ഗൂഗിൾ ഹോം ഉപയോക്താക്കൾക്കായി പുതിയ ഫീച്ചർ; സ്മാർട്ട് ഹോം ഓട്ടോമേഷൻ കൂടുതൽ കൃത്യമാക്കാൻ വഴിയൊരുങ്ങി

സ്മാർട്ട് ഹോം സംവിധാനങ്ങളിലെ ലൊക്കേഷൻ അധിഷ്ഠിത ഓട്ടോമേഷനുകൾ പലപ്പോഴും ഉപയോക്താക്കൾക്ക് ബുദ്ധിമുട്ട് സൃഷ്ടിക്കാറുണ്ട്. വ്യായാമ വേളകളിൽ ജിമ്മിൽ ആയിരിക്കുമ്പോൾ പോലും ഉപയോക്താവ് വീട്ടിലാണെന്ന് സ്മാർട്ട് ഹോം സംവിധാനങ്ങൾ തെറ്റായി വിലയിരുത്തുന്ന സാഹചര്യങ്ങൾ പതിവാണ്.

കൃത്യസമയത്ത് വീടുകളിൽ തിരിച്ചെത്തിയാൽ പോലും വെൽക്കം ഹോം ഓട്ടോമേഷനുകൾ പ്രവർത്തിക്കാതെ പോകുന്ന അവസ്ഥയും നിലവിലുണ്ട്. ലൈറ്റുകളും സ്വിച്ചുകളും പ്രതീക്ഷിച്ച രീതിയിൽ പ്രവർത്തിക്കാതെ വരുമ്പോൾ ഇത്തരം സംവിധാനങ്ങളിലുള്ള വിശ്വാസ്യതയാണ് നഷ്ടപ്പെടുന്നത്.

ഈ പ്രശ്നത്തിന് പരിഹാരമായി Google Home ആപ്പിൽ നിർണായകമായ ഒരു മാറ്റം വരുത്തിയിരിക്കുകയാണ്. പ്രസൻസ് സെൻസിങ് ക്രമീകരണങ്ങളിലേക്ക് സ്വന്തം വൈഫൈ നെറ്റ്‌വർക്ക് ചേർക്കുക എന്നതാണ് ഇതിനുള്ള പരിഹാരം.

ഫോണിന്റെ ജിപിഎസ് ലൊക്കേഷനെ മാത്രം പൂർണ്ണമായി ആശ്രയിക്കുന്നതിന് പകരം, ഫോൺ വീടുകളിലെ വൈഫൈ നെറ്റ്‌വർക്കുമായി കണക്ട് ചെയ്തിട്ടുണ്ടോ എന്ന് പരിശോധിക്കാൻ ഇതിലൂടെ സാധിക്കും. ലൊക്കേഷൻ അടിസ്ഥാനമാക്കിയുള്ള ഓട്ടോമേഷനുകളിലെ പ്രധാന പോരായ്മകൾ പരിഹരിക്കാൻ ഈ ചെറിയ മാറ്റം ഏറെ സഹായിക്കുമെന്ന് ഉപയോക്താക്കൾ വ്യക്തമാക്കുന്നു.

പരമ്പരാഗത ലൊക്കേഷൻ ഡിറ്റക്ഷൻ സംവിധാനങ്ങൾ എല്ലായ്പ്പോഴും കൃത്യമാകണമെന്നില്ല. ജിപിഎസ്, സെല്ലുലാർ നെറ്റ്‌വർക്കുകൾ, വൈഫൈ സിഗ്നലുകൾ എന്നിവയുടെയെല്ലാം സഹായത്തോടെയാണ് സാധാരണയായി ഫോണിന്റെ ലൊക്കേഷൻ കണ്ടെത്തുന്നത്.

എന്നാൽ അപ്പാർട്ട്മെന്റ് കെട്ടിടങ്ങൾക്ക് സമീപത്തൊക്കെ എത്തുമ്പോൾ തന്നെ ഉദ്ദേശിച്ച സമയത്തിന് മുൻപ് തന്നെ ഓട്ടോമേഷനുകൾ പ്രവർത്തിച്ചുപോകുന്ന സാഹചര്യങ്ങളും ഉണ്ടാകാറുണ്ട്. സ്ട്രീറ്റിലൂടെ നടന്നുപോകുമ്പോൾ വീടുകളിലെ വാതിലുകൾ അൺലോക്ക് ആകുകയോ പാട്ടുകൾ പ്ലേ ആകുകയോ ചെയ്യുന്നത് ഒഴിവാക്കേണ്ട

ഒന്നാണ്. വൈഫൈ അടിസ്ഥാനമാക്കിയുള്ള പ്രസൻസ് ഫീച്ചർ ഉപയോഗപ്പെടുത്തുന്നതിലൂടെ ഇത്തരം പ്രശ്നങ്ങൾക്ക് ശാശ്വത പരിഹാരം കാണാം.

ഫോൺ വീടിന്റെ വൈഫൈയുമായി കണക്ട് ചെയ്യപ്പെടുമ്പോൾ ഉപയോക്താവ് വീട്ടിൽ തന്നെയുണ്ടെന്നതിന്റെ കൃത്യമായ തെളിവായി ഇത് മാറുന്നു. Google Home ആപ്പ് വഴി വളരെ എളുപ്പത്തിൽ ഈ സെറ്റിങ്സ് ക്രമീകരിക്കാവുന്നതാണ്.

ആപ്പ് തുറന്ന് പ്രൊഫൈൽ ചിത്രത്തിൽ ടാപ്പ് ചെയ്ത് ഹോം സെറ്റിങ്സ് തിരഞ്ഞെടുക്കുക. പ്രസൻസ് സെറ്റിങ്സിന് കീഴിലുള്ള ഹോം വൈഫൈ നെറ്റ്‌വർക്ക്സ് എന്ന ഓപ്ഷൻ വഴി നിലവിലുള്ള വൈഫൈ നെറ്റ്‌വർക്ക് രജിസ്റ്റർ ചെയ്യാൻ സാധിക്കും.

ഈ ഫീച്ചർ നിലവിലുള്ള ലൊക്കേഷൻ അധിഷ്ഠിത ഹോം അല്ലെങ്കിൽ എവേ ഡിറ്റക്ഷന് പകരമായിട്ടല്ല പ്രവർത്തിക്കുന്നത്, മറിച്ച് അതിന്റെ കൂടെ ഒരു അധിക സുരക്ഷാ കവചം പോലെയാണ് പ്രവർത്തിക്കുന്നത്. വീട്ടിലെത്തുമ്പോൾ ഫാനും എയർ പ്യൂരിഫയറും തനിയെ ഓഫ് ആകാനും, ജോലിസ്ഥലത്തേക്ക് ഇറങ്ങുമ്പോൾ സ്റ്റഡി റൂമിലെ ലൈറ്റുകളും മോണിറ്ററും ഓഫാകാനുമൊക്കെ ഈ ഓട്ടോമേഷൻ വലിയ തോതിൽ പ്രയോജനപ്പെടുത്താം.

വൈഫൈ നെറ്റ്‌വർക്ക് വീടിന്റെ പരിധിക്കുള്ളിൽ മാത്രം ഒതുങ്ങിനിൽക്കുന്നതിനാൽ സ്മാർട്ട് ലൈറ്റുകളുടെയും മറ്റ് ഗാഡ്ജറ്റുകളുടെയും പ്രവർത്തനം കൂടുതൽ കൃത്യതയുള്ളതായി മാറുന്നു.