കോടികൾ മുടക്കി നിർമ്മിച്ച മൂന്നാർ ലേബർ ഓഫിസ് കോംപ്ലക്സ് കാടുകയറി നശിക്കുന്നു; ഉദ്ഘാടനം കഴിഞ്ഞ് രണ്ടു വർഷമായിട്ടും പ്രവർത്തനം നിലച്ചു

മൂന്നാർ എംജി നഗറിൽ കോടികൾ ചെലവഴിച്ച് നിർമ്മിച്ച ലേബർ ഓഫിസ് കോംപ്ലക്സ് കെട്ടിടം യാതൊരുവിധ പ്രവർത്തനവുമില്ലാതെ കാടുകയറി നശിക്കുന്നതായി റിപ്പോർട്ട്. തൊഴിൽ വകുപ്പിന് കീഴിൽ വർഷങ്ങളായി വാടക കെട്ടിടങ്ങളിൽ പ്രവർത്തിച്ചുവന്നിരുന്ന വിവിധ ഓഫിസുകൾ ഒരുകുടക്കീഴിൽ കൊണ്ടുവരികയെന്ന ലക്ഷ്യത്തോടെയാണ് ഈ പദ്ധതി നടപ്പിലാക്കിയത്.

എന്നാൽ ഉദ്ഘാടനം കഴിഞ്ഞ് രണ്ടു വർഷം പിന്നിടുമ്പോഴും കെട്ടിടം നോക്കുകുത്തിയായി തുടരുകയാണ്. നിലവിൽ സാമൂഹിക വിരുദ്ധരുടെയും കന്നുകാലികളുടെയും തെരുവുനായ്ക്കളുടെയും പ്രധാന വിശ്രമകേന്ദ്രമായി ഈ പൊതുമുതൽ മാറിയിരിക്കുകയാണ്.

2.5 കോടി രൂപ ചെലവിലാണ് മൂന്നാർ എംജി നഗറിൽ രണ്ടു നിലകളിലായി ഈ ലേബർ കോംപ്ലക്സ് പണിപൂർത്തിയാക്കിയത്. 2024 ഒക്ടോബർ 21നാണ് മന്ത്രി വി.ശിവൻകുട്ടി ഈ കെട്ടിടത്തിന്റെ ഉദ്ഘാടനം നിർവഹിച്ചത്.

ഡപ്യൂട്ടി ലേബർ ഓഫിസ്, അസിസ്റ്റന്റ് ലേബർ ഓഫിസ്, ഇൻസ്പെക്ടർ ഓഫ് പ്ലാന്റേഷൻസ് ഓഫിസ് എന്നിവയായിരുന്നു ഈ പുതിയ സമുച്ചയത്തിലേക്ക് മാറ്റാൻ ലക്ഷ്യമിട്ടിരുന്നത്. തോട്ടം മേഖലയായ മൂന്നാറിൽ പതിറ്റാണ്ടുകളായി പഴയ മൂന്നാർ മൂലക്കടയ്ക്ക് സമീപമുള്ള വിവിധ സ്വകാര്യ കെട്ടിടങ്ങളിലാണ് ഈ ഓഫിസുകൾ പ്രവർത്തിക്കുന്നത്.

എന്നാൽ പുതിയതായി നിർമ്മിച്ച കെട്ടിടത്തിന് ചുറ്റുമതിൽ ഇല്ലാത്തതും ആവശ്യത്തിന് ശുദ്ധജല ലഭ്യത ഉറപ്പാക്കാൻ കഴിയാത്തതുമാണ് ഓഫിസുകളുടെ പ്രവർത്തനം ആരംഭിക്കുന്നതിന് പ്രധാന തടസ്സമായി തൊഴിൽ വകുപ്പ് അധികൃതർ വിശദീകരിക്കുന്നത്. പകൽ സമയങ്ങളിൽ പോലും ആവശ്യമായ സുരക്ഷ ഇല്ലാത്ത ഈ സമുച്ചയം സന്ധ്യയാകുന്നതോടെ പൂർണ്ണമായും സാമൂഹിക വിരുദ്ധരുടെ പിടിയിലമരുന്നതായാണ് നാട്ടുകാരുടെ പരാതി.