സംസ്ഥാനത്തെ വൈദ്യുതി പ്രതിസന്ധി: മുഖ്യമന്ത്രിയുടെ നേതൃത്വത്തിൽ നിർണായക യോഗം ഇന്ന്

സംസ്ഥാനത്ത് രൂപപ്പെട്ടിരിക്കുന്ന രൂക്ഷമായ വൈദ്യുതി പ്രതിസന്ധിക്ക് ശാശ്വത പരിഹാരം കാണുന്നതിനായി മുഖ്യമന്ത്രിയുടെ അധ്യക്ഷതയിൽ നിർണായകമായ വിശാല യോഗം ഇന്ന് ചേരുന്നു. വരുന്ന ഒക്ടോബർ മാസം മുതൽ സംസ്ഥാനത്ത് വൈദ്യുതി തടസ്സങ്ങളും നിയന്ത്രണങ്ങളും പൂർണ്ണമായും ഒഴിവാക്കുന്നതിനുള്ള ബദൽ മാർഗങ്ങൾ യോഗം പ്രധാനമായി ചർച്ച ചെയ്യും.

ഇതിന്റെ ഭാഗമായി ദീർഘകാല വൈദ്യുതി കരാറുകൾ ഏർപ്പെടുത്തുന്നത് സംബന്ധിച്ചും യോഗത്തിൽ അന്തിമ തീരുമാനമുണ്ടാകും. അതേസമയം, നിലവിലെ പ്രതിസന്ധി തരണം ചെയ്യുന്നതിന്റെ ഭാഗമായി സ്വകാര്യ കമ്പനിയിൽ നിന്നും യൂണിറ്റിന് 11 രൂപ നിരക്കിൽ 200 മെഗാവാട്ട് വൈദ്യുതി വാങ്ങുന്നതിന് സർക്കാർ അനുമതി നൽകിയിട്ടുണ്ട്.

റെഗുലേറ്ററി കമ്മീഷന്റെ മുൻകൂർ അനുമതി ലഭിക്കുന്നതിന് മുമ്പ് തന്നെ വൈദ്യുതി വാങ്ങാൻ തീരുമാനിച്ചത് നിലവിലെ സവിശേഷ സാഹചര്യങ്ങൾ കണക്കിലെടുത്താണ്. വൈദ്യുതി പ്രതിസന്ധി മുൻകൂട്ടി കണ്ട് ആവശ്യമായ ആസൂത്രണം നടത്തുന്നതിൽ വീഴ്ച സംഭവിച്ചതായി മുഖ്യമന്ത്രി കഴിഞ്ഞ ദിവസം വാർത്താസമ്മേളനത്തിൽ വ്യക്തമാക്കുകയുണ്ടായി.

ഒരാഴ്ചയ്ക്കകം സ്ഥിതിഗതികൾ സാധാരണ നിലയിലാകുമെന്നായിരുന്നു കഴിഞ്ഞ ആഴ്ച മുഖ്യമന്ത്രി അറിയിച്ചിരുന്നതെങ്കിലും സംസ്ഥാനത്ത് ഇപ്പോഴും വൈദ്യുതി നിയന്ത്രണം തുടരുകയാണ്. സർക്കാരിനെ പ്രതിരോധത്തിലാക്കിയ വൈദ്യുതി പ്രതിസന്ധിയുടെ പേരിൽ മുൻ സർക്കാരുകളെ കുറ്റപ്പെടുത്തുന്ന സമീപനം മുഖ്യമന്ത്രി ഇത്തവണയും ആവർത്തിച്ചു.

യു.ഡി.എഫ് കാലത്തെ ദീർഘകാല കരാറുകൾ സർക്കാരിന് സാമ്പത്തിക നഷ്ടമുണ്ടാക്കിയെന്ന വിജിലൻസ് കണ്ടെത്തലുകൾ പുറത്തുവന്നിട്ടുണ്ടെങ്കിലും, എൽ.ഡി.എഫ് സർക്കാരിന്റെ കാലത്ത് 465 മെഗാവാട്ടിന്റെ കരാർ റദ്ദാക്കിയത് വലിയ വീഴ്ചയായിപ്പോയെന്ന വിമർശനം ശക്തമായി തുടരുന്നുണ്ട്. സെപ്റ്റംബർ മാസത്തിലുണ്ടായേക്കാവുന്ന വലിയ തോതിലുള്ള വൈദ്യുതി ഉപഭോഗം മുൻകൂട്ടി കണ്ട് ആസൂത്രണം ചെയ്യാൻ സാധിച്ചില്ലെന്ന് മുഖ്യമന്ത്രി സമ്മതിച്ചതും ഇതിനോടൊപ്പം ചേർത്തു വായിക്കേണ്ടതുണ്ട്.

നിലവിൽ ഇന്ത്യയിൽ ഒട്ടുമിക്ക സ്ഥലങ്ങളിലും പവർകട്ട് നിലവിലുണ്ടെന്നും പുറത്തുനിന്ന് അധിക വൈദ്യുതി ലഭ്യമാക്കാൻ ബുദ്ധിമുട്ടാണെന്നും സതീശൻ വ്യക്തമാക്കിയിട്ടുണ്ട്.