രാജ്യത്ത് ചില്ലറ വിപണിയിൽ വിലക്കയറ്റം രൂക്ഷമാകുമെന്ന് കേന്ദ്ര ധനമന്ത്രാലയത്തിന്റെ മുന്നറിയിപ്പ്

രാജ്യത്തെ ചില്ലറ വിപണിയിൽ വരും ദിവസങ്ങളിൽ വിലക്കയറ്റം രൂക്ഷമാകാൻ സാധ്യതയുണ്ടെന്ന് കേന്ദ്ര ധനമന്ത്രാലയത്തിന്റെ പ്രതിമാസ സാമ്പത്തിക അവലോകന റിപ്പോർട്ട് വ്യക്തമാക്കുന്നു. മൊത്തവിപണിയിലുണ്ടാകുന്ന വിലക്കയറ്റത്തിന്റെ പ്രതിഫലനം ക്രമേണ ചില്ലറ വിപണിയിലേക്കും വ്യാപിക്കുമെന്നാണ് റിപ്പോർട്ടിലെ പ്രധാന വിലയിരുത്തൽ.

ഏപ്രിൽ മാസത്തിൽ ക്രൂഡ് ഓയിൽ വില വർധനയുടെ ആഘാതം എണ്ണക്കമ്പനികൾ ഉപഭോക്താക്കളിലേക്ക് പൂർണമായി കൈമാറാത്തതിനാലാണ് ചില്ലറ വിപണിയിൽ വലിയ വിലക്കയറ്റം അന്ന് അനുഭവപ്പെടാതിരുന്നത്. എന്നാൽ, മേയ് മാസത്തിൽ പെട്രോൾ, ഡീസൽ നിരക്കുകളിൽ വരുത്തിയ വർധനവ് സ്ഥിതിഗതികൾ മാറ്റുമെന്ന് മന്ത്രാലയം നിരീക്ഷിക്കുന്നു.

ഇന്ധനവിലയിലുണ്ടാകുന്ന ഈ വർധനവ് ഗതാഗത ചെലവുകൾ, ഊർജം, ഭക്ഷ്യവസ്തുക്കൾ എന്നിവയുടെ വില വർധനവിന് നേരിട്ട് വഴിവെക്കും. മൊത്തവിപണിയിലെ ഉയർന്ന ചെലവ് ദീർഘകാലത്തേക്ക് തുടരുകയാണെങ്കിൽ, അതിന്റെ സാമ്പത്തിക ബാധ്യത വ്യാപാരികൾ സ്വാഭാവികമായും ചില്ലറ വിപണിയിലേക്ക് മാറ്റുമെന്ന ആശങ്കയും റിപ്പോർട്ടിലുണ്ട്.

ഇതിനുപുറമെ, കാലാവസ്ഥാ വ്യതിയാനങ്ങളും വിപണിയിൽ വലിയ വെല്ലുവിളിയാകാൻ സാധ്യതയുണ്ട്. എൽനിനോ പ്രതിഭാസം മൂലം മഴയിലുണ്ടാകുന്ന കുറവും, നിലനിൽക്കുന്ന അന്താരാഷ്ട്ര പ്രതിസന്ധികളും ഭക്ഷ്യവസ്തുക്കളുടെ വില കുതിച്ചുയരുന്നതിലേക്ക് നയിച്ചേക്കാമെന്നും ധനമന്ത്രാലയം മുന്നറിയിപ്പ് നൽകുന്നു.