ഇടുക്കി മുസ്ലിം ലീഗ് പാർലമെന്ററി പാർട്ടി യോഗത്തിൽ കയ്യാങ്കളിയും പ്രതിഷേധവും; ജില്ലാ പ്രസിഡന്റ് തടഞ്ഞുവച്ചു

തൊടുപുഴ നഗരസഭയിലെ അഴിമതി ആരോപണവുമായി ബന്ധപ്പെട്ട ചർച്ചയെ തുടർന്ന് ഇടുക്കി മുസ്ലിം ലീഗ് പാർലമെന്ററി പാർട്ടി യോഗത്തിൽ കയ്യാങ്കളി.

മുസ്ലിം ലീഗ് ജില്ലാ പ്രസിഡന്റ് കെ.എം.എ. ഷുക്കൂറിനെ ഒരു വിഭാഗം പ്രവർത്തകർ യോഗസ്ഥലത്ത് തടഞ്ഞുവച്ചു.

നഗരസഭ കൗൺസിൽ യോഗത്തിൽ ചെയർപഴ്സനെതിരെ കൃത്യമായ തെളിവുകൾ ഹാജരാക്കാതെ അഴിമതി ആരോപണം ഉന്നയിച്ച ലീഗ് കൗൺസിലറും മുൻ ചെയർപഴ്സനുമായ സഫിയ ജബ്ബാറിനെ പാർട്ടിയിൽ നിന്നും പുറത്താക്കണമെന്ന് ആവശ്യപ്പെട്ടായിരുന്നു പ്രതിഷേധം ശക്തമായത്. സഫിയ ജബ്ബാർ ഉന്നയിച്ച ആരോപണങ്ങൾക്ക് പിന്നിൽ വ്യക്തമായ തെളിവുകൾ വേണമെന്ന് ആവശ്യപ്പെട്ട് പ്രവർത്തകർ രംഗത്തെത്തുകയായിരുന്നു.

സഫിയ ജബ്ബാറിനെതിരെ അടിയന്തര നടപടി സ്വീകരിക്കാതെ ജില്ലാ പ്രസിഡന്റിനെ പുറത്തുവിടില്ലെന്ന് വ്യക്തമാക്കി ഒരു വിഭാഗം നേതാക്കളും കൗൺസിലർമാരും പ്രതിഷേധം കടുപ്പിച്ചു. സംഘർഷാവസ്ഥ മൂർച്ഛിക്കുകയും കടുത്ത വാക്കുതർക്കങ്ങളിലേക്ക് കാര്യങ്ങൾ നീങ്ങുകയും ചെയ്തതോടെ, കൈക്കൂലി ആരോപണം ഉന്നയിച്ച സഫിയ ജബ്ബാറിനെതിരെ കർശന നടപടി സ്വീകരിക്കാൻ പാർട്ടി സംസ്ഥാന കമ്മിറ്റിക്ക് ശുപാർശ ചെയ്യാമെന്ന് ജില്ലാ പ്രസിഡന്റ് ഉറപ്പുനൽകി.

ഇതേത്തുടർന്നാണ് പ്രതിഷേധം അവസാനിച്ചത്. നഗരസഭയിലെ പുതിയ ആരോപണങ്ങൾ സമഗ്രമായി അന്വേഷിക്കുന്നതിനായി പ്രത്യേകമായി മൂന്നംഗ സമിതിയെയും നിയോഗിച്ചിട്ടുണ്ട്.

ഇടുക്കി ജില്ലയിൽ കഴിഞ്ഞ കുറെ കാലങ്ങളായി മുസ്ലിം ലീഗ് രണ്ട് വ്യത്യസ്ത വിഭാഗങ്ങളായാണ് പ്രവർത്തിക്കുന്നത്. ഇതിന്റെ തുടർച്ചയെന്നോണം, രണ്ട് മാസം മുൻപ് പാർട്ടി സംസ്ഥാന വൈസ് പ്രസിഡന്റ് ടി.എം.

സലിമിനെ കോടിക്കുളത്ത് വെച്ച് ഒരു വിഭാഗം നേതാക്കൾ വഴിയിൽ തടഞ്ഞിരുന്നു. ഈ സംഭവുമായി ബന്ധപ്പെട്ട് ചില യൂത്ത് ലീഗ് പ്രവർത്തകരെ സസ്പെൻഡ് ചെയ്തിരുന്നു.

ഇവരുടെ സസ്പെൻഷൻ പിൻവലിക്കണമെന്ന് ആവശ്യപ്പെട്ട് അടുത്തിടെ ഇടുക്കിയിൽ ചേർന്ന ലീഗ് ജില്ലാ കമ്മിറ്റി യോഗത്തിലും സമാനമായ രീതിയിൽ സംഘർഷം ഉണ്ടായിരുന്നു. അന്നത്തെ യോഗം നടപടികൾ പൂർത്തിയാക്കാതെ പിരിച്ചുവിടേണ്ടി വരികയും ചെയ്തിരുന്നു.