ചായയിൽ പഞ്ചസാരയ്ക്ക് പകരം ശർക്കര ഉപയോഗിക്കുന്നത് ആരോഗ്യത്തിന് ഗുണകരമോ? അറിയേണ്ട പ്രധാന വിവരങ്ങൾ

ഇന്നത്തെ കാലത്ത് മിക്കവരുടെയും ദിനചര്യയിലെ പ്രധാന ഭാഗമാണ് ചായ. എന്നാൽ ആരോഗ്യത്തെക്കുറിച്ചുള്ള ബോധവൽക്കരണം വർദ്ധിച്ചതോടെ, വെളുത്ത പഞ്ചസാര പൂർണ്ണമായി ഒഴിവാക്കി പകരം ശർക്കര ഉപയോഗിക്കുന്നവരുടെ എണ്ണം കൂടിവരുന്നുണ്ട്.

ശരീരഭാരം കുറയ്ക്കാൻ ശർക്കര സഹായിക്കുമെന്ന ധാരണയാണ് പലരെയും ഇതിലേക്ക് നയിക്കുന്നത്. ശുദ്ധീകരിച്ച പഞ്ചസാരയേക്കാൾ ആന്റിഓക്‌സിഡന്റുകളും ധാതുക്കളും കൂടുതലായി അടങ്ങിയ ഒന്നാണ് ശർക്കരയെന്ന് ഇന്റർനാഷണൽ ജേണൽ ഓഫ് അപ്ലൈഡ് ഹോം സയൻസ് ചൂണ്ടിക്കാട്ടുന്നു.

അമിതമായി കഴിച്ചാൽ രക്തത്തിലെ പഞ്ചസാരയുടെ അളവ് പെട്ടെന്ന് ഉയർത്താനും ശരീരത്തിൽ കൊഴുപ്പ് അടിയുന്നതിന് കാരണമാകാനും സാധ്യതയുള്ളതാണ് പഞ്ചസാര. ശർക്കര താരതമ്യേന ആരോഗ്യകരമാണെങ്കിലും, ഇവ രണ്ടും ശരീരത്തിൽ കലോറി വർദ്ധിപ്പിക്കുന്നവയാണെന്ന് ആരോഗ്യ വിദഗ്ധർ വ്യക്തമാക്കുന്നു.

ഇതൊരു മധുരപദാർത്ഥമായതിനാൽ ശർക്കര മാത്രം കഴിക്കുന്നത് ഭാരം കുറയ്ക്കാൻ സഹായിക്കില്ല. സംസ്കരിച്ച വെള്ള പഞ്ചസാരയ്ക്ക് അടിമയാകാനുള്ള സാധ്യതയും രക്തത്തിലെ പഞ്ചസാരയുടെ അളവിൽ പെട്ടെന്നുള്ള വ്യതിയാനങ്ങൾ ഉണ്ടാക്കാനുള്ള കഴിവുമുണ്ട്.

ഇതിനു വിപരീതമായി, ശർക്കര ഒരു മികച്ച ബദലാണെന്ന് സൂചിപ്പിക്കുന്ന പഠനങ്ങൾ വർധിച്ചുവരുന്നുണ്ട്. ശർക്കരയിലെയും വെളുത്ത പഞ്ചസാരയിലെയും കലോറിയുടെ അളവ് പരിശോധിച്ചാൽ, അവയിൽ ഏകദേശം തുല്യമായ അളവിലാണ് കലോറി അടങ്ങിയിരിക്കുന്നത്.

100 ഗ്രാം ശർക്കരയിൽ 383 കലോറിയും വെളുത്ത പഞ്ചസാരയിൽ 387 കലോറിയുമാണുള്ളത്. എന്നിരുന്നാലും, അവയുടെ പോഷക ഘടന ശരീരത്തിൽ വ്യത്യസ്തമായ സ്വാധീനമാണ് ചെലുത്തുന്നത്.

ശർക്കര കഴിക്കുന്നത് ശരീരഭാരം കുറയ്ക്കാൻ സഹായിക്കുമെന്ന് തെളിയിക്കുന്ന നേരിട്ടുള്ള ക്ലിനിക്കൽ തെളിവുകളൊന്നുമില്ല. എങ്കിലും, രക്തത്തിലെ പഞ്ചസാരയുടെ അളവ് നിയന്ത്രിക്കാനും പോഷകസമൃദ്ധമായിരിക്കാനും സഹായിക്കുന്ന ചില ഗുണങ്ങൾ ഇതിനുണ്ട്.

എന്നാൽ അറി‍ഞ്ഞിരിക്കേണ്ട ഒരു പ്രധാന കാര്യം, അമിതമായി ശർക്കര കഴിച്ചാലും ശരീരഭാരം വർദ്ധിക്കാം എന്നതാണ്.

വെള്ള പഞ്ചസാര കഴിക്കുമ്പോഴും ഇതുതന്നെയാണ് സംഭവിക്കുന്നതെന്ന് വിദഗ്ധർ ഓർമ്മിപ്പിക്കുന്നു.