രാജ്യത്ത് ഇന്ധനവില വർധിപ്പിച്ച് നയാര എനർജി; കൊച്ചിയിൽ പെട്രോളിന് 118.89 രൂപ

രാജ്യത്തെ പ്രമുഖ സ്വകാര്യ ഇന്ധന ചില്ലറ വിൽപ്പനക്കാരായ നയാര എനർജി പെട്രോളിനും ഡീസലിനും വില വർധിപ്പിച്ചു. ലീറ്ററിന് ഒറ്റയടിക്ക് പെട്രോളിന് 5 രൂപയും ഡീസലിന് 3 രൂപയുമാണ് കമ്പനി കൂട്ടിയത്.

ഇന്ധന വിലക്കയറ്റത്തെ തുടർന്ന് കൊച്ചിയിൽ പുതിയ നിരക്കുകൾ നിലവിൽ വന്നു. പുതിയ വർധനയോടെ കൊച്ചിയിൽ പെട്രോൾ വില 118.89 രൂപയായും ഡീസൽ വില 105.50 രൂപയായും ഉയർന്നു.

എന്നാൽ, മറ്റൊരു സ്വകാര്യ ഇന്ധന ദാതാക്കളായ ജിയോ ബിപിയും പൊതുമേഖലാ എണ്ണക്കമ്പനികളും നിലവിൽ ഇന്ധന വില വർധിപ്പിച്ചിട്ടില്ല. പശ്ചിമേഷ്യയിൽ സംഘർഷാവസ്ഥ രൂക്ഷമായതിനെ തുടർന്ന് രാജ്യാന്തര വിപണിയിൽ ക്രൂഡ് ഓയിൽ വില ഉയരുന്നതാണ് ഈ പെട്ടെന്നുള്ള വിലക്കയറ്റത്തിന് കാരണം.

മുൻപ് മാർച്ചിൽ അസംസ്കൃത എണ്ണ വില കൂടിയതിനെ തുടർന്ന് നയാര എനർജി ഇന്ധനവില കൂട്ടിയിരുന്നുവെങ്കിലും പിന്നീട് ക്രൂഡ് വില ഇടിഞ്ഞപ്പോൾ വില കുറച്ചിരുന്നു. കഴിഞ്ഞ മേയ് മാസത്തിൽ പൊതുമേഖലാ എണ്ണക്കമ്പനികൾ പെട്രോളിനും ഡീസലിനും എട്ടു രൂപ വീതം വർധിപ്പിച്ചിരുന്നു.

നിലവിൽ കൊച്ചിയിൽ പൊതുമേഖലാ നിരക്കിൽ പെട്രോളിന് 113.63 രൂപയും ഡീസലിന് 102.54 രൂപയുമാണ് ഉള്ളത്. ഇന്ത്യയിലെ ആകെയുള്ള 1.04 ലക്ഷം പെട്രോൾ പമ്പുകളിൽ 90 ശതമാനവും പൊതുമേഖലാ കമ്പനികളായ ഇന്ത്യൻ ഓയിൽ (ഐഒസി), ഭാരത് പെട്രോളിയം (ബിപിസിഎൽ), ഹിന്ദുസ്ഥാൻ പെട്രോളിയം (എച്ച്പിസിഎൽ) എന്നിവയുടെ നിയന്ത്രണത്തിലാണ്.

അതേസമയം, പെട്രോൾ ലീറ്ററിന് 8 രൂപയുടെയും ഡീസൽ ലീറ്ററിന് 9 രൂപയുടെയും കനത്ത നഷ്ടമാണ് പൊതുമേഖലാ കമ്പനികൾ നേരിടുന്നതെന്ന് റേറ്റിങ് ഏജൻസിയായ ഇക്ര അടുത്തിടെ പുറത്തുവിട്ട റിപ്പോർട്ടിൽ വ്യക്തമാക്കുന്നു.

പെട്രോൾ, ഡീസൽ, എൽപിജി എന്നിവയുടെ വിപണനത്തിലൂടെ മാത്രം പ്രതിദിനം 530 കോടി രൂപയുടെ നഷ്ടമാണ് കമ്പനികൾക്ക് ഉണ്ടാകുന്നത് എന്നും ഇക്ര ചൂണ്ടിക്കാട്ടുന്നു. പൊതുമേഖലാ ഇന്ധന വിലയുടെ ഭാഗമായി തിരുവനന്തപുരത്തെ ഇന്ത്യൻ ഓയിൽ നിരക്കുകൾ താഴെ പറയുന്നതാണ്:
∙ പെട്രോൾ: 115.49 രൂപ
∙ ഡീസൽ: 104.40 രൂപ