്ങിയ വിവിധിന തൊഴിലധിഷ്ഠിത കോഴ്സുകളാണ് നിലവിൽ മർകസ് ഐടിഐയിൽ വിജയകരമായി നടത്തിവരുന്നത്. നൂറു ശതമാനം തൊഴിലവസരങ്ങൾ ഉറപ്പുനൽകുന്ന, അത്യാധുനിക സൗകര്യങ്ങളോട് കൂടിയ വിശാലമായ ലാബുകളും സംവിധാനങ്ങളും ഉള്ള സ്ഥാപനമാണ് മർകസ് ഐ ടി ഐ.
സാങ്കേതിക-നൈപുണി വികസന രംഗത്ത് അന്താരാഷ്ട്ര നിലവാരമുള്ള പരിശീലനം ഉറപ്പാക്കാൻ സ്ഥാപനം കാണിക്കുന്ന പ്രതിബദ്ധതയ്ക്കുള്ള അംഗീകാരമാണ് ഈ സംസ്ഥാനതല പുരസ്കാരമെന്ന് മാനേജ്മെന്റ് പ്രതിനിധികൾ അഭിപ്രായപ്പെട്ടു. വിദ്യാർഥികൾക്ക് തൊഴിലധിഷ്ഠിത നൈപുണ്യം നൽകുന്നതിൽ ഇനിയും മികച്ച പദ്ധതികൾ ആവിഷ്കരിക്കുമെന്ന് അവാർഡ് ഏറ്റുവാങ്ങിക്കൊണ്ട് സെന്റർ അധികൃതർ വ്യക്തമാക്കി.
തിരുവനന്തപുരത്ത് സംഘടിപ്പിച്ച ചടങ്ങിൽ എൽ ബി എസ് ഡയറക്ടർ ഡോ. ജയമോഹൻ വിജയികൾക്കുള്ള ട്രോഫിയും സർട്ടിഫിക്കറ്റുകളും കൈമാറി.
മർകസ് ഐ ടി ഐ കോർഡിനേറ്റർ ഇറാഷ് വി കെ പുരസ്കാരം ഏറ്റുവാങ്ങി. ചടങ്ങിൽ എൽ ബി എസ് അസിസ്റ്റന്റ് ഡയറക്ടർമാരായ ഡോ.
നന്ദൻ, മുജീബ് റഹ്മാൻ, എക്സ്ട്രീം മൾട്ടിമീഡിയ ഡയറക്ടർ ബിനുരാജ്, വർഗീസ് തുടങ്ങിയവർ സംബന്ധിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
