ഓവുചാലിൽ കല്ലും മണ്ണും; വെള്ളമൊഴുകുന്നത് റോഡിൽ

ചെറുപുഴ ∙ കല്ലും മണ്ണും നിറഞ്ഞ് ഓവുചാൽ നികന്നതോടെ മഴവെള്ളം റോഡിലൂടെ ഒഴുകുന്നു. മലയോരപാതയുടെയും മഞ്ഞക്കാട്-മുതുവം മരാമത്ത് റോഡിന്റെയും ഓവുചാലുകളിൽ കല്ലും മണ്ണും നിറഞ്ഞതോടെയാണു മഴവെള്ളം റോഡിലൂടെ ഒഴുകാൻ തുടങ്ങിയത്.

റോഡുകളുടെ അരികിലെ മണ്ണെടുപ്പാണു ഓവുചാൽ ഉപയോഗശൂന്യമാകാൻ കാരണമാകുന്നത്. മലയോരപാതയുടെ വാണിയംകുന്ന്, പാക്കഞ്ഞിക്കാട് ഭാഗങ്ങളിലും മഞ്ഞക്കാട്-മുതുവം റോഡിലെ മുളപ്ര ഭാഗത്തുമാണു മഴവെള്ളം കുത്തിയൊഴുകി റോഡിൽ കെട്ടിക്കിടക്കുന്നത്.
ഇതുമൂലം വാഹനങ്ങൾ കടന്നുപോകുമ്പോൾ കാൽനടയാത്രക്കാർ അനുഭവിക്കുന്ന ദുരിതങ്ങൾ ചില്ലറയല്ല. ഇതിനുപുറമെ റോഡിൽ കെട്ടിക്കിടക്കുന്ന വെള്ളക്കെട്ട് വാഹനാപകടങ്ങൾക്കും കാരണമാകുന്നു.

ഓവുചാലിൽ അടിയുന്ന മണ്ണും കല്ലും നീക്കം ചെയ്യാൻ സ്ഥലമുടമകൾ തയാറാകുന്നില്ലെന്ന ആക്ഷേപവും ശക്തമാണ്. അടിയന്തര നടപടി സ്വീകരിക്കണമെന്നാണു നാട്ടുകാരുടെ ആവശ്യം.

…