പ്രതിരോധ ഗവേഷണ സ്ഥാപനമായ ഡിആർഡിഒ വികസിപ്പിച്ച ഏറ്റവും പുതിയ ‘അഡ്വാൻസ്ഡ് ഹൈ-ആൾട്ടിറ്റ്യൂഡ് പാരച്യൂട്ട്’ പരീക്ഷണം വിജയകരമായി പൂർത്തിയായി. രാജ്യത്തെ ഏറ്റവും ഉയർന്ന ഡ്രോപ്പ് സോണുകളിൽ ഒന്നായ ലഡാക്കിലെ ന്യോമയിലാണ് ഈ നിർണായക പരീക്ഷണം നടന്നത്.
സമുദ്രനിരപ്പിൽ നിന്ന് 16,000 അടി ഉയരത്തിൽ നിന്നായിരുന്നു പാരച്യൂട്ട് ജമ്പ് സംഘടിപ്പിച്ചത്. തുടർന്ന് 15,500 അടി ഉയരത്തിൽ വെച്ച് പാരച്യൂട്ട് വിടരുകയും, സമുദ്രനിരപ്പിൽ നിന്ന് 13,700 അടി ഉയരത്തിലുള്ള ന്യോമ ഡ്രോപ്പ് സോണിൽ സുരക്ഷിതമായി ലാൻഡ് ചെയ്യുകയും ചെയ്തു.
വളരെ കുറവ് ഓക്സിജനുള്ള പ്രതികൂല കാലാവസ്ഥയുമുള്ള ഏറ്റവും ഉയരമുള്ള പ്രദേശങ്ങളിൽ സൈനികരെ സുരക്ഷിതമായി ഇറക്കുന്നതിന് ഈ പാരച്യൂട്ടിന്റെ ശേഷി വിലയിരുത്താനായിരുന്നു ഈ ദൗത്യം. ഏറ്റവും ഉയർന്ന ഇത്തരം പ്രദേശങ്ങളിൽ പാരച്യൂട്ടിൽ പറന്നിറങ്ങുന്നത് ഏറെ അപകടകരമാണ്.
എന്നാൽ കുറഞ്ഞ വേഗതയിൽ ഏറ്റവും സുരക്ഷിതമായി ലാൻഡ് ചെയ്യാനാവും വിധമാണ് ഈ പാരച്യൂട്ട് നിർമിച്ചിരിക്കുന്നത്. സമുദ്രനിരപ്പിൽ നിന്ന് 18,000 അടി വരെയുള്ള ഉയരത്തിൽ മികച്ച രീതിയിൽ പ്രവർത്തിക്കാൻ ഈ പാരച്യൂട്ടിന് സാധിക്കും.
അതിനാൽ തന്നെ ഇന്ത്യൻ പ്രതിരോധ സേനാംഗങ്ങൾക്ക് ഹിമാലയൻ മേഖലകളിൽ ഉപയോഗിക്കാൻ ഇത് ഏറ്റവും അനുയോജ്യമാണ്. ആഗ്ര ആസ്ഥാനമായി പ്രവർത്തിക്കുന്ന എഡിആർഡിഇ ആണ് ഈ പാരച്യൂട്ട് രൂപകൽപ്പന ചെയ്ത് വികസിപ്പിച്ചെടുത്തത്.
പരമ്പരാഗത രീതിയിൽ സൈനികരെ കൂട്ടത്തോടെ വിമാനത്തിൽ നിന്ന് താഴേക്ക് എത്തിക്കുന്നതിനുള്ള സ്റ്റാറ്റിക് ലൈൻ പാരച്യൂട്ട് സംവിധാനമാണിത്. കാൺപൂരിലെ ഓർഡനൻസ് പാരച്യൂട്ട് ഫാക്ടറിയാണ് ഇത് നിർമ്മിച്ചത്.
ഡയറക്ടറേറ്റ് ജനറൽ ഓഫ് എയറോനോട്ടിക്കൽ ക്വാളിറ്റി അഷ്വറൻസ് പരിശോധന പൂർത്തിയാക്കിയ ശേഷമായിരുന്നു പരീക്ഷണം നടത്തിയത്. ഈ പാരച്യൂട്ടിന് സെന്റർ ഫോർ മിലിട്ടറി എയർവർത്തിനെസ് ആൻഡ് സർട്ടിഫിക്കേഷൻ അംഗീകാരം നൽകിയിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
