ക്രോമിന് പകരക്കാരനായി വിവോൾഡി; ബ്രൗസർ ഉപയോഗം മാറ്റിയെഴുതിയ ഫീച്ചറുകൾ

കാലങ്ങളായി ക്രോം ബ്രൗസർ ഉപയോഗിച്ചു പോന്ന ഒരാൾക്ക് അതിന്റെ പ്രവർത്തനരീതികളിൽ വലിയ അത്ഭുതങ്ങൾ ഒന്നും തോന്നിയിട്ടുണ്ടാകില്ല. ടാബുകൾ ക്രമീകരിക്കാനോ പേജുകൾക്കിടയിൽ മാറാനോ ഒക്കെ ക്രോം നൽകുന്ന സൗകര്യങ്ങൾ മാത്രമായിരുന്നു ആശ്രയം.

എന്നാൽ വിവാൾഡി ബ്രൗസർ പരീക്ഷിച്ചപ്പോൾ ചെറിയ ബുദ്ധിമുട്ടുകൾ പോലും എത്ര ലളിതമായാണ് അത് പരിഹരിക്കുന്നതെന്ന് വ്യക്തമായി. ടാബുകൾ, സൈഡ്ബാർ, കുറുക്കുവഴികൾ, സ്വകാര്യത ക്രമീകരണങ്ങൾ എന്നിവയിലെല്ലാം ഉപയോക്താവിന് പൂർണ്ണ നിയന്ത്രണം നൽകാൻ ഇതിനാകുന്നുണ്ട്.

ക്രോമിൽ നമ്മൾ അനുഭവിച്ചിരുന്ന പല പരിമിതികളെയും ചോദ്യം ചെയ്യുന്ന സവിശേഷതകളാണ് ഇതിലുള്ളത്. എക്സ്റ്റൻഷനുകളുടെ സഹായമില്ലാതെ തന്നെ മികച്ച സ്വകാര്യത ഉറപ്പാക്കാൻ വിവാൾഡിയിൽ സംവിധാനമുണ്ട്.

പരസ്യങ്ങളും ട്രാക്കിംഗും തടയാനുള്ള സംവിധാനങ്ങൾ ക്രോമിലുണ്ടെങ്കിലും അതിനായി സാധാരണയായി എക്സ്റ്റൻഷനുകൾ ആവശ്യമായി വരാറുണ്ട്. എന്നാൽ വിവാൾഡിയിൽ ഈ ഫീച്ചർ നേരിട്ട് ഉൾപ്പെടുത്തിയിരിക്കുന്നു.

Settings > Privacy and Security > Tracker and Ad Blocking വഴി ട്രാക്കറുകളോ പരസ്യങ്ങളോ ബ്ലോക്ക് ചെയ്യണോ എന്ന് തീരുമാനിക്കാം. അറിയപ്പെടുന്ന ട്രാക്കർ യുആർഎൽ ലിസ്റ്റുകൾ ഉപയോഗിച്ചാണ് ഇത് പ്രവർത്തിക്കുന്നത്.

വിലാസ ബാറിന് സമീപമുള്ള ഷീൽഡ് ഐക്കണിൽ ക്ലിക്ക് ചെയ്ത് വ്യക്തിഗത വെബ്‌സൈറ്റുകളുടെ ബ്ലോക്കിംഗ് ലെവൽ മാറ്റാനും സാധിക്കും. കുക്കി-വാണിംഗ് ബാനറുകൾ ഒഴിവാക്കാൻ ഇതേ സിസ്റ്റം ഉപയോഗിക്കാം.

പല പോപ്പ്-അപ്പുകളും മറയ്ക്കുന്ന ബ്ലോക്കിംഗ് ലിസ്റ്റുകൾ വിവാൾഡിയിൽ ലഭ്യമാണ്. Settings വഴി കുക്കി-വാണിംഗ് ലിസ്റ്റുകൾ പ്രവർത്തനക്ഷമമാക്കാം.

വെബ്‌സൈറ്റുകൾ ശരിയായി പ്രവർത്തിക്കാത്ത പക്ഷം ഇവ ഓഫ് ചെയ്യാനും സാധിക്കും. അധിക ടൂളുകളുടെ സഹായമില്ലാതെ തന്നെ വെബ്‌സൈറ്റ് സ്ക്രീൻഷോട്ടുകൾ എടുക്കാൻ ‘ക്യാപ്ചർ’ ടൂൾ സഹായിക്കുന്നു.

സ്റ്റാറ്റസ് ബാറിലെ ക്യാമറ ഐക്കൺ ക്ലിക്ക് ചെയ്ത് മുഴുവൻ വെബ് പേജോ തിരഞ്ഞെടുക്കുന്ന ഭാഗമോ കോപ്പി ചെയ്യാം. ചിത്രമായി സേവ് ചെയ്യുകയോ പേജ് യുആർഎൽ സഹിതം നോട്ടായി സൂക്ഷിക്കുകയോ ചെയ്യാം.

കൂടാതെ, കൃത്യമായ ഇടവേളകളിൽ സ്വയം റിഫ്രഷ് ആകാത്ത പേജുകൾക്കായി ‘പീരിയോഡിക് റീലോഡ്’ ഫീച്ചറുമുണ്ട്. ഒരു ടാബിൽ റൈറ്റ് ക്ലിക്ക് ചെയ്ത് ഒന്നിനും തൊണ്ണൂറിനും ഇടയിലുള്ള മിനിറ്റുകൾ തിരഞ്ഞെടുക്കാം.

അടുത്ത റിഫ്രഷ് എപ്പോഴാണെന്ന് കാണിക്കാൻ ടാബിൽ കൗണ്ട്ഡൗൺ തെളിയും. Settings > Mouse > Gestures വഴി മൗസ് ജെസ്റ്ററുകൾ പ്രവർത്തനക്ഷമമാക്കിയാൽ, മൗസിന്റെ റൈറ്റ് ബട്ടൺ ഉപയോഗിച്ച് വിവിധ ആക്ഷനുകൾ ചെയ്യാം.

ക്രോമിന്റെ ടാബ് ഗ്രൂപ്പുകളേക്കാൾ മികച്ചതാണ് വിവാൾഡിയുടെ ‘ടാബ് സ്റ്റാക്കുകൾ’. ഒരു ടാബ് മറ്റൊന്നിലേക്ക് ഡ്രാഗ് ചെയ്ത് ടാബ് സ്റ്റാക്ക് ഉണ്ടാക്കാം.

‘Research’ അല്ലെങ്കിൽ ‘Shopping’ എന്നിങ്ങനെ പേരിടാനും കളർ നൽകാനും സാധിക്കും. Workspaces ഫീച്ചറിലൂടെ ഔദ്യോഗിക ആവശ്യങ്ങൾക്കും വ്യക്തിഗത ബ്രൗസിംഗിനുമായി പ്രത്യേക സ്പേസുകൾ നിർമ്മിക്കാം.

സ്വിച്ച് ചെയ്യുമ്പോൾ ആ വർക്ക്സ്പേസിലെ ടാബുകൾ മാത്രമേ കാണാൻ സാധിക്കൂ. ആവശ്യമുള്ള ടാബുകൾ സെലക്ട് ചെയ്ത് വെർട്ടിക്കലായും ഹൊറിസോണ്ടലായും ടൈൽ ചെയ്യാനും കഴിയും.

F2 അമർത്തിയാൽ തുറക്കുന്ന ‘ക്വിക്ക് കമാൻഡ്സ്’ വഴി ഓപ്പൺ ചെയ്ത ടാബും ബുക്ക്മാർക്കും പെട്ടെന്ന് കണ്ടെത്താം. Command Chains ഉപയോഗിച്ച് ഒന്നിലധികം ബ്രൗസർ ആക്ഷനുകൾ ഒരുമിച്ച് ചേർക്കാം.

ആൻഡ്രോയിഡിൽ എക്സ്റ്റൻഷനുകൾ ഇൻസ്റ്റാൾ ചെയ്യാൻ സാധിക്കില്ലെന്ന ക്രോമിന്റെ പോരായ്മയ്ക്ക് വിവാൾഡിയുടെ ആൻഡ്രോയിഡ് ആപ്പ് പതിപ്പ് 8.2 പരിഹാരം കാണുന്നുണ്ട്. വിലാസ ബാറിലെ പസിൽ-പീസ് ഐക്കണിൽ ടാപ്പ് ചെയ്ത് ക്രോം വെബ് സ്റ്റോറിൽ നിന്ന് എക്സ്റ്റൻഷനുകൾ ചേർക്കാം.

ബ്രൗസിംഗ് അനുഭവം കൂടുതൽ മികച്ചതാക്കാൻ ആഗ്രഹിക്കുന്നവർക്ക് വിവാൾഡി ഒരു പുതിയ അനുഭവം നൽകും.