ഓടിക്കൊണ്ടിരുന്ന കാറിനു തീപിടിച്ചു; അപകടം പാലാരിവട്ടം മെട്രോ സ്റ്റേഷനു സമീപം

കൊച്ചി∙ പാലാരിവട്ടം മെട്രോ സ്റ്റേഷനു സമീപം (മെട്രോ പില്ലർ നമ്പർ 506) ഓടിക്കൊണ്ടിരുന്ന കാറിനു തീപിടിച്ചു. ആർക്കും അപകടമില്ല.

ഇന്നലെ രാത്രി 7 നാണു സംഭവം. തിരക്കേറിയ റോഡിൽ ഏറെനേരം വൻ ഗതാഗതക്കുരുക്കും ഉണ്ടായി. ഉണിച്ചിറ സ്വദേശി സനോജ് കുമാറിന്റെ എസ്‌‌‌യുവി കാറാണ് ഏറെക്കുറെ പൂർണമായി കത്തിനശിച്ചത്.

സമീപത്തു കൂടി സഞ്ചരിക്കുകയായിരുന്ന ബൈക്ക് യാത്രക്കാർ കാറിനു തീ പടരുന്നതായി അറിയിച്ചതിനെ തുടർന്നു ഡ്രൈവർ ഉടൻ വാഹനം നിർത്തി പുറത്തിറങ്ങിയതിനാൽ അപകടം ഒഴിവായി.
കാറിന്റെ മുൻഭാഗത്തു നിന്നാണ് ആദ്യം തീ ഉയർന്നത്. കാറിൽ ഡ്രൈവർ മാത്രമാണുണ്ടായിരുന്നത്. ഗാന്ധിനഗർ, തൃക്കാക്കര ഫയർ സ്റ്റേഷനുകളിൽ നിന്ന് ഉദ്യോഗസ്ഥരെത്തി 10 മിനിറ്റിനകം ഫോം, വെള്ളം എന്നിവ ഉപയോഗിച്ചു പൂർണമായി തീയണച്ചതായി ഫയർ ഫോഴ്സ് അറിയിച്ചു. വാഹനം ക്രെയിൻ ഉപയോഗിച്ചു മാറ്റിയതോടെയാണു റോഡ് ഗതാഗതം പുനഃസ്ഥാപിച്ചത്.

…