തമിഴ്നാട്ടിലെ പ്രമുഖ ഗ്രാനൈറ്റ് വ്യവസായിയായ വീരമണിക്കെതിരേ ഏഴാമത്തെ പോക്സോ കേസ് കൂടി ചുമത്തി. ഞായറാഴ്ചയാണ് പ്രത്യേക അന്വേഷണ സംഘം (എസ്ഐടി) പുതിയ കേസ് രജിസ്റ്റർ ചെയ്തത്.
അതിക്രമത്തിനിരയായ മറ്റൊരു പെൺകുട്ടി കൂടി മൊഴി നൽകിയതിന്റെ അടിസ്ഥാനത്തിലാണ് നടപടിയെന്ന് പൊലീസ് വ്യക്തമാക്കി. ഇതുവരെ 11 പെൺകുട്ടികൾ ആണ് പ്രതിക്കെതിരേ മൊഴി നൽകിയിട്ടുള്ളത്.
വീരമണിയുടെ കൂട്ടാളിയും കേസിലെ മറ്റൊരു പ്രതിയുമായ ശാന്തിയുടെ വീട്ടിൽവെച്ച് വീരമണി പീഡിപ്പിച്ചെന്നാണ് 11-ാമത്തെ പെൺകുട്ടിയുടെ മൊഴി. ഇതിന്റെ അടിസ്ഥാനത്തിലാണ് പൊലീസ് പുതിയ കേസ് ഫയൽ ചെയ്തത്.
ഇതിനിടെ, വീരമണിയെ രക്ഷിക്കാൻ ശ്രമിച്ചതിന് ഇയാളുടെ മാനേജർ ശക്തിവേലിനെയും പൊലീസ് ഞായറാഴ്ച അറസ്റ്റ് ചെയ്തു. ഇയാളുടെ പണമിടപാടുകളടക്കം വിശദമായി പരിശോധിച്ചുവരികയാണെന്ന് അധികൃതർ അറിയിച്ചു.
പ്രായപൂർത്തിയാകാത്ത പെൺകുട്ടികളെ പീഡിപ്പിച്ച കേസിലാണ് തമിഴ്നാട്ടിലെ പ്രമുഖ ഗ്രാനൈറ്റ് വ്യവസായിയായ വീരമണി പിടിയിലായത്. വീരമണി പെൺകുട്ടികളെ ഉപദ്രവിക്കുന്ന ദൃശ്യങ്ങളടങ്ങിയ പെൻഡ്രൈവ് പൊലീസിന് ലഭിച്ചതോടെയാണ് കേസിൽ നിർണായക വഴിതിരിവുണ്ടായത്.
വീരമണിക്ക് ഒത്താശചെയ്തുനൽകിയ കൂട്ടാളികളായ ശാന്തിയെയും ഇവരുടെ ഭർത്താവ് മഹേന്ദ്ര സിംഹനെയും പൊലീസ് ഇതിനോടകം അറസ്റ്റ് ചെയ്തിരുന്നു. ഇതിനുപിന്നാലെ പെൺകുട്ടികളെ എത്തിച്ചുനൽകിയ മൂന്ന് ഡ്രൈവർമാരും പിടിയിലാവുകയും ഇവർ റിമാൻഡിലാവുകയും ചെയ്തു.
കഴിഞ്ഞദിവസം രണ്ടാമത്തെ പോക്സോ കേസുമായി ബന്ധപ്പെട്ട് വീരമണിയെ പൊലീസ് കസ്റ്റഡിയിൽ വാങ്ങിയിരുന്നു. രണ്ടുദിവസത്തെ ചോദ്യംചെയ്യലിന് ശേഷം പ്രതിയെ വീണ്ടും കോടതിയിൽ ഹാജരാക്കി ജയിലിലേക്ക് അയച്ചു.
പോക്സോ കേസുകളിൽ എസ്ഐടിയുടെ വിശദമായ അന്വേഷണവും തെളിവ് ശേഖരണവും സംസ്ഥാനത്ത് പുരോഗമിക്കുകയാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
