സംസ്ഥാനത്ത് ദേശീയപാത നിർമാണം പൂർത്തിയാകാൻ ഇനിയും വർഷങ്ങൾ കാത്തിരിക്കേണ്ടി വരുമെന്ന് സൂചന. നേരത്തേ നിശ്ചയിച്ച രൂപരേഖയിൽ മാറ്റം വരുത്തിക്കൊണ്ട് പുതിയ ഉയരപ്പാതകളും അടിപ്പാതകളും നിർമിക്കാൻ തീരുമാനിച്ചിട്ടുണ്ടെങ്കിലും, ഇതു സംബന്ധിച്ച ഔദ്യോഗിക ഉത്തരവുകൾ ഇതുവരെ പുറത്തിറങ്ങിയിട്ടില്ല.
ഈ സാഹചര്യത്തിൽ പ്രസ്തുത ഭാഗങ്ങളിലെ പ്രവൃത്തികൾ നിലവിലെ കരാറുകളുടെ പരിധിയിൽനിന്ന് കരാർക്കമ്പനികൾ ഒഴിവാക്കിക്കഴിഞ്ഞു. പൊതുജനങ്ങളുടെ ഭാഗത്തുനിന്ന് ശക്തമായ ആവശ്യമുയർന്നതിനെത്തുടർന്നാണ് തുടക്കത്തിൽ തയാറാക്കിയ പദ്ധതി രേഖകളിൽ ഭേദഗതി വരുത്തി പുതിയ ഉയരപ്പാതകളും അടിപ്പാതകളും ഉൾപ്പെടുത്താൻ തീരുമാനിച്ചത്.
പ്രധാനമായും ആലപ്പുഴ, എറണാകുളം, തിരുവനന്തപുരം, കണ്ണൂർ, കാസർകോട്, കോഴിക്കോട് എന്നീ ജില്ലകളിലാണ് നിർമാണ മേഖലകളിൽ ഇത്തരം മാറ്റങ്ങൾ വരുത്തിയിട്ടുള്ളത്. പൊതുജനങ്ങളുടെ പുതിയ ആവശ്യങ്ങൾ പരിഗണിച്ചതിനാൽ നിർമാണ കാലാവധി നീട്ടിനൽകണമെന്ന് ആവശ്യപ്പെട്ട് കരാർക്കമ്പനികൾ ഉടൻതന്നെ ദേശീയപാത അതോറിറ്റിയെ സമീപിച്ചേക്കുമെന്നാണ് വിവരം.
ഇതിനുപുറമേ, നിർമാണത്തിന് ആവശ്യമായ അസംസ്കൃത വസ്തുക്കളുടെ ലഭ്യതക്കുറവും പദ്ധതിയുടെ വേഗതയെ സാരമായി ബാധിച്ചിട്ടുണ്ട്. പ്രവൃത്തികൾ വൈകുന്ന വിവിധ മേഖലകളിൽ ദേശീയപാത അതോറിറ്റി ഇതിനോടകം തന്നെ സ്ലോ പ്രോഗ്രസ് നോട്ടിസ് നൽകിയിട്ടുണ്ട്.
അതോടൊപ്പം, സർവീസ് റോഡുകളുടെ നിർമാണത്തിലും കനത്ത പ്രതിസന്ധികളാണ് നിലനിൽക്കുന്നത്. ഒന്നര മീറ്റർ വീതിയുള്ള ഡ്രെയ്നേജ് സംവിധാനം ഉൾപ്പെടെ ആകെ 7 മീറ്റർ വീതിയാണ് ഒരു സർവീസ് റോഡിന് ആവശ്യമായി വരുന്നത്.
എന്നാൽ പാത കടന്നുപോകുന്ന ഭൂരിഭാഗം ജില്ലകളിലും സ്ഥലപരിമിതി മൂലം ഈ മാനദണ്ഡം പൂർണ്ണമായും പാലിക്കാൻ സാധിച്ചിട്ടില്ല. സംസ്ഥാന സർക്കാർ ആവശ്യമായ ഭൂമി ഏറ്റെടുത്തു നൽകുകയാണെങ്കിൽ സർവീസ് റോഡുകളുടെ വീതി വർധിപ്പിക്കാൻ സാധിക്കുമെന്നാണ് ദേശീയപാത അതോറിറ്റിയുടെ നിലപാട്.
നിലവിലെ സർവീസ് റോഡുകളിൽ യാത്രാസുരക്ഷയുമായി ബന്ധപ്പെട്ട് ഗുരുതരമായ വീഴ്ചകളുണ്ടെന്ന് നാറ്റ്പാക് നേരത്തേ തന്നെ കണ്ടെത്തി റിപ്പോർട്ട് ചെയ്തിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
