ആൻഡ്രോയിഡ് ഉപയോക്താക്കൾക്ക് കൂടുതൽ സുരക്ഷയുമായി ഗൂഗിൾ; പുതിയ ഫീച്ചറുകൾ പ്രഖ്യാപിച്ചു

തട്ടിപ്പുകളിൽ നിന്ന് ഉപയോക്താക്കൾക്ക് കൂടുതൽ സംരക്ഷണം നൽകുന്നതിനായി പുതിയ സുരക്ഷാ ഫീച്ചറുകൾ പ്രഖ്യാപിച്ച് ഗൂഗിൾ. ആപ്പിളിന്റെ ഐഫോണുകളേക്കാൾ മികച്ച തട്ടിപ്പ് പ്രതിരോധ സംവിധാനം ആൻഡ്രോയിഡ് നൽകുന്നുണ്ടെന്ന് കമ്പനി നേരത്തെ അവകാശപ്പെട്ടിരുന്നുവെങ്കിലും, സുരക്ഷ കൂടുതൽ ശക്തമാക്കുന്നതിനാണ് ഇപ്പോൾ പുതിയ ഫീച്ചറുകൾ അവതരിപ്പിച്ചിരിക്കുന്നത്.

ഗൂഗിൾ മെസേജസിനായി (Google Messages) പുതിയ ‘എൻഹാൻസ്ഡ് പ്രൊട്ടക്ഷൻ മോഡ്’ (Enhanced Protection mode) കമ്പനി പ്രഖ്യാപിച്ചു. സങ്കീർണ്ണമായ തട്ടിപ്പുകളെ പ്രതിരോധിക്കാൻ സഹായിക്കുന്ന ഈ ഓപ്ഷണൽ സുരക്ഷാ ക്രമീകരണത്തിൽ, ക്ലൗഡിലെ ഏറ്റവും പുതിയ ജെമിനി (Gemini) മോഡലുകളാണ് ഉപയോഗിക്കുന്നത്.

തട്ടിപ്പുകാരുടെ ലക്ഷ്യങ്ങൾ തിരിച്ചറിയാനും സാധാരണയായി ശ്രദ്ധയിൽപ്പെടാത്ത ഭീഷണികൾ കണ്ടെത്തുന്നതിനും ഇത് സഹായിക്കുമെന്ന് കമ്പനി വ്യക്തമാക്കി. പ്രൈവറ്റ് എഐ കമ്പ്യൂട്ട് (Private AI Compute) ഉപയോഗിച്ചാണ് ഈ വിശകലനം നടക്കുന്നത്.

അതായത് ഡാറ്റ എൻക്രിപ്റ്റ് ചെയ്യപ്പെടുകയും ഗൂഗിളിന് പോലും പ്രവേശിക്കാൻ കഴിയാത്ത സുരക്ഷിത അന്തരീക്ഷത്തിൽ പ്രോസസ്സ് ചെയ്യപ്പെടുകയും ചെയ്യും. ഉപയോക്താക്കളുടെ സ്വകാര്യതയ്ക്ക് കോട്ടം തട്ടാതെ തന്നെ കൂടുതൽ ശക്തമായ എഐ മോഡലുകൾ ഉപയോഗിക്കാൻ ഇത് വഴിയൊരുക്കുന്നു.

കൂടാതെ, ഗൂഗിൾ മെസേജസിലെ ലിങ്ക് സുരക്ഷയും കമ്പനി മെച്ചപ്പെടുത്തുന്നുണ്ട്. അപരിചിതമായ ലിങ്കുകൾ വിശ്വസനീയമാണോ എന്ന് നിർണ്ണയിക്കാൻ ജെമിനി നാനോ (Gemini Nano) ഇനി റിയൽ-ടൈം വെബ് സിഗ്നലുകൾക്കൊപ്പം പ്രവർത്തിക്കുമെന്ന് കമ്പനി അറിയിച്ചു.

ഇത് ഉപയോക്താക്കളെ സംശയാസ്പദമായ വെബ്‌സൈറ്റുകൾ സന്ദർശിക്കുന്നതിൽ നിന്ന് മുൻകൂട്ടി ഒഴിവാക്കാൻ സഹായിക്കും. മെസേജസ് ആപ്പിന് പുറമെ നോട്ടിഫിക്കേഷൻ ഷേഡിലേക്കും തട്ടിപ്പ് മുന്നറിയിപ്പുകൾ വ്യാപിപ്പിക്കുന്നുണ്ട്.

നേരത്തെ പിക്സൽ ഫോണുകളിൽ മാത്രം ലഭ്യമായിരുന്ന നോട്ടിഫിക്കേഷൻ അടിസ്ഥാനമാക്കിയുള്ള തട്ടിപ്പ് മുന്നറിയിപ്പുകൾ, ഇപ്പോൾ ലക്ഷക്കണക്കിന് മറ്റ് ആൻഡ്രോയിഡ് ഡിവൈസുകളിലേക്കും വ്യാപിപ്പിക്കുകയാണ്. ഹോണർ, ഇൻഫിനിക്സ്, ഐടെൽ, മോട്ടറോള, ഒപ്പോ, വൺപ്ലസ്, റിയൽമി, ടെക്നോ, വിവോ, ഷവോമി തുടങ്ങി വിവിധ ആൻഡ്രോയിഡ് നിർമ്മാതാക്കളുടെ ഫോണുകളിൽ ഈ ഫീച്ചർ ലഭ്യമാകും.

ഇന്ന് പ്രഖ്യാപിച്ചതിൽ ഏറ്റവും ഉപകാരപ്രദമായ ഒന്നാണ് സ്ക്രീൻ ഷെയറിംഗ് സമയത്തുള്ള മെച്ചപ്പെട്ട സുരക്ഷ.

സ്ക്രീൻ ഷെയർ ചെയ്യുമ്പോൾ സെൻസിറ്റീവ് വിവരങ്ങൾക്ക് ആൻഡ്രോയിഡ് ഇതിനകം തന്നെ ചില സംരക്ഷണം നൽകുന്നുണ്ട്. എന്നാൽ ഗൂഗിൾ ഇപ്പോൾ ഈ പ്രവർത്തനം ക്രോം, ആൻഡ്രോയിഡ് വെബ്‌വ്യൂ എന്നിവയിലേക്കും വ്യാപിപ്പിക്കുകയാണ്.

ലൈവ് സ്ക്രീൻ-ഷെയറിംഗ് സെഷനുകളിൽ ലോഗിൻ ക്രെഡൻഷ്യലുകൾ, പേമെന്റ് വിവരങ്ങൾ, മറ്റ് സ്വകാര്യ വിവരങ്ങൾ എന്നിവ സ്വയമേവ മറയ്ക്കപ്പെടും. ബാങ്കിംഗ് ആപ്പുകളോ വെബ്‌സൈറ്റുകളോ വഴി ഉപയോക്താക്കളെ കബളിപ്പിച്ച് പണം തട്ടിയെടുക്കാൻ ശ്രമിക്കുന്ന തട്ടിപ്പുകാർക്ക് ഇത് വലിയൊരു തിരിച്ചടിയാകും.

ഇതിനുപുറമെ, ആൻഡ്രോയിഡിലേക്ക് മെച്ചപ്പെട്ട കോൾ-ഫൊർവേഡിംഗ് സുരക്ഷയും വരുന്നുണ്ട്.

കോളുകളും വൺ-ടൈം പാസ്‌കോഡുകളും ചോർത്തുന്നതിനായി തട്ടിപ്പുകാർ ചിലപ്പോൾ ഉപയോക്താക്കളുടെ ഫോണിൽ കോൾ ഫോർവേഡിംഗ് പ്രവർത്തനക്ഷമമാക്കാൻ ശ്രമിക്കാറുണ്ട്. പുതിയ സുരക്ഷ നിലവിൽ വരുന്നതോടെ, പശ്ചാത്തലത്തിൽ നിശബ്ദമായി കോൾ ഫോർവേഡിംഗ് പ്രവർത്തനക്ഷമമാക്കുന്നതിൽ നിന്ന് ആപ്പുകളെ ആൻഡ്രോയിഡ് തടയും.