ഫറോക്കിൽ പുതിയ റെയിൽ കോച്ച് റസ്റ്ററന്റ് വരുന്നു; ടെൻഡർ നടപടികൾ പൂർത്തിയായി

ഉപയോഗശൂന്യമായ പഴയ ട്രെയിൻ കോച്ചുകൾ നവീകരിച്ച് വ്യത്യസ്തമായ ഭക്ഷണശാലകളാക്കി മാറ്റുന്ന റെയിൽവേയുടെ പദ്ധതിയുടെ ഭാഗമായി ഫറോക്കിൽ പുതിയ റെയിൽ കോച്ച് റസ്റ്ററന്റ് യാഥാർത്ഥ്യമാകുന്നു. ചരിത്രപ്രസിദ്ധമായ പഴയ പാലത്തിന് സമീപം പ്രകൃതിരമണീയമായ ചാലിയാർ തീരത്തെ റെയിൽവേ ഭൂമിയിലാണ് ഈ നൂതന പദ്ധതിക്ക് കളമൊരുങ്ങുന്നത്.

ഇതിനായുള്ള ഔദ്യോഗിക ടെൻഡർ നടപടികൾ ഇതിനോടകം പൂർത്തിയായിട്ടുണ്ട്. റസ്റ്ററന്റിനായി സജ്ജമാക്കേണ്ട

പഴയ റെയിലി കോച്ച് ഫറോക്കിൽ എത്തിക്കുന്നതിനുള്ള പ്രാരംഭ നടപടികൾ റെയിൽവേ അധികൃതർ ആരംഭിച്ചു കഴിഞ്ഞു. 570 ചതുരശ്ര മീറ്റർ വിസ്തീർണ്ണമുള്ള വിശാലമായ സ്ഥലത്താണ് പദ്ധതി വിഭാവനം ചെയ്തിരിക്കുന്നത്.

പഴയൊരു റെയിൽവേ കോച്ചിനുള്ളിൽ പൂർണ്ണമായും എയർകണ്ടിഷൻ ചെയ്ത അന്തരീക്ഷത്തിലാകും ഭക്ഷണശാല സജ്ജീകരിക്കുക. സന്ദർശകർക്കായി ആധുനിക രീതിയിലുള്ള ഇരിപ്പിടങ്ങൾ, അത്യാധുനിക സൗകര്യങ്ങളോടുകൂടിയ അടുക്കള, വാഹനങ്ങൾക്കായി വിശാലമായ പാർക്കിങ് സൗകര്യം എന്നിവയും ഇവിടെ ഒരുക്കും.

25 ലക്ഷം രൂപയ്ക്കാണ് പദ്ധതിയുടെ ടെൻഡർ നൽകിയിട്ടുള്ളത്. ഫറോക്ക് റെയിൽവേ സ്റ്റേഷനിൽ എത്തുന്ന യാത്രക്കാർക്കും നഗരവാസികൾക്കും ഒരുപോലെ ഗുണകരമാകുന്ന രീതിയിൽ സ്വാദിഷ്ടമായ ഭക്ഷണം ആസ്വദിക്കാനുള്ള സൗകര്യം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.

റെയിൽവേയുടെ ഉടമസ്ഥതയിലുള്ള ഉപയോഗശൂന്യമായ പഴയ കോച്ചുകൾ ക്രിയാത്മകമായി പുനരുപയോഗിക്കുക എന്ന ലക്ഷ്യത്തോടെയാണ് റെയിൽവേ ഈ പദ്ധതിക്ക് രൂപം നൽകിയത്. ഈ നവീന സംരംഭത്തിലൂടെ റെയിൽവേയ്ക്ക് അധിക വരുമാനം ലഭിക്കുന്നതിനൊപ്പം തന്നെ, പൊതുജനങ്ങൾക്കും യാത്രക്കാർക്കും തികച്ചും വ്യത്യസ്തമായ ചുറ്റുപാടിലിരുന്ന് പ്രിയപ്പെട്ട

വിഭവങ്ങൾ ആസ്വദിക്കാനുള്ള അവസരവും ഇതുവഴി കൈവരുന്നു. റെയിൽവേയുടെ നേരിട്ടുള്ള മേൽനോട്ടത്തിൽ ഫറോക്കിൽ ആരംഭിക്കുന്ന ഈ പുതിയ പദ്ധതി പ്രദേശത്തിന്റെ ടൂറിസം, വ്യാപാരിക മേഖലകൾക്ക് വലിയ ഉണർവ്വ് നൽകുമെന്നാണ് പൊതുവെ വിലയിരുത്തപ്പെടുന്നത്.