കോഴിക്കോട് ഓപ്പറേഷൻ തെളിമ: നിലവാരമില്ലാത്ത ഭക്ഷ്യഎണ്ണയും സമൂസയും പത്തിരിയും പിടിച്ചെടുത്ത് നശിപ്പിച്ചു

പൊതുജനാരോഗ്യത്തിന് ഗുരുതരമായ ഭീഷണിയുയർത്തുന്ന ഭക്ഷ്യനിർമാണ യൂണിറ്റുകൾക്കെതിരെ കർശന നടപടിയുമായി ഭക്ഷ്യസുരക്ഷാ വകുപ്പ് രംഗത്തെത്തി. സംസ്ഥാനവ്യാപകമായി നടപ്പിലാക്കിവരുന്ന ‘ഓപ്പറേഷൻ തെളിമ’യുടെ ഭാഗമായി കോഴിക്കോട് ജില്ലയിൽ പുലർച്ചെ ഒരു മണിക്ക് ആരംഭിച്ച മിന്നൽ പരിശോധനയിലാണ് മാനദണ്ഡങ്ങൾ ലംഘിച്ച 440 ലീറ്റർ ഭക്ഷ്യ എണ്ണയും വൃത്തിഹീനമായ സാഹചര്യങ്ങളിൽ പാകം ചെയ്ത വലിയൊരു ശേഖരം ഭക്ഷ്യവസ്തുക്കളും പിടിച്ചെടുത്ത് നശിപ്പിച്ചത്.

വലിയ അളവിൽ എണ്ണക്കടികൾ നിർമ്മിച്ച് ജില്ലയിലെ വിവിധ ചെറുകിട ഭക്ഷ്യശാലകളിലേക്കും ചായക്കടകളിലേക്കും വിതരണം നടത്തിവരുന്ന കേന്ദ്രങ്ങൾ ലക്ഷ്യമിട്ടായിരുന്നു പ്രധാന റെയ്ഡ്.

ആകെ അഞ്ച് സ്ക്വാഡുകളിലായി പത്ത് സ്ഥാപനങ്ങളിലാണ് ഒരേസമയം പരിശോധന നടന്നത്. ഭക്ഷ്യോത്പന്നങ്ങളുടെ നിർമ്മാണവും വിതരണവും ആരോഗ്യത്തിന് ഹാനികരമാകുന്ന സാഹചര്യം ഒഴിവാക്കാനാണ് ഉദ്യോഗസ്ഥർ പുലർച്ചെ തന്നെ രംഗത്തിറങ്ങിയത്.

ഭക്ഷ്യ എണ്ണയുടെ ഗുണനിലവാരം കൃത്യമായി തിട്ടപ്പെടുത്തുന്നതിനായി മൊബൈൽ ഫുഡ് ടെസ്റ്റിങ് ലാബിന്റെ സഹായത്തോടെ ടെസ്റ്റോമീറ്റർ ഉപയോഗിച്ചും പരിശോധനകൾ പൂർത്തിയാക്കി. ലൈസൻസില്ലാതെ പ്രവർത്തിച്ചുവന്ന രണ്ട് സ്ഥാപനങ്ങൾ ഉദ്യോഗസ്ഥർ അടച്ചുപൂട്ടി.

ഇതിനുപുറമേ, കടുത്ത ശുചിത്വമില്ലായ്മ പ്രകടമായ നാല് സ്ഥാപനങ്ങൾക്കും പൂട്ടുവീണിട്ടുണ്ട്. ഗുരുതരമായ നിയമലംഘനങ്ങൾ കണ്ടെത്തിയ നാല് സ്ഥാപനങ്ങൾക്കെതിരെ പിഴ ഈടാക്കാനുള്ള ഔദ്യോഗിക നോട്ടിസ് നൽകിയിട്ടുണ്ട്.

കൂടാതെ രണ്ട് സ്ഥാപനങ്ങൾക്കെതിരെ കർശന നിയമനടപടികൾ സ്വീകരിക്കുമെന്നും അധികൃതർ അറിയിച്ചു. ഈ റെയ്ഡിൽ 440 ലീറ്റർ ഭക്ഷ്യ എണ്ണയ്ക്ക് പുറമേ 3,900 സമൂസ, 2,600 പൊരിച്ച പത്തിരി, 1,000 പരിപ്പുവട, 250 കട്‌ലറ്റ്, 1,000 ചപ്പാത്തി, 250 ഇഡ്ഡലി, 100 വട എന്നിവയും 50 കിലോഗ്രാം പത്തിരിമാവുമാണ് പിടിച്ചെടുത്ത് നശിപ്പിച്ചത്.

പൂർണ്ണമായും വൃത്തിഹീനമായ ചുറ്റുപാടുകളിൽ പാകം ചെയ്തതും മനുഷ്യജീവിതത്തിന് ആപത്കരമാകുവാൻ സാധ്യതയുള്ളതുമായ ഭക്ഷണസാധനങ്ങളാണ് നശിപ്പിച്ചത്. ഭക്ഷ്യവസ്തുക്കളുടെ ഉത്പാദനത്തിലും സൂക്ഷിപ്പിലും വിതരണത്തിലും കർശനമായ ശുചിത്വവും ഉയർന്ന ഗുണനിലവാരവും പാലിക്കാത്ത എല്ലാ സ്ഥാപനങ്ങൾക്കെതിരെയും പരിശോധനകളും കടുത്ത നടപടികളും തുടരുമെന്ന് ഭക്ഷ്യസുരക്ഷാ വകുപ്പ് വ്യക്തമാക്കി.

ഭക്ഷ്യ എണ്ണയുടെ ആവർത്തിച്ചുള്ള ദോഷകരമായ ഉപയോഗം പൂർണ്ണമായി തടയുക എന്ന ലക്ഷ്യത്തോടെയാണ് സംസ്ഥാനത്തുടനീളം ‘ഓപ്പറേഷൻ തെളിമ 2.0’ പദ്ധതി വ്യാപിപ്പിച്ചിരിക്കുന്നത്. ഭക്ഷ്യസുരക്ഷാ ഡപ്യൂട്ടി കമ്മിഷണർ ടി.എസ്.വിനോദ് കുമാർ, അസിസ്റ്റന്റ് കമ്മിഷണർ ഡോ.ജോസഫ് കുര്യാക്കോസ് എന്നിവരുടെ നേതൃത്വത്തിലാണ് ഈ പരിശോധനകൾ ഏകോപിപ്പിച്ചത്.