മലയാള സിനിമയിലും നാടകവേദിയിലും തന്റേതായ വ്യക്തിമുദ്ര പതിപ്പിച്ച പ്രശസ്ത നടി സാവിത്രി ശ്രീധരൻ അന്തരിച്ചു. വാർദ്ധക്യ സഹജമായ അസുഖങ്ങളെത്തുടർന്ന് ഏറെ നാളായി ചികിത്സയിലായിരുന്ന താരം, കോഴിക്കോട് തിരുവള്ളൂരിലെ സ്വവസതിയിൽ വെച്ചാണ് അന്തരിച്ചത്.
അറുപതുകളിലാണ് സാവിത്രി ശ്രീധരൻ തന്റെ അഭിനയജീവിതത്തിന് തുടക്കം കുറിക്കുന്നത്. കാരാ യുവജന കലാസമിതിയിലൂടെ അരങ്ങിലെത്തിയ അവർ, പ്രശസ്ത നാടകകൃത്ത് കെ ടി മുഹമ്മദിന്റെ നിരവധി നാടകങ്ങളിൽ ശ്രദ്ധേയമായ വേഷങ്ങൾ കൈകാര്യം ചെയ്തു.
നാടകരംഗത്തെ മികവിന് സംഗീത നാടക അക്കാദമി പുരസ്കാരവും അവരെ തേടിയെത്തിയിരുന്നു. 1991-ൽ എം ടി വാസുദേവൻ നായരുടെ സംവിധാനത്തിൽ പുറത്തിറങ്ങിയ ‘കടവ്’ എന്ന ചിത്രത്തിലൂടെയാണ് അവർ ചലച്ചിത്ര രംഗത്ത് അരങ്ങേറ്റം കുറിക്കുന്നത്.
എങ്കിലും, ഏറെ കാലത്തിന് ശേഷം ‘സുഡാനി ഫ്രം നൈജീരിയ’ എന്ന ചിത്രത്തിലെ ‘ജമീല ഉമ്മ’ എന്ന കഥാപാത്രമാണ് ഇവരെ മലയാളികളുടെ പ്രിയങ്കരിയാക്കിയത്. ഈ ചിത്രത്തിലെ അഭിനയത്തിലൂടെ മികച്ച സ്വഭാവ നടിക്കുള്ള സംസ്ഥാന ചലച്ചിത്ര പുരസ്കാരവും ദേശീയ ചലച്ചിത്ര പുരസ്കാരത്തിൽ പ്രത്യേക ജൂറി പരാമർശവും സാവിത്രി ശ്രീധരൻ സ്വന്തമാക്കി.
ഡാകിനി, ക്രിസ്റ്റി, വൈറസ്, പാപ്പൻ, പട തുടങ്ങിയ ചിത്രങ്ങളിലും അവർ മികച്ച വേഷങ്ങൾ കൈകാര്യം ചെയ്തിട്ടുണ്ട്.
