മൂന്നാം ഏകദിന മത്സരത്തില്‍ ഇന്ത്യക്കെതിരെ വെസ്റ്റ് ഇന്‍ഡീസിന് അഞ്ച് വിക്കറ്റ് വിജയം. ന്യൂ ഛണ്ഡീഗഡ് പിസിഎ ഇന്റര്‍നാഷണല്‍ ക്രിക്കറ്റ് സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ ഇന്ത്യ ബാറ്റിംഗ് തെരഞ്ഞെടുക്കുകയായിരുന്നു.
നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 351 റണ്‍സാണ് ആതിഥേയരായ ഇന്ത്യ സ്വന്തമാക്കിയത്. ബാറ്റിംഗില്‍ മികച്ച പ്രകടനമാണ് കെ എല്‍ രാഹുല്‍ കാഴ്ചവെച്ചത്.
താരം 87 പന്തില്‍ പുറത്താവാതെ 129 റണ്‍സ് നേടി സെഞ്ചുറി സ്വന്തമാക്കി. രോഹിത് ശര്‍മ 85 പന്തില്‍ 92 റണ്‍സ് നേടി മികച്ച പിന്തുണ നൽകി.
വിന്‍ഡീസിനായി ജയ്ഡന്‍ സീല്‍സ് മൂന്ന് വിക്കറ്റുകള്‍ വീഴ്ത്തി. മറുപടി ബാറ്റിംഗിനിറങ്ങിയ വിന്‍ഡീസ് 48.2 ഓവറില്‍ അഞ്ച് വിക്കറ്റ് നഷ്ടപ്പെടുത്തി ലക്ഷ്യം കണ്ടു.
ഷായ് ഹോപ്പ് പുറത്താവാതെ നേടിയ 162 റണ്‍സിന്റെ (143 പന്തില്‍) സെഞ്ചുറിയാണ് സന്ദർശകരെ വിജയത്തിലേക്ക് നയിച്ചത്. അമീര്‍ ജാംഗൂ (67), കീമോ പോള്‍ (44) എന്നിവരും മികച്ച സംഭാവന നൽകി.
ആദ്യ രണ്ട് മത്സരങ്ങളും വിജയിച്ചതിനാല്‍ ഇന്ത്യ മൂന്ന് മത്സരങ്ങളുടെ പരമ്പര നേരത്തെ തന്നെ സ്വന്തമാക്കിയിരുന്നു. ഹോപ്പിനൊപ്പം ഗുഡകേഷ് മോട്ടി (14 പന്തില്‍ 19) പുറത്താവാതെ നിന്നു.
മൂന്ന് സിക്സും 17 ഫോറും അടങ്ങുന്നതായിരുന്നു ഹോപ്പിന്റെ ഇന്നിംഗ്സ്. ജോണ്‍ ക്യാംപെല്‍ (10), ഷെഫാനെ റുതര്‍ഫോര്‍ഡ് (24), മാത്യൂ ഫോര്‍ഡെ (7) എന്നിവരുടെ വിക്കറ്റുകളാണ് വിന്‍ഡീസിന് നഷ്ടമായത്.
ഇന്ത്യക്ക് വേണ്ടി മുഹമ്മദ് സിറാജ്, ഗുര്‍നൂര്‍ ബ്രാര്‍, കുല്‍ദീപ് യാദവ്, നമന്‍ ധിര്‍ എന്നിവര്‍ ഓരോ വിക്കറ്റ് വീതം വീഴ്ത്തി. തുടക്കത്തില്‍ തന്നെ ഇന്ത്യക്ക് തിരിച്ചടി നേരിട്ടു.
മൂന്നാം ഓവറിലെ മൂന്നാം പന്തില്‍ ശുഭ്മാന്‍ ഗില്‍ (1) വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. തൊട്ടടുത്ത പന്തില്‍ വിരാട് കോഹ്ലിയുടെ (0) മിഡില്‍ സ്റ്റംപും തെറിച്ചു.
പിന്നീട് അഞ്ചാം ഓവറില്‍ രോഹിത് ഒരു എല്‍ബിഡബ്ലൂ റിവ്യൂ അതിജീവിക്കുകയും ചെയ്തു. പതിയെ താളം കണ്ടെത്തിയ രോഹിത് രണ്ട് ബൗണ്ടറികള്‍ പായിച്ച് ആത്മവിശ്വാസം വീണ്ടെടുത്തു.
തുടര്‍ന്ന് രുതുരാജ് ഗെയ്കവാദിനൊപ്പം 137 റണ്‍സ് കൂട്ടിച്ചേര്‍ത്ത ശേഷമാണ് രോഹിത് പുറത്താകുന്നത്. 25-ാം ഓവറില്‍ കീമോ പോളിന്റെ പന്തില്‍ ജൂവല്‍ ആന്‍ഡ്രൂവിന് ക്യാച്ച് സമ്മാനിച്ചാണ് താരം മടങ്ങിയത്.
മൂന്ന് സിക്സും 10 ഫോറും ഉള്‍പ്പെടുന്നതായിരുന്നു രോഹിത്തിന്റെ ഇന്നിംഗ്സ്. വൈകാതെ ഗെയ്കവാദും കൂടാരം കയറി.
57 റണ്‍സെടുത്ത ഗെയ്കവാദ് നാല് സിക്സും ഒരു ഫോറുമാണ് നേടിയത്. ജെയ്ഡന്‍ സീല്‍സിനായിരുന്നു വിക്കറ്റ്.
തുടര്‍ന്നായിരുന്നു രാഹുലിന്റെ മിന്നുന്ന പ്രകടനം. നമന്‍ ധിര്‍ (30), നിതീഷ് കുമാര്‍ റെഡ്ഡി (9), അന്‍ഷൂല്‍ കാംബോജ് (17) എന്നിവരെ കൂട്ടുപിടിച്ച് രാഹുല്‍ ഇന്ത്യയെ മികച്ച സ്‌കോറിലേക്ക് നയിക്കുകയായിരുന്നു.
ഈ ഇന്നിംഗ്‌സിലൂടെ തന്റെ ഉയര്‍ന്ന വ്യക്തിഗത സ്‌കോറാണ് രാഹുല്‍ സ്വന്തമാക്കിയത്. 87 പന്തുകള്‍ മാത്രം നേരിട്ട
താരം ആറ് സിക്സും 10 ഫോറും പായിച്ചു. രണ്ടാം ഏകദിനം കളിച്ച ടീമില്‍ നിന്ന് രണ്ട് മാറ്റങ്ങളോടെയാണ് ഇന്ത്യ കളത്തിലിറങ്ങിയത്.
അക്വിബ് നബി, രവീന്ദ്ര ജഡേജ എന്നിവര്‍ക്ക് പകരം അന്‍ഷൂല്‍ കാംബോജ്, മുഹമ്മദ് സിറാജ് എന്നിവരെ ടീമില്‍ ഉള്‍പ്പെടുത്തി. ഇരു ടീമുകളുടെയും പ്ലേയിംഗ് ഇലവന്‍: ഇന്ത്യ: രോഹിത് ശര്‍മ്മ, ശുഭ്മാന്‍ ഗില്‍ (ക്യാപ്റ്റന്‍), വിരാട് കോഹ്ലി, റിതുരാജ് ഗെയ്ക്വാദ്, കെ എല്‍ രാഹുല്‍ (വിക്കറ്റ് കീപ്പര്‍), നിതീഷ് കുമാര്‍ റെഡ്ഡി, നമന്‍ ധീര്‍, അന്‍ഷുല്‍ കാംബോജ്, കുല്‍ദീപ് യാദവ്, മൊഹമ്മദ് സിറാജ്, ഗുര്‍നൂര്‍ ബ്രാര്‍.
വെസ്റ്റ് ഇന്‍ഡീസ്: ജോണ്‍ കാമ്പ്യൂവല്‍, ജൂവല്‍ ആന്‍ഡ്രൂ, ഷായ് ഹോപ്പ് (ക്യാപ്റ്റന്‍ / വിക്കറ്റ് കീപ്പര്‍), അമീര്‍ ജാന്‍ഗു, ഷെര്‍ഫെയ്ന്‍ റുഥര്‍ഫോര്‍ഡ്, കീമോ പോള്‍, മാത്യു ഫോര്‍ഡ്, അല്‍സാരി ജോസഫ്, ഗുഡാകേഷ് മോട്ടി, ജെയ്ഡന്‍ സീല്‍സ്, വിദെല്‍ ലോസ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
