പതിനൊന്ന് വർഷത്തിന് ശേഷം ചൈനീസ് പ്രസിഡന്റ് ഷി ജിൻപിങ് അമേരിക്കയിൽ; ജോയിന്റ് ബേസ് ആൻഡ്രൂസ് വിമാനത്താവളത്തിൽ ഊഷ്മള വരവേൽപ്പ്

നീണ്ട പതിനൊന്ന് വർഷത്തെ ഇടവേളയ്ക്ക് ശേഷമുള്ള ചൈനീസ് പ്രസിഡന്റ് ഷി ജിൻപിങിന്റെ അമേരിക്കൻ സന്ദർശനത്തിന് തുടക്കമായി.

വാഷിംഗ്ടണിലെ ജോയിന്റ് ബേസ് ആൻഡ്രൂസ് വിമാനത്താവളത്തിൽ ചൈനീസ് ഭരണാധികാരിക്ക് അങ്ങേയറ്റം ആവേശകരമായ സ്വീകരണമാണ് ലഭിച്ചത്. അമേരിക്കൻ പ്രസിഡന്റ് ഡോണൾഡ് ട്രംപും പ്രഥമ വനിത മെലാനിയ ട്രംപും നേരിട്ടെത്തിയാണ് ഷി ജിൻപിങിനെയും പത്നി പെങ് ലിയുവാനെയും റെഡ് കാർപെറ്റ് നൽകി സ്വീകരിച്ചത്.

മൂന്ന് ദിവസത്തെ ഔദ്യോഗിക സന്ദർശനത്തിനായി എത്തിച്ചേർന്ന ചൈനീസ് പ്രസിഡന്റിന് സൈനിക ബഹുമതികളും ഫ്ലൈപാസ്റ്റും ഉൾപ്പെടെയുള്ള രാജകീയ വരവേൽപ്പാണ് അമേരിക്കൻ ഭരണകൂടം ഒരുക്കിയത്. വിമാനത്താവളത്തിൽ നേരിട്ടെത്തി അതിഥിയെ സ്വീകരിച്ചത് ചൈനീസ് നേതൃത്വത്തോടുള്ള ആദരവിന്റെ ഭാഗമായാണെന്ന് വൈറ്റ് ഹൗസ് വ്യക്തമാക്കി.

സന്ദർശനത്തിന്റെ ഭാഗമായി വാഷിംഗ്ടണിൽ നടക്കുന്ന നിർണായക ഉഭയകക്ഷി ചർച്ചകളിൽ വ്യാപാര കരാറുകൾക്ക് പുറമെ ഇറാൻ യുദ്ധം, തായ്‌വാൻ വിഷയം, ആർട്ടിഫിഷ്യൽ ഇന്റലിജൻസ്, വ്യാപാരതീരുവകൾ തുടങ്ങിയ സുപ്രധാന വിഷയങ്ങൾ ചർച്ചയാകും. പ്രത്യേകിച്ചും, ഈ വർഷം കാലാവധി അവസാനിക്കുന്ന അമേരിക്ക-ചൈന വ്യാപാരക്കരാർ നീട്ടുന്നത് സംബന്ധിച്ച ചർച്ചകൾക്ക് ആഗോളതലത്തിൽ വലിയ പ്രാധാന്യമാണുള്ളത്.

വൈറ്റ് ഹൗസിൽ ഒരുക്കുന്ന ഔദ്യോഗിക വിരുന്നിന് പുറമെ ഇരു രാഷ്ട്രതലവൻമാരും തമ്മിൽ നടക്കുന്ന ദീർഘനേരത്തെ കൂടിക്കാഴ്ച ലോക സാമ്പത്തിക, നയതന്ത്ര മേഖലകളിൽ വലിയ മാറ്റങ്ങൾക്ക് വഴിവെക്കുമെന്നാണ് വിലയിരുത്തപ്പെടുന്നത്.