തമിഴ്‌നാട് മുഖ്യമന്ത്രിയുടെ ഓഫീസർ ഓൺ സ്‌പെഷ്യൽ ഡ്യൂട്ടിയായി റിക്കി രാധൻ പണ്ഡിറ്റിനെ നിയമിച്ചു

ചെന്നൈ: തമിഴ്‌നാട്ടിലെ പ്രശസ്ത ജ്യോതിഷിയും തമിഴക വെട്രി കഴകം (ടിവികെ) വക്താവുമായ റിക്കി രാധൻ പണ്ഡിറ്റിനെ മുഖ്യമന്ത്രിയുടെ ഓഫീസർ ഓൺ സ്‌പെഷ്യൽ ഡ്യൂട്ടി (OSD) ആയി നിയമിച്ചുകൊണ്ട് സർക്കാർ ഉത്തരവ് പുറത്തിറക്കി. പ്രിൻസിപ്പൽ സെക്രട്ടറി റീത്ത ഹരീഷ് തക്കർ ഒപ്പിട്ട

ഉത്തരവിലൂടെയാണ് നിയമനം ഔദ്യോഗികമായി സ്ഥിരീകരിച്ചത്. ചുമതലയേൽക്കുന്ന തീയതി മുതൽ നിയമനം പ്രാബല്യത്തിൽ വരും.

നിയമനവുമായി ബന്ധപ്പെട്ട നിബന്ധനകളും വ്യവസ്ഥകളും പിന്നീട് പ്രത്യേകം പുറപ്പെടുവിക്കുമെന്ന് ഉത്തരവിൽ വ്യക്തമാക്കിയിട്ടുണ്ട്.

നടൻ വിജയുടെ പേഴ്സണൽ ജ്യോതിഷിയാണ് റിക്കി രാധൻ പണ്ഡിറ്റ്. 2026-ലെ തെരഞ്ഞെടുപ്പിൽ വിജയ്ക്കും ടിവികെക്കും മികച്ച വിജയം ഉണ്ടാകുമെന്ന് റിക്കി രാധൻ പണ്ഡിറ്റ് നേരത്തെ പ്രവചിച്ചിരുന്നു.

വിജയത്തിന് പിന്നാലെ റിക്കി രാധൻ പണ്ഡിറ്റ് വീട്ടിലെത്തി വിജയുമായി കൂടിക്കാഴ്ച നടത്തിയിരുന്നു. ടിവികെ വക്താക്കൾ മാധ്യമങ്ങളെ അഭിമുഖീകരിക്കുന്ന വേളകളിൽ പലപ്പോഴും റിക്കി രാധൻ പണ്ഡിറ്റും കൂടെയുണ്ടാകാറുണ്ട്.

ജ്യോതിഷവും രാഷ്ട്രീയവും സംയോജിപ്പിച്ചുകൊണ്ടുള്ള ഇദ്ദേഹത്തിന്റെ പ്രസ്താവനകളും പ്രവചനങ്ങളും വലിയ രീതിയിൽ ശ്രദ്ധിക്കപ്പെട്ടിരുന്നു. **ആരാണ് റിക്കി രാധൻ പണ്ഡിറ്റ്?** വേദ ജ്യോതിഷം, സംഖ്യാശാസ്ത്രം, ധ്യാനം അടിസ്ഥാനമാക്കിയുള്ള മാർഗ്ഗനിർദ്ദേശം എന്നിവയിൽ നാല് പതിറ്റാണ്ടിന്റെ പരിചയസമ്പത്തുള്ള വ്യക്തിയാണ് ഇദ്ദേഹം.

ബിജെപി, കോൺഗ്രസ്, ഡിഎംകെ, എഐഎഡിഎംകെ തുടങ്ങിയ വിവിധ രാഷ്ട്രീയ പാർട്ടികളുടെ ഭാവി പ്രവചിച്ചിട്ടുള്ള രാധൻ പണ്ഡിറ്റിന് തമിഴ്‌നാട് മുൻ മുഖ്യമന്ത്രി ജെ. ജയലളിതയുമായും അടുത്ത ബന്ധമുണ്ടായിരുന്നു.

പണ്ഡിറ്റ് വെട്രിവേൽ എന്ന പേരിൽ അറിയപ്പെട്ടിരുന്ന ഇദ്ദേഹം, 2008-ൽ ഡൽഹിയിലേക്ക് താമസം മാറിയ ശേഷമാണ് റിക്കി രാധൻ പണ്ഡിറ്റ് എന്ന് പേര് മാറ്റുന്നത്. വിജയ് രാഷ്ട്രീയ പ്രവേശനം നടത്തുന്നതിന് ഏറെ മുൻപേ തന്നെ പണ്ഡിറ്റുമായി അടുത്ത ബന്ധം പുലർത്തിയിരുന്നു.

തെരഞ്ഞെടുപ്പിന് വളരെ മുമ്പുതന്നെ രാഷ്ട്രീയ വിജയം രാധൻ പണ്ഡിറ്റ് പ്രവചിച്ചിരുന്നു. വിജയുടെ ജാതകം അസാധാരണമായ “സുനാമി പോലുള്ള” ശക്തിയുള്ളതാണെന്നാണ് അദ്ദേഹം വിശേഷിപ്പിച്ചിരുന്നത്.