സി. അച്യുതമേനോൻ സർക്കാർ കമ്യൂണിസ്റ്റ് നേതൃത്വത്തിലുള്ളതായിരുന്നു: പന്ന്യൻ രവീന്ദ്രൻ

തുടർച്ചയായി അധികാരത്തിലിരിക്കുമ്പോൾ ജനക്ഷേമ പ്രവർത്തനങ്ങൾ നടപ്പിലാക്കിയാൽ ജനം വീണ്ടും വിജയിപ്പിക്കുമെന്ന് തെളിയിച്ച ഭരണകൂടമായിരുന്നു സി. അച്യുതമേനോന്റെ നേതൃത്വത്തിലുള്ളതെന്ന് മുതിർന്ന സിപിഐ നേതാവ് പന്ന്യൻ രവീന്ദ്രൻ വ്യക്തമാക്കി.

കമ്യൂണിസ്റ്റ് മുഖ്യമന്ത്രിയായ അച്യുതമേനോന്റേതു കമ്യൂണിസ്റ്റ് നേതൃത്വത്തിലുള്ള സർക്കാർ അല്ലാതെ പിന്നെ എന്തു സർക്കാരാണെന്ന് അദ്ദേഹം ചോദിച്ചു. വികലമായ ധാരണകളുമായി രംഗത്തിറങ്ങുന്നവർ ഈ യാഥാർത്ഥ്യം ഉൾക്കൊള്ളണമെന്നും അദ്ദേഹം കൂട്ടിച്ചേർത്തു.

സിപിഐ സംസ്ഥാന ആസ്ഥാനത്ത് നടന്ന വെളിയം ഭാർഗവൻ അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അച്യുതമേനോൻ മുഖ്യമന്ത്രിയായിരുന്ന മന്ത്രിസഭ കോൺഗ്രസ് നേതൃത്വത്തിലുള്ളതായിരുന്നുവെന്ന സിപിഎം ജനറൽ സെക്രട്ടറി എം.എ.

ബേബിയുടെ പരാമർശത്തിനുള്ള മറുപടിയായാണ് പന്ന്യൻ രവീന്ദ്രൻ ഇക്കാര്യം വ്യക്തമാക്കിയത്. 1957ലെ കമ്യൂണിസ്റ്റ് സർക്കാർ അധികാരത്തിൽ വരുന്നതിന് വഴിയൊരുക്കിയ പ്രകടനപത്രിക തയ്യാറാക്കിയത് അച്യുതമേനോനായിരുന്നുവെന്നും ആ പത്രികയിലെ വാഗ്ദാനങ്ങളിൽ ഭൂരിഭാഗവും പ്രാവർത്തികമാക്കിയത് അദ്ദേഹത്തിന്റെ ഭരണകാലത്താണെന്നും പന്ന്യൻ ഓർമ്മിപ്പിച്ചു.

കേരളം കണ്ട ഏറ്റവും മികച്ച ഭരണകാലഘട്ടമായിരുന്നു അതെന്നും അദ്ദേഹം പറഞ്ഞു.

തുടർച്ചയായി ഭരിച്ചാൽ തിരഞ്ഞെടുപ്പിൽ പരാജയപ്പെടുമെന്ന തെറ്റായ വാദങ്ങൾ ചിലർ ഉയർത്തുന്നുണ്ട്. എന്നാൽ അച്യുതമേനോൻ സർക്കാർ വീണ്ടും ജനവിധി തേടിയപ്പോൾ വൻ ഭൂരിപക്ഷത്തോടെയാണ് വിജയിച്ചുകയറിയത്.

രാജ്യത്തുടനീളം അടിയന്തരാവസ്ഥയുടെ പശ്ചാത്തലത്തിൽ കോൺഗ്രസിനെതിരെ ശക്തമായ ജനവികാരം അലയടിച്ചപ്പോഴും കേരളത്തിൽ അതിനെ പ്രതിരോധിച്ച പ്രധാന പ്രതിരോധ കവചം അച്യുതമേനോനായിരുന്നുവെന്നും അദ്ദേഹം ചൂണ്ടിക്കാട്ടി. സമീപകാലത്ത് എൽഡിഎഫിന് നേരിടേണ്ടി വന്നത് വലിയ തിരിച്ചടിയാണെന്നും നാം ജനങ്ങളിൽ നിന്ന് അകന്നുപോയതാണ് ഇതിന് കാരണമെന്നും പന്ന്യൻ അഭിപ്രായപ്പെട്ടു.

യഥാർത്ഥ കമ്യൂണിസ്റ്റുകാരൻ എങ്ങനെ ജീവിക്കണമെന്ന് സ്വന്തം ജീവിതത്തിലൂടെ കാണിച്ചുതന്ന വ്യക്തിയായിരുന്നു വെളിയം ഭാർഗവൻ. സംസ്ഥാന സെക്രട്ടറിയായിരിക്കെ സി.കെ.

ചന്ദ്രപ്പന് വേണ്ടി ആ സ്ഥാനം ഒഴിഞ്ഞുകൊടുക്കുന്നതിൽ അദ്ദേഹത്തിന് യാതൊരു മടിയുമുണ്ടായിരുന്നില്ല. അധികാരമോ സ്ഥാനമാനങ്ങളോ അല്ല, ആദർശങ്ങളാണ് വെളിയത്തെ നയിച്ചതെന്നും അദ്ദേഹം അനുസ്മരിച്ചു.

ചടങ്ങിൽ സിപിഐ സെക്രട്ടേറിയറ്റ് അംഗങ്ങളായ ജി.ആർ. അനിൽ, കെ.പി.

സുരേഷ് രാജ്, ജില്ലാ സെക്രട്ടറി മാങ്കോട് രാധാകൃഷ്ണൻ, സി.പി. മുരളി തുടങ്ങിയ പ്രമുഖരും സന്നിഹിതരായിരുന്നു.