ആമ്പല്ലൂർ അടിപ്പാത നിർമ്മാണം: നെന്മണിക്കരയിൽ രൂക്ഷമായ വെള്ളക്കെട്ട് ഭീഷണിയെന്ന് ആശങ്ക

ദേശീയപാത വികസനത്തിന്റെ ഭാഗമായി ആമ്പല്ലൂരിൽ നിർമിച്ചുവരുന്ന അടിപ്പാതയുടെ രൂപകല്പനയെ ചൊല്ലി നെന്മണിക്കര നിവാസികൾക്കിടയിൽ കടുത്ത ആശങ്ക നിലനിൽക്കുന്നു. നിർമ്മാണ പ്രവർത്തനങ്ങളിൽ ശാസ്ത്രീയമായ ഡ്രെയ്‌നേജ് സംവിധാനങ്ങൾ ഉൾപ്പെടുത്താത്തത് പ്രദേശത്ത് ഭാവിയിൽ രൂക്ഷമായ വെള്ളക്കെട്ടിന് വഴിവെക്കുമെന്നാണ് നാട്ടുകാരുടെ പ്രധാന ആശങ്ക.

കേളിത്തോട് മുതൽ മണലിപ്പുഴ വരെ വെള്ളം സുഗമമായി ഒഴുകിപ്പോകാനുള്ള സൗകര്യങ്ങൾ നിലവിലില്ലാത്തത് ഗൗരവകരമായ സാഹചര്യമാണ് സൃഷ്ടിക്കുന്നത്. പ്രശ്നത്തിന്റെ ഗൗരവം കണക്കിലെടുത്ത് നെന്മണിക്കര പഞ്ചായത്ത് സമർപ്പിച്ച പരാതിയെത്തുടർന്ന് ദേശീയപാത അതോറിറ്റി ഉദ്യോഗസ്ഥർ സ്ഥലത്തെത്തി നേരിട്ട് പരിശോധന നടത്തി.

മഴക്കാലം ആരംഭിക്കുന്നതിന് മുൻപായി വിഷയത്തിൽ ശാശ്വത പരിഹാരം കാണണമെന്ന കർശന നിലപാടിലാണ് പഞ്ചായത്ത് ഭരണസമിതി. അടിപ്പാതയോട് ചേർന്നുള്ള പ്രദേശങ്ങളിൽ നിന്നും പടിഞ്ഞാറോട്ട് ഒഴുകുന്ന ജലം പൂർണ്ണമായും നെന്മണിക്കര ഭാഗത്തേക്കാണ് എത്തുന്നത്.

ഇതിനെ സുഗമമായി ഒഴുക്കിവിടാൻ കൃത്യമായ സംവിധാനങ്ങൾ ഇല്ലാത്തത് ഭാവിയിൽ ജനജീവിതം ദുസ്സഹമാക്കും. നിലവിലെ സാഹചര്യത്തിൽ, നെന്മണിക്കരയിലേക്കുള്ള പ്രധാനപ്പെട്ട

മൂന്ന് റോഡുകൾ വെള്ളത്തിനടിയിലാവാനും ചെളി നിറഞ്ഞ് ഗതാഗതം പൂർണ്ണമായും തടസ്സപ്പെടാനും സാധ്യതയുണ്ടെന്ന് അധികൃതർ ചൂണ്ടിക്കാട്ടുന്നു. അടിയന്തര ഇടപെടൽ ഉണ്ടായില്ലെങ്കിൽ അഞ്ഞൂറിലധികം വീടുകൾ, വിവിധ ആരാധനാലയങ്ങൾ, വിദ്യാഭ്യാസ സ്ഥാപനങ്ങൾ എന്നിവയിലേക്കുള്ള ഗതാഗതം പൂർണ്ണമായും തടസ്സപ്പെടുകയോ അപകടകരമായ അവസ്ഥയിലാവുകയോ ചെയ്യും.

റോഡിന് കുറുകെ എത്തുന്ന വെള്ളം പുഴയിലേക്ക് തിരിച്ചുവിടാൻ ആവശ്യമായ ഡ്രെയ്‌നേജ് സൗകര്യങ്ങൾ ഉടൻ നിർമിക്കണമെന്നാണ് പഞ്ചായത്തിന്റെ ആവശ്യം. ദേശീയപാത അതോറിറ്റി ഉദ്യോഗസ്ഥരുടെ പരിശോധനാവേളയിൽ നെന്മണിക്കര പഞ്ചായത്ത് പ്രസിഡന്റ് വി.ടി.വിജയലക്ഷ്മി, വൈസ് പ്രസിഡന്റ് കെ.എ.സുരേഷ്, അംഗം വി.ആർ.സുരേഷ് എന്നിവർ സന്നിഹിതരായിരുന്നു.