വീടുവിട്ട 16 വയസ്സുകാരിയെ എറണാകുളത്ത് കണ്ടെത്തി

തളിപ്പറമ്പ്∙ വീട്ടുകാരോട് പിണങ്ങി വീടുവിട്ടിറങ്ങിയ 16 വയസ്സുകാരിയായ ഹയർ സെക്കൻഡറി വിദ്യാർഥിനിയെ എറണാകുളത്ത് നിന്ന് കണ്ടെത്തി. കഴിഞ്ഞ ദിവസം അമ്മ ശകാരിച്ചതിൽ പിണങ്ങിയാണത്രേ പെൺകുട്ടി വീടുവിട്ടിറങ്ങിയത്. ജൂൺ ആദ്യം തിരിച്ചുവരാം എന്ന് കത്തെഴുതി വച്ചാണ് പെൺകുട്ടി പോയത്. എറണാകുളത്ത് എത്തിയ പെൺകുട്ടി അവിടെയുള്ള ഒരു വീട്ടിൽ എത്തി പേയിങ് ഗസ്റ്റായി താമസിപ്പിക്കാമോ എന്ന് ചോദിക്കുകയായിരുന്നു. വീട്ടുകാ‍ർക്ക് സംശയം തോന്നി സമീപത്ത് താമസിക്കുന്ന, സ്ഥലത്തെ സ്കൂൾ പിടിഎ പ്രസിഡന്റായ വ്യക്തിയെ വിവരമറിയിച്ചു. 

ഇയാൾ എത്തി പെൺകുട്ടിയോട് വിവരങ്ങൾ ചോദിച്ചറിഞ്ഞശേഷം തളിപ്പറമ്പിലെ പെൺകുട്ടിയുടെ വീടിനടുത്തുള്ള ഒരു സ്ഥാപനത്തിന്റെ ഫോൺ നമ്പർ കണ്ടെത്തി വിവരമറിയിച്ചു. അപ്പോഴേക്കും വീട്ടുകാർ തളിപ്പറമ്പ് പൊലീസിൽ നൽകിയ പരാതിയെ തുടർന്ന് പൊലീസ് വിവിധ ബസ് സ്റ്റാൻഡുകളും റെയിൽവേ സ്റ്റേഷനുകളും കേന്ദ്രീകരിച്ച് രാത്രി മുഴുവൻ തിരച്ചിൽ നടത്തി വരികയായിരുന്നു.  വിവരം ലഭിച്ച സ്ഥാപനത്തിൽ നിന്ന് പൊലീസിൽ അറിയിച്ചതിനെ തുടർന്ന് പെൺകുട്ടിയെ കൂട്ടിക്കൊണ്ടു വരാനായി തളിപ്പറമ്പ് പൊലീസ് എറണാകുളത്തേക്ക് തിരിച്ചു.