പാമ്പാടി ബിഎംഎം സ്കൂളിലെ പഠനകാലം മുതലുള്ള ആത്മമിത്രങ്ങളായ കൃപയുടെയും ആഷ്‌ലിയുടെയും അപ്രതീക്ഷിത വിയോഗത്തിന്റെ ഞെട്ടലിലാണ് നാട്. സ്കൂൾ കാലം തൊട്ടേ പഠനത്തിൽ മികവ് പുലർത്തിയിരുന്ന ഇരുവരും തമ്മിലുള്ള സൗഹൃദം ഏറെക്കാലമായി തുടർന്നുവന്നതാണ്.
അവധിക്ക് നാട്ടിലെത്തുമ്പോഴെല്ലാം ആഷ്‌ലിയെ കാണാൻ കൃപയെത്തുന്നത് പതിവായിരുന്നു. എന്നാൽ, മറ്റൊരു സുഹൃത്തിനെ കാണാൻ വേണ്ടി നടത്തിയ യാത്രയാണ് ഇരുവർക്കും ജീവഹാനിയായത്.
കാറുമായാണ് കൃപ ആഷ്‌ലിയുടെ വീട്ടിലെത്തിയതെങ്കിലും പിന്നീട് ഇരുവരും യാത്ര തുടർന്നത് സ്കൂട്ടറിലായിരുന്നു. വീതികുറഞ്ഞ റോഡിലൂടെ സഞ്ചരിക്കവെ മുന്നിൽ പോയ കാർ പെട്ടെന്ന് വേഗത കുറച്ചതിനെത്തുടർന്ന് സ്കൂട്ടറിന്റെ നിയന്ത്രണം നഷ്ടപ്പെടുകയായിരുന്നുവെന്ന് പിന്നിലെ വാഹനത്തിലെ ഡാഷ് ക്യാം ദൃശ്യങ്ങളിൽ വ്യക്തമാകുന്നുണ്ട്.
നിയന്ത്രണം വിട്ട് മറിഞ്ഞ സ്കൂട്ടർ ഒരു ബസിനടിയിലേക്ക് വീണത് അപകടത്തിന്റെ ആഘാതം വർധിപ്പിച്ചു. ഇരുവരും ഹെൽമറ്റ് ധരിച്ചിരുന്നെങ്കിലും ബസ് ശരീരത്തിലൂടെ കയറിയിറങ്ങിയതാണ് മരണത്തിന് കാരണമായത്.
സംഭവസ്ഥലത്ത് ഫൊറൻസിക്, വിരലടയാള വിദഗ്ധരെത്തി പരിശോധനകൾ നടത്തി. ജില്ലാ പൊലീസ് മേധാവി കെ.എം.സാബു മാത്യുവിന്റെ നേതൃത്വത്തിലുള്ള സംഘം കേസിൽ അന്വേഷണം ആരംഭിച്ചിട്ടുണ്ട്.
റോഡിൽ യാത്രാതടസ്സം സൃഷ്ടിച്ച സാഹചര്യങ്ങളെക്കുറിച്ചും പൊലീസ് അന്വേഷണം വ്യാപിപ്പിച്ചിട്ടുണ്ട്. വിദേശത്തായിരുന്നെങ്കിലും ഇടവകപ്പള്ളിയിലെ പെരുന്നാളിനായാണ് കൃപ നാട്ടിലെത്തിയത്.
കൃപയുടെ പിതാവ് വികാരിയായ കടവുംഭാഗം സെന്റ് ഇഗ്നാത്തിയോസ് പള്ളിയിലെ പെരുന്നാൾ 24, 25 തീയതികളിലാണ് നിശ്ചയിച്ചിരുന്നത്. ഓസ്ട്രേലിയയിൽ ജോലി ചെയ്യുന്ന സഹോദരൻ കിരണിനൊപ്പം 19നു പുലർച്ചെയാണ് കൃപ നാട്ടിലെത്തിയത്.
ഇതിനായി പുതിയ വസ്ത്രങ്ങളും വാങ്ങി കരുതിയിരുന്നു. നവംബർ 16ന് ഓസ്ട്രേലിയയിലേക്ക് മടങ്ങാനുളള ടിക്കറ്റും ബുക്ക് ചെയ്തിരുന്നു.
വരാനിരിക്കുന്ന നവംബർ 23ന് തന്റെ 25-ാം ജന്മദിനം ആഘോഷിക്കാനിരിക്കെയാണ് ഈ ദാരുണ സംഭവം. കൃപയുടെ മൃതദേഹം ഇന്നു രാവിലെ ഏഴിന് കടവുംഭാഗത്തെ വസതിയിലെത്തിക്കും.
തുടർന്ന് കടവുംഭാഗം സെന്റ് ഇഗ്നാത്തിയോസ് പള്ളിയിൽ ഉച്ചയ്ക്ക് രണ്ടിന് ശ്രേഷ്ഠ ബസേലിയോസ് ജോസഫ് കാതോലിക്കാ ബാവയുടെ മുഖ്യകാർമികത്വത്തിൽ സംസ്കാരം നടക്കും. ഓസ്ട്രേലിയ ബ്രിസ്ബെയ്നിലെ ജയിംസ് കുക്ക് സർവകലാശാലയിൽ മാസ്റ്റർ ഇൻ സോഷ്യൽ വർക്ക് അവസാന വർഷ വിദ്യാർഥിനിയായിരുന്നു കൃപ.
മറുഭാഗത്ത്, ഐസിസിഎ കോഴ്സ് പൂർത്തിയാക്കിയ ആഷ്‌ലിയെ അഭിനന്ദിക്കാനായി കേക്കുമായി എത്തിയ സഹപാഠികൾക്ക് ലഭിച്ചത് പ്രിയപ്പെട്ടവളുടെ മരണവാർത്തയായിരുന്നു. വിജയം ആഘോഷിക്കാൻ എത്തിയ കൂട്ടുകാരുടെ കണ്ണീരിൽ ഈ സന്തോഷം മുങ്ങി.
പ്രായമായ മുത്തശ്ശനെയും മുത്തശ്ശിയെയും അപകടവിവരം അറിയിച്ചിരുന്നില്ല. ഇതിനിടയിലാണ് കൂട്ടുകാരികൾ അവിടെയെത്തിയത്.
തുടർന്ന് ബന്ധുക്കൾ വിവരം ധരിപ്പിച്ച് അവരെ മടക്കി അയയ്ക്കുകയായിരുന്നു. വെള്ളൂർ അണ്ണാടിവയിലിൽ ഓട്ടോ സ്കാൻ വർക്‌ഷോപ് നടത്തിവരികയാണ് ആഷ്‌ലിയുടെ പിതാവ് വി.വി.തോമസ്.
ആഷ്‌ലിയുടെ മൃതദേഹം ഇന്നു വൈകിട്ട് 5ന് വീട്ടിലെത്തിക്കും. സംസ്കാരം നാളെ രാവിലെ 10ന് മീനടം സെന്റ് ജോർജ് ഓർത്തഡോക്സ് പള്ളിയിൽ നടക്കും.
സുബിൻ വർഗീസ്, ആൽബിൻ വി.തോമസ് എന്നിവരാണ് ആഷ്‌ലിയുടെ സഹോദരങ്ങൾ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
