യുഎൻ പൊതുസഭയിൽ നാടകീയ രംഗങ്ങൾ; നെതന്യാഹുവിന്റെ പ്രസംഗത്തിനിടെ നയതന്ത്ര പ്രതിനിധികൾ ഇറങ്ങിപ്പോയി

ഐക്യരാഷ്ട്രസഭയുടെ പൊതുസഭയിൽ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പ്രസംഗത്തിനിടെ വലിയ തോതിലുള്ള പ്രതിഷേധങ്ങളും നാടകീയ സംഭവങ്ങളുമാണ് അരങ്ങേറിയത്. അദ്ദേഹം പ്രസംഗത്തിനായി പോഡിയത്തിലെത്തിയ ഉടൻ തന്നെ ഡസൻകണക്കിന് നയതന്ത്ര പ്രതിനിധികൾ പ്രതിഷേധസൂചകമായി വേദിയിൽനിന്ന് ഇറങ്ങിപ്പോവുകയായിരുന്നു.

പ്രതിനിധികൾ സഭ വിട്ടുപോയതിനെ തുടർന്ന് നെതന്യാഹുവിനെ അനുകൂലിക്കുന്ന വിഭാഗം അദ്ദേഹത്തിന് പിന്തുണയർപ്പിച്ച് മുദ്രാവാക്യങ്ങൾ മുഴക്കി. ഹാളിൽനിന്ന് ഇറങ്ങിപ്പോയി പ്രതിഷേധിച്ചവരെ അതിരൂക്ഷമായ ഭാഷയിലാണ് ഇസ്രയേൽ പ്രധാനമന്ത്രി വിമർശിച്ചത്.

അവരെ ഭീരുക്കളെന്ന് വിശേഷിപ്പിച്ച അദ്ദേഹം, ഇനിയും പുറത്തുപോകാത്ത ഏതെങ്കിലും ഭീരുക്കൾ ഹാളിൽ അവശേഷിക്കുന്നുണ്ടെങ്കിൽ അവരും ദയവായി ഇപ്പോൾ തന്നെ പുറത്തുപോകണമെന്നും ആവശ്യപ്പെട്ടു. ഇസ്രയേലിൽ പൊതുതെരഞ്ഞെടുപ്പിന് അഞ്ചാഴ്ച മാത്രം ബാക്കിനിൽക്കെ, ഒരു തെരഞ്ഞെടുപ്പ് പ്രചാരണത്തിന്റെ പ്രതീതി ജനിപ്പിക്കുന്നതായിരുന്നു അദ്ദേഹത്തിന്റെ പ്രസംഗം.

ഏകദേശം 40 മിനിറ്റ് നീണ്ടുനിന്ന പ്രസംഗത്തിൽ ന്യൂയോർക്ക് മേയർ സൊഹ്റാൻ മംദാനിക്കെതിരേയും ഖത്തർ, തുർക്കി തുടങ്ങിയ രാജ്യങ്ങൾക്കെതിരേയും കടുത്ത വിമർശനങ്ങളാണ് ഉന്നയിച്ചത്. ‘ഞാൻ ഇവിടെവരുന്നതിൽനിന്ന് തടയാൻ നിങ്ങൾ ശ്രമിച്ചു, എന്നെ നിശബ്ദനാക്കാൻ നിങ്ങൾ ശ്രമിച്ചു.

പക്ഷേ, നിങ്ങൾക്ക് എന്നെ നിശബ്ദനാക്കാൻ കഴിയില്ല, നിങ്ങൾക്ക് സത്യത്തെ നിശബ്ദമാക്കാനാകില്ല’ എന്ന് മംദാനിയെ ലക്ഷ്യമിട്ട് അദ്ദേഹം പറഞ്ഞു. ഇസ്രയേൽ വംശഹത്യ നടത്തിയിട്ടില്ലെന്നും മറിച്ച് വംശഹത്യ തടയുകയാണ് ചെയ്തതെന്നും അദ്ദേഹം വ്യക്തമാക്കി.

ന്യൂയോർക്ക് മേയർ ഹമാസ് തീവ്രവാദികളെ പിന്തുണയ്ക്കുന്ന വ്യക്തിയാണെന്നും പ്രസംഗത്തിൽ ആരോപണമുയർന്നു. അതേസമയം, നെതന്യാഹുവിന്റെ പ്രസംഗത്തിന് പിന്നാലെ ശക്തമായ മറുപടിയുമായി സൊഹ്റാൻ മംദാനിയും രംഗത്തുവന്നു.

പലസ്തീനികൾക്കെതിരായ വംശഹത്യ ന്യായീകരിക്കാനായി പലതവണ ചെയ്തതുപോലെ അടിസ്ഥാനരഹിതമായ കാര്യങ്ങൾ ആവർത്തിക്കുകയാണ് നെതന്യാഹു ചെയ്തതെന്ന് അദ്ദേഹം പ്രതികരിച്ചു. യുദ്ധക്കുറ്റങ്ങളിൽ അന്താരാഷ്ട്ര ക്രിമിനൽ കോടതി പുറപ്പെടുവിച്ച അറസ്റ്റ് വാറന്റിന് വിധേയനാണ് അദ്ദേഹമെന്നും, എത്ര നുണകൾ പ്രചരിപ്പിച്ചാലും ഈ വസ്തുതകളെ മാറ്റാനാകില്ലെന്നും മംദാനി കൂട്ടിച്ചേർത്തു.

യുഎൻ പൊതുസഭയിൽ പങ്കെടുക്കാനെത്തിയ ഇസ്രയേൽ പ്രധാനമന്ത്ിക്കെതിരേ യുഎൻ ആസ്ഥാനത്തിന് പുറത്തും വൻ പ്രതിഷേധ പ്രകടനങ്ങളാണ് നടന്നത്. ആസ്ഥാനത്തിന് പുറത്ത് ഗതാഗതം തടസ്സപ്പെടുത്തിക്കൊണ്ട് നെതന്യാഹുവിനെതിരെ മുദ്രാവാക്യം മുഴക്കിയ നൂറുകണക്കിന് ആളുകളെ പൊലീസ് അറസ്റ്റ് ചെയ്ത് നീക്കി.

ഇസ്രയേലിൽ പൊതുതെരഞ്ഞെടുപ്പ് നടക്കാൻ ആഴ്ചകൾ മാത്രം ബാക്കിനിൽക്കുന്ന ഘട്ടത്തിലാണ് ഈ സംഭവങ്ങൾ. നെതന്യാഹുവിന്റെ പ്രസംഗം ഇസ്രയേലിലെ പ്രമുഖ ടെലിവിഷൻ ചാനലുകൾ എല്ലാം തന്നെ തത്സമയം സംപ്രേഷണം ചെയ്തിരുന്നു.

യുഎസിലേക്ക് എത്തുന്നതിന് മുൻപ് തന്നെ അദ്ദേഹത്തിന്റെ സർക്കാരിനെ പിന്തുണച്ചുകൊണ്ട് നിരവധി പരസ്യബോർഡുകൾ അമേരിക്കയിൽ സ്ഥാപിച്ചിരുന്നു. അടുത്തിടെ നടന്ന അഭിപ്രായ സർവേകളിൽ നെതന്യാഹുവിന് ഭരണം നഷ്ടപ്പെടുമെന്ന സൂചനകളുള്ളതിനാൽ, ഈ യുഎൻ പ്രസംഗം ഇസ്രയേൽ രാഷ്ട്രീയത്തിൽ അതീവ നിർണായകമായാണ് വിലയിരുത്തപ്പെടുന്നത്.