തോരാമഴ: ജലനിരപ്പുയരുന്നു; പല റൂട്ടിലും കെഎസ്ആർടിസി സർവീസുകൾ നിർത്തി

കുട്ടനാട് ∙ ജലനിരപ്പ് വീണ്ടും ഉയർന്നു; ആശങ്ക ഒഴിയാതെ കുട്ടനാട്. മണിമലയാറു കടന്നുപോകുന്ന പ്രദേശങ്ങളിൽ ജലനിരപ്പ് കൂടിയപ്പോൾ പമ്പ, പൂക്കൈതയാർ കടന്നുപോകുന്ന പ്രദേശങ്ങളിൽ നേരിയതോതിൽ ജലനിരപ്പ് താഴ്ന്നു.കിടങ്ങറ ഒഴിച്ചു മറ്റു മേഖലകളിൽ എല്ലാം ജലനിരപ്പ് അപകട

നിലയ്ക്കു മുകളിൽ തുടരുകയാണ്.വെള്ളക്കെട്ട് മൂലം കുട്ടനാട്ടിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു.റോഡിൽ വെള്ളക്കെട്ടായതുമൂലം കെഎസ്ആർടിസി ചങ്ങനാശേരി ഡിപ്പോയിൽ നിന്ന് എസി റോഡിൽ നിന്ന് എടത്വയിലേക്കു പോകുന്ന നീരേറ്റുപുറം, കളങ്ങര, തായങ്കരി റൂട്ടുവഴിയുണ്ടായിരുന്ന കെഎസ്ആർടിസി സർവീസുകളും കിടങ്ങറയിൽ നിന്നു കായൽപുറം, ചതുർഥ്യാകരി സർവീസുകളും നിർത്തിവച്ചു.രാമങ്കരി, തലവടി പഞ്ചായത്തുകളിലാണു നിലവിൽ ദുരിതാശ്വാസ ക്യാംപുകൾ പ്രവർത്തിക്കുന്നത്.
രാമങ്കരിയിൽ ഒന്നും തലവടിയിൽ നാലും ക്യാംപുകളാണുള്ളത്. 5 ക്യാംപിലുമായി 52 കുടുംബത്തിലെ 193 പേരാണു താമസിക്കുന്നത്.

ജലനിരപ്പ് ഇതേ നിലയിൽ തുടർന്നാൽ മുട്ടാർ പഞ്ചായത്തിൽ ഇന്ന് ക്യാംപ് ആരംഭിക്കും.രാമങ്കരി എൻഎസ്എസ് ഹയർ സെക്കൻഡറി സ്കൂളിലെ ക്യാംപിൽ 7 കുടുംബങ്ങളിലെ 26 പേരും തലവടി ആനപ്രമ്പാൽ എഡി യുപി സ്കൂളിൽ 2 കുടുംബത്തിലെ 11 പേരും മണലേൽ എംഡി എൽപി സ്കൂളിൽ 25 കുടുംബത്തിലെ 101 പേരും തലവടി ഹൈസ്കൂളിലെ ഒന്നാം ക്യാംപിൽ 7 കുടുംബത്തിലെ 28 പേരും രണ്ടാം ക്യാംപിൽ 8 കുടുംബത്തിലെ 27 പേരുമാണു താമസിക്കുന്നത്. നീരേറ്റുപുറം മേഖലയിൽ 5 സെന്റീമീറ്ററും കിടങ്ങറ, മങ്കൊമ്പ് മേഖലയിൽ 3 സെന്റീമീറ്ററും ജലനിരപ്പ് ഉയർന്നു.

അതേസമയം ചമ്പക്കുളം, പള്ളാത്തുരുത്തി മേഖലയിൽ 3 സെന്റീമീറ്ററും കാവാലം, നെടുമുടി മേഖലയിൽ ഒരു സെന്റീമീറ്ററും ജലനിരപ്പ് താഴ്ന്നു.  …