തൃശൂർ റെയിൽവേ സ്റ്റേഷൻ നവീകരണ പ്രവൃത്തികളുടെ ഭാഗമായി കൊക്കാല ഭാഗത്തുനിന്നുള്ള തെക്കു വശത്തെ പ്രവേശനമാർഗം വിപുലീകരിക്കുന്നു. ഇതിന്റെ ഭാഗമായി രണ്ടാഴ്ചയ്ക്കകം പുതിയ രണ്ട് ടിക്കറ്റ് കൗണ്ടറുകളും അത്യാധുനിക വിശ്രമകേന്ദ്രവും യാത്രക്കാർക്കായി തുറന്നുകൊടുക്കും.
ഈ മാസം അവസാനത്തോടെ ഈ പുതിയ സൗകര്യങ്ങൾ പൂർണ്ണമായും നിലവിൽ വരുമെന്ന് അധികൃതർ അറിയിച്ചു. സ്റ്റേഷന്റെ പ്രധാന കെട്ടിടം പൊളിച്ചുനീക്കുന്ന പ്രവൃത്തികൾ ഒക്ടോബർ ആദ്യവാരം ആരംഭിക്കും.
സ്റ്റേഷൻ മാനേജറുടെ ഓഫിസ് മുറി, സിഗ്നൽ സംവിധാനങ്ങൾ ഉൾക്കൊള്ളുന്ന ഭാഗം എന്നിവ മുതൽ സ്റ്റേഷന്റെ മധ്യഭാഗത്തുള്ള കാൽനടപ്പാലം വരെയുള്ള ഭാഗമാണ് ഘട്ടംഘട്ടമായി പൊളിക്കുന്നത്. മേൽക്കൂര പൊളിക്കുന്നതുമായി ബന്ധപ്പെട്ട് യാത്രക്കാരുടെ സുരക്ഷ മുൻനിർത്തി ഈ പ്രദേശം ഷീറ്റുകൾ ഉപയോഗിച്ച് സുരക്ഷിതമായി മറച്ചിട്ടുണ്ട്.
ഇതിന്റെ ഫലമായി ഒന്നാം പ്ലാറ്റ്ഫോമിന്റെ വീതി പകുതിയോളമായി ചുരുങ്ങും. തെക്കുവശത്തെ പുതിയ പ്രവേശന കവാടം ഉൾപ്പെടെയുള്ള മാറ്റങ്ങൾ ഈ ഘട്ടത്തിൽ യാഥാർത്ഥ്യമാകും.
സ്റ്റേഷൻ അങ്കണത്തിലൂടെയുള്ള ഇരുവശത്തേക്കുമുള്ള വാഹന ഗതാഗതം പൂർണ്ണമായി നിരോധിച്ചിരിക്കുന്നു. പുതിയ ഗതാഗത ക്രമീകരണങ്ങൾ ഇപ്രകാരമാണ്:
∙ വടക്കു വശത്തെ പ്രധാന കവാടത്തിലൂടെ (ദിവാൻജിമൂല ഭാഗം) സ്റ്റേഷനിലേക്ക് പ്രവേശിക്കുന്ന വാഹനങ്ങൾ ദേശീയ പതാക സർക്കിൾ ചുറ്റി തിരികെ പോകേണ്ടതാണ്.
∙ തെക്കു വശം (കൊക്കാല വഴി) എത്തുന്ന വാഹനങ്ങളും നിയന്ത്രിത ഏരിയ ചുറ്റി മാത്രമേ തിരികെ പോകാവൂ.
∙ യാത്രക്കാരെ സ്റ്റേഷനിൽ ഇറക്കാനും കയറ്റാനും (പിക്ക് ആൻഡ് ഡ്രോപ്) മാത്രമാണ് വാഹനങ്ങൾക്ക് അനുവാദം നൽകിയിട്ടുള്ളത്.
∙ സ്റ്റേഷനുള്ളിലെ വാഹന പാർക്കിങ് സൗകര്യം ഇനിയൊരു ഉത്തരവ് ഉണ്ടാകുന്നത് വരെ പരിമിതപ്പെടുത്തിയിരിക്കുന്നു.
പ്രീമിയം പാർക്കിങ് സൗകര്യം മാത്രമായിരിക്കും ഇനി ഇവിടെ ലഭ്യമാകുക.
∙ ചരക്കുലോറികൾ ഉൾപ്പെടെയുള്ള ഭാര വാഹനങ്ങൾക്ക് സ്റ്റേഷൻ അങ്കണത്തിലേക്ക് പ്രവേശനം ഉണ്ടായിരിക്കില്ല. ഇത്തരത്തിലുള്ള വാഹനങ്ങൾ യാത്രക്കാർക്കായി പൂത്തോളിൽ സജ്ജീകരിച്ചിട്ടുള്ള രണ്ടാം കവാടം ഉപയോഗിക്കേണ്ടതാണ്.
∙ ഓൺലൈൻ ടാക്സി സർവീസുകൾ ആശ്രയിക്കുന്നവരും പൂത്തോൾ ഭാഗത്തെ കവാടം പ്രയോജനപ്പെടുത്താൻ ശ്രദ്ധിക്കുക.
യാത്രക്കാർ ശ്രദ്ധിക്കേണ്ട പ്രധാന വിവരങ്ങൾ:
∙ ട്രെയിൻ യാത്ര പൂർത്തിയാക്കി പ്രധാന കവാടത്തിലൂടെ പുറത്തേക്ക് പോകേണ്ടവർ ഒന്നാം പ്ലാറ്റ്ഫോമിലെ 23–ാം നമ്പർ കോച്ച് പൊസിഷനിൽ ഉള്ള ഗേറ്റ് ഉപയോഗിക്കേണ്ടതാണ്.
∙ തെക്കുവശത്തെ (കൊക്കാല ഭാഗം) കവാടം വഴി പുറത്തിറങ്ങാൻ ആഗ്രഹിക്കുന്നവർ ഒന്നാം പ്ലാറ്റ്ഫോമിലെ 10–ാം നമ്പർ കോച്ച് പൊസിഷനിലെ ഗേറ്റ് ഉപയോഗപ്പെടുത്തണം.
∙ കൊച്ചി–തിരുവനന്തപുരം റൂട്ടിൽ സർവീസ് നടത്തുന്ന വന്ദേഭാരത് എക്സ്പ്രസ്, മെമു, പാസഞ്ചർ ട്രെയിനുകൾ എന്നിവ ഒന്നാം പ്ലാറ്റ്ഫോമിലെ 6–ാം നമ്പർ കോച്ച് പൊസിഷനിൽ മാത്രമായിരിക്കും നിർത്തിയിടുക.
(ചില ഓൺലൈൻ ആപ്പുകളിൽ ഒന്നാം നമ്പർ കോച്ച് പൊസിഷൻ എന്ന് തെറ്റായ വിവരമായിരിക്കാം നൽകിയിരിക്കുന്നത്, യാത്രക്കാർ ഇത് പ്രത്യേകം ശ്രദ്ധിക്കുക).
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
