നേപ്പാളി ബാലന്റെ ഹൃദയത്തുടിപ്പായി മമ്മൂട്ടിയും സി.കെ. ശശീന്ദ്രനും; ജീവൻ തിരികെ നൽകി ‘ഹൃദ്യം’ പദ്ധതി

നഗ്നപാദനായി മണ്ണിലൂടെ നടന്ന് മനുഷ്യന്റെ നോവറിയുന്ന മുൻ എംഎൽഎ സി.കെ. ശശീന്ദ്രൻ തന്റെ വീട്ടിലെ കാലിത്തൊഴുത്തിനരികിൽ ശ്വാസം കിട്ടാതെ കിതച്ചുനിന്ന ഒരു നേപ്പാളി ബാലനിലേക്ക് എത്തിയ കാഴ്ചയാണ് ഇപ്പോൾ ഏറെ ശ്രദ്ധേയമാകുന്നത്.

ബിക്രം എന്നുപേരുള്ള ആ சிறுവന്റെ കൈപിടിച്ച് ശശീന്ദ്രൻ വയനാടൻ ചുരമിറങ്ങി എത്തിയത് പ്രശസ്ത ചലച്ചിത്ര താരം മമ്മൂട്ടിയിലേക്കും, അവിടെനിന്നും ആലുവ രാജഗിരി ആശുപത്രിയിലേക്കുമായിരുന്നു. “ശശീന്ദ്രൻ ഒരുകാര്യം ആവശ്യപ്പെട്ടിട്ടുണ്ടെങ്കിൽ അത് അത്രമേൽ അർഹതയുളളവർക്ക് വേണ്ടി ആയിരിക്കും” എന്ന് മമ്മൂട്ടി കെയർ ആൻഡ് ഷെയർ ഇന്റർനാഷണൽ ഫൗണ്ടേഷൻ ഭാരവാഹികളോട് വ്യക്തമാക്കുകയുണ്ടായി.

മമ്മൂട്ടിയുടെ പ്രത്യേക നിർദ്ദേശപ്രകാരമാണ് കെയർ ആൻഡ് ഷെയർ ഫൗണ്ടേഷനും ആലുവ രാജഗിരി ആശുപത്രിയും സംയുക്തമായി നടപ്പിലാക്കുന്ന ‘ഹൃദ്യം’ പദ്ധതിയിലൂടെ കുട്ടിയുടെ ചികിത്സ സൗജന്യമായി പൂർത്തിയാക്കിയത്. ഹൃദയധമനിയിലെ സുഷിരം കാരണം പഠനം പാതിവഴിയിൽ ഉപേക്ഷിക്കേണ്ടിവന്ന ബിക്രം എല്ലാവിധ ആശങ്കകളും അകന്ന് നിറഞ്ഞ ചിരിയോടെയാണ് കഴിഞ്ഞദിവസം ആശുപത്രി വിട്ടത്.

ഇനിമുതൽ അവന് ജീവിതത്തിൽ കിതപ്പുകളില്ലാതെ മുന്നേറാം. വയനാട്ടിലെ ശശീന്ദ്രന്റെ ഫാമിൽ ജോലിക്കായി എത്തിയ നേപ്പാളി സ്വദേശി ദല്ലോ സൗദിന്റെ മകനാണ് ബിക്രം.

പിതാവിനൊപ്പം മൂന്ന് വർഷം മുമ്പാണ് ഈ കുടുംബം വയനാട്ടിൽ എത്തിയത്. കുടുംബത്തിന്റെ വിശേഷങ്ങൾ അന്വേഷിക്കുന്നതിനിടയിലാണ് സി.കെ.

ശശീന്ദ്രൻ ബിക്രമിന്റെ ഗുരുതരമായ ആരോഗ്യപ്രശ്നങ്ങളെക്കുറിച്ച് അറിയുന്നത്. മിടുക്കനായ വോളിബോൾ കളിക്കാരനായിരുന്നെങ്കിലും കടുത്ത ശ്വാസതടസ്സം കാരണം എട്ടാം ക്ലാസ്സിൽ വച്ച് ബിക്രമിന് പഠനം നിർത്തേണ്ടി വന്നു.

കുട്ടിയുടെയും കുടുംബത്തിന്റെയും അവസ്ഥ മനസ്സിലാക്കിയ ശശീന്ദ്രൻ കോഴിക്കോട് മെഡിക്കൽ കോളജിലെ ഡോക്ടർമാരുമായി ബന്ധപ്പെടുകയായിരുന്നു. അവിടെ നടത്തിയ പരിശോധനയിൽ ബിക്രമിന് ‘പേറ്റന്റ് ഡക്റ്റസ് ആർട്ടീരിയോസസ്’ എന്ന ജന്മനാലുള്ള ഹൃദയവൈകല്യവും ശ്വാസകോശ ധമനിയിൽ ഉയർന്ന രക്തസമ്മർദ്ദവും ഉണ്ടെന്ന് കണ്ടെത്തുകയുണ്ടായി.

തുടക്കത്തിൽ മരുന്നുകൾ നൽകി സ്ഥിതി നിയന്ത്രിച്ചെങ്കിലും പിന്നീട് ശ്വാസംമുട്ടൽ ഗുരുതരമായി മാറി. തുടർന്ന് പിതാവ് ദല്ലോ സഹായം തേടി സി.കെ.

ശശീന്ദ്രനെ ബന്ധപ്പെട്ടു. വയനാട്ടുകാരനായ നടൻ അബു സലിം മുഖേന മമ്മൂട്ടിയുടെ ജീവകാരുണ്യ പ്രസ്ഥാനമായ കെയർ ആൻഡ് ഷെയറിനെക്കുറിച്ച് മനസ്സിലാക്കിയ ശശീന്ദ്രൻ ഇക്കാര്യം മമ്മൂട്ടിയുമായി സംസാരിച്ചു.

എത്രയും പെട്ടെന്ന് കുട്ടിയുടെ ചികിത്സ പൂർണമായും സൗജന്യമായി ചെയ്തുനൽകാൻ മമ്മൂട്ടി ഉടൻതന്നെ കെയർ ആൻഡ് ഷെയർ ഭാരവാഹികൾക്ക് നിർദ്ദേശം നൽകുകയായിരുന്നു. ഇതേതുടർന്നാണ് രാജഗിരി ആശുപത്രിയിൽ ബിക്രമിനായി വിദഗ്ധ ചികിത്സയ്ക്കുള്ള സൗകര്യങ്ങൾ ഒരുക്കിയത്.

ആശുപത്രിയിൽ പ്രവേശിപ്പിക്കപ്പെട്ട ബിക്രമിനെ പീഡിയാട്രിക് കാർഡിയാക് സർജൻ ഡോ.

മുസ്തഫ ജനീൽ പരിശോധിച്ചു. ശ്വാസകോശ ധമനിയിലെ ഉയർന്ന രക്തസമ്മർദ്ദം ശസ്ത്രക്രിയയ്ക്ക് വലിയ വെല്ലുവിളിയായിരുന്നു.

തുടർന്ന് പീഡിയാട്രിക് കാർഡിയോളജിസ്റ്റ് ഡോ. എസ് വെങ്കിടേശ്വരൻ കത്തീറ്റർ കടത്തിയുള്ള താക്കോൽദ്വാര മാതൃകയിലുള്ള ചികിത്സയിലൂടെ ധമനിയിലെ സുഷിരം സുരക്ഷിതമായി അടയ്ക്കുകയായിരുന്നു.

ഈ സങ്കീർണ്ണമായ ചികിത്സയിൽ പീഡിയാട്രിക് കാർഡിയാക് സർജറി കൺസൾട്ടന്റ് ഡോ. പ്രീതി കാഥൽ, പീഡിയാട്രിക് കാർഡിയാക് അനസ്തേഷ്യോളജി കൺസൾട്ടന്റ് ഡോ.

ബിജിന ഭരതൻ കെ എന്നിവരും നിർണ്ണായക പങ്കുവഹിച്ചു. കുട്ടികളിൽ ജന്മനാ ഉണ്ടാകാനിടയുള്ള ഹൃദയതകരാറാണ് ഡോക്ടർമാർ വിജയകരമായി ഭേദമാക്കിയത്.

ഹൃദയത്തോട് ചേർന്നുള്ള പ്രധാന രക്തക്കുഴലിലുണ്ടാകുന്ന ഈ തകരാർ മൂലം ശുദ്ധരക്തവും അശുദ്ധരക്തവും തമ്മിൽ കലരുകയും ശ്വാസകോശത്തിൽ ഉയർന്ന രക്തസമ്മർദ്ദത്തിന് കാരണമാവുകയും ചെയ്യും. നിലവിൽ പൾമണറി ഹൈപ്പർടെൻഷനുള്ള മരുന്നുകൾ മാത്രം തുടരാനാണ് ഡോക്ടർമാരുടെ നിർദ്ദേശം.

ഒരു മാസത്തിന് ശേഷമുള്ള പരിശോധനയ്ക്ക് ശേഷം തുടർനടപടികൾ നിശ്ചയിക്കും. പഠനവും വോളിബോൾ കളിയും സ്വപ്നം കണ്ട് ജീവിതത്തിലേക്ക് തിരികെ നടക്കുകയാണ് ഇപ്പോൾ ബിക്രം.

ഒരാഴ്ച നീണ്ട ആശുപത്രി വാസത്തിനൊടുവിൽ ബിക്രമിനെ തിരികെ വയനാട്ടിലേക്ക് കൂട്ടിക്കൊണ്ടുപോകാൻ സി.കെ.

ശശീന്ദ്രനും ആശുപത്രിയിൽ എത്തിയിരുന്നു. മനുഷ്യർ സൃഷ്ടിക്കുന്ന സകല അതിർത്തികൾക്കും അതീതമാണ് മനുഷ്യത്വമെന്ന് ഈ സംഭവത്തിലൂടെ മമ്മൂട്ടി തെളിയിച്ചിരിക്കുകയാണെന്ന് സി.കെ.

ശശീന്ദ്രൻ അഭിപ്രായപ്പെട്ടു.