പ്രവാസികൾക്ക് മികച്ച വരുമാന അവസരം: എഫ്സിഎൻആർ നിക്ഷേപങ്ങളിൽ പലിശ നിരക്ക് കുത്തനെ ഉയർന്നു

ഇന്ത്യൻ ബാങ്കുകൾ പ്രവാസികൾക്കായി വാഗ്ദാനം ചെയ്യുന്ന എഫ്സിഎൻആർ (Foreign Currency Non-Resident) നിക്ഷേപങ്ങളുടെ പലിശ നിരക്കുകളിൽ വലിയ വർധന രേഖപ്പെടുത്തി. കഴിഞ്ഞ കുറേ വർഷങ്ങളായി 3.5% മുതൽ 4% വരെയായിരുന്ന പലിശ നിരക്ക്, നിലവിൽ 6% മുതൽ 7.10% വരെയായി ഉയർന്നു.

പലിശ വർധനയുടെ പശ്ചാത്തലം 2013-14 കാലഘട്ടത്തിൽ ഇന്ത്യൻ സമ്പദ്‌വ്യവസ്ഥ നേരിട്ട പ്രതിസന്ധികളെ മറികടക്കാൻ റിസർവ് ബാങ്ക് ഓഫ് ഇന്ത്യ സ്വീകരിച്ച നടപടികൾക്ക് സമാനമായ തന്ത്രമാണ് ഇപ്പോഴും ആവിഷ്കരിച്ചിരിക്കുന്നത്.

വിദേശ നാണ്യ ശേഖരം വർധിപ്പിക്കുന്നതിനും കറൻസി മൂല്യവ്യതിയാനത്തിലെ സമ്മർദം കുറയ്ക്കുന്നതിനുമായാണ് ആർബിഐ പുതിയ സംവിധാനം ഏർപ്പെടുത്തിയത്. ജൂൺ 8 മുതൽ സെപ്റ്റംബർ 30 വരെയുള്ള കാലയളവിൽ സ്വീകരിക്കുന്ന ഡോളർ നിക്ഷേപങ്ങളുടെ ഹെഡ്ജിങ് ചെലവ് ആർബിഐ ഏറ്റെടുക്കുന്നതാണ് ഈ ഉയർന്ന പലിശ നൽകാൻ ബാങ്കുകളെ പ്രാപ്തമാക്കുന്നത്.

എഫ്സിഎൻആർ നിക്ഷേപത്തിന്റെ സവിശേഷതകൾ ഈ നിക്ഷേപ പദ്ധതിയുടെ പ്രധാന ആകർഷണങ്ങൾ താഴെ പറയുന്നവയാണ്: ∙ കറൻസി സുരക്ഷിതത്വം: നിക്ഷേപം ഡോളറിലായതിനാൽ രൂപയുടെ മൂല്യത്തകർച്ച നിക്ഷേപകനെ ബാധിക്കില്ല. കാലാവധി പൂർത്തിയാകുമ്പോൾ പലിശയടക്കം ഡോളറായി തന്നെ ലഭിക്കും.
∙ നികുതി ആനുകൂല്യം: ഇന്ത്യയിൽ എഫ്സിഎൻആർ നിക്ഷേപങ്ങളിൽ നിന്നുള്ള പലിശ വരുമാനത്തിന് നികുതി ബാധകമല്ല.
∙ പൂർണ റീപാട്രിയേഷൻ: നിക്ഷേപിച്ച തുകയും പലിശയും തടസ്സമില്ലാതെ വിദേശത്തേക്ക് തിരികെ അയക്കാൻ സാധിക്കും.

ശ്രദ്ധിക്കേണ്ട കാര്യങ്ങൾ ഈ ആനുകൂല്യം പ്രയോജനപ്പെടുത്തുന്നതിന് മുൻപ് നിക്ഷേപകർ താഴെ പറയുന്ന കാര്യങ്ങളിൽ വ്യക്തത വരുത്തണം: 1.

കാലാവധി: 2026 സെപ്റ്റംബർ 30 വരെ സ്വീകരിക്കുന്ന പുതിയ നിക്ഷേപങ്ങൾക്കാണ് നിലവിലെ ഉയർന്ന പലിശ ലഭിക്കുക.
2. ലോക് ഇൻ പീരിയഡ്: നിക്ഷേപത്തിന് 12 മാസത്തെ നിർബന്ധിത ലോക്ക്-ഇൻ പീരിയഡ് ഉണ്ട്.

ഈ കാലയളവിൽ തുക പിൻവലിക്കാൻ സാധിക്കില്ല.
3. വിദേശത്തെ നികുതി: ഇന്ത്യയിൽ നികുതിയില്ലെങ്കിലും, പ്രവാസി താമസിക്കുന്ന രാജ്യത്തെ നികുതി നിയമങ്ങൾ അനുസരിച്ച് പലിശ വരുമാനം നികുതിക്ക് വിധേയമായേക്കാം.

നിക്ഷേപം ആരംഭിക്കുന്ന രീതി പ്രവാസികൾക്ക് പ്രധാനമായും മൂന്ന് രീതികളിൽ എഫ്സിഎൻആർ അക്കൗണ്ട് തുടങ്ങാം: ∙ നേരിട്ടുള്ള റെമിറ്റൻസ്: വിദേശ ബാങ്ക് അക്കൗണ്ടിൽ നിന്ന് നേരിട്ട് ഇന്ത്യയിലേക്ക് പണം അയച്ച് നിക്ഷേപം ആരംഭിക്കാം.
∙ എൻആർഇ അക്കൗണ്ട്: എൻആർഇ അക്കൗണ്ടിലുള്ള തുക നെറ്റ് ബാങ്കിങ് അല്ലെങ്കിൽ മൊബൈൽ ആപ്പ് ഉപയോഗിച്ച് എഫ്സിഎൻആർ നിക്ഷേപത്തിലേക്ക് മാറ്റാം.
∙ പുതിയ അക്കൗണ്ട്: ഇന്ത്യയിൽ അക്കൗണ്ട് ഇല്ലാത്തവർക്ക് പാസ്‌പോർട്ട്, വിസ/ഇഖാമ കോപ്പി, വിലാസം തെളിയിക്കുന്ന രേഖകൾ എന്നിവ സമർപ്പിച്ച് അക്കൗണ്ട് തുറക്കാവുന്നതാണ്. ബാങ്കിങ്, ഇൻഷുറൻസ് സംബന്ധമായ കൂടുതൽ സംശയങ്ങൾക്ക് +91-7994497344 എന്ന നമ്പറിൽ വാട്സാപ്പ് വഴി ബന്ധപ്പെടാം.