ഇന്ത്യയുടെ തിരിച്ചടി; ഡൽഹിയിലെ പാക്കിസ്ഥാൻ ഹൈക്കമ്മിഷന് മുന്നിലെ ബാരിക്കേഡുകൾ നീക്കം ചെയ്തു

നയതന്ത്ര തലത്തിലെ പുതിയ സംഭവവികാസങ്ങളുടെ ഭാഗമായി ന്യൂഡൽഹിയിലെ പാക്കിസ്ഥാൻ ഹൈക്കമ്മിഷന് പുറത്തുണ്ടായിരുന്ന അനധികൃത നിർമിതികളും സുരക്ഷാ സംവിധാനങ്ങളും അധികൃതർ എടുത്തുമാറ്റി. മിഷന്റെ വീസ വിഭാഗത്തിന് സമീപം നടപ്പാതകളിലായി സ്ഥാപിച്ചിരുന്ന ക്യു ലൈനറുകൾ, ട്രാഫിക് ബൊള്ളാർഡുകൾ, സുരക്ഷാ ബാരിക്കേഡുകൾ എന്നിവയാണ് പൊളിച്ചുനീക്കിയത്.

ഇസ്‌ലാമാബാദിലെ ഇന്ത്യൻ ഹൈക്കമ്മിഷന് മുന്നിലെ സുരക്ഷാ ബാരിക്കേഡുകൾ പാക്കിസ്ഥാൻ ഭരണകൂടം എടുത്തുമാറ്റി കൃത്യം മൂന്ന് ദിവസങ്ങൾക്ക് ശേഷമാണ് ഈ നടപടി ഉണ്ടായിരിക്കുന്നത്. ഈ മേഖലയിൽ നടത്തിയ പരിശോധനകളിലും നീക്കം ചെയ്യൽ നടപടികൾക്ക് ശേഷവുമുള്ള ദൃശ്യങ്ങളിലും തകർന്ന ഗേറ്റുകൾ, ഇരുമ്പ് ചട്ടങ്ങൾ, റൂഫിങ് ഷീറ്റുകൾ, ഇഷ്ടിക കഷണങ്ങൾ, കോൺക്രീറ്റ് അവശിഷ്ടങ്ങൾ എന്നിവ കോംപൗണ്ടിന് പുറത്തുള്ള വഴിയിൽ ചിതറിക്കിടക്കുന്നതായി വ്യക്തമായിട്ടുണ്ട്.

എന്നാൽ പാക്ക് നിർമിതികൾ പെട്ടെന്ന് നീക്കം ചെയ്യാനുള്ള യഥാർത്ഥ കാരണം സംബന്ധിച്ച് ഔദ്യോഗിക വൃത്തങ്ങൾ ഇതുവരെ വ്യക്തത വരുത്തിയിട്ടില്ല. എങ്കിലും, കശ്മീർ വിഷയത്തിൽ യുഎസ് സ്ഥാനപതി നടത്തിയ ചില പരാമർശങ്ങളിൽ പാക്കിസ്ഥാൻ കടുത്ത അതൃപ്തി രേഖപ്പെടുത്തിയിരുന്നുവെന്നും, ഇപ്പോഴത്തെ സംഭവവികാസങ്ങൾക്ക് അതുമായി ബന്ധമുണ്ടോ എന്ന കാര്യത്തിൽ ഔദ്യോഗിക സ്ഥിരീകരണങ്ങൾ ഒന്നും തന്നെ ലഭ്യമായിട്ടില്ല.

കഴിഞ്ഞ ബുധനാഴ്ച ശ്രീനഗർ സന്ദർശിച്ച ഇന്ത്യയിലെ യുഎസ് അംബാസഡർ സെർജിയോ ഗോർ ജമ്മു കശ്മീരിനെ ഇന്ത്യയുടെ അവിഭാജ്യ ഘടകം എന്ന് വിശേഷിപ്പിച്ചിരുന്നു. ജമ്മു കശ്മീർ മുഖ്യമന്ത്രി ഉമർ അബ്ദുല്ലയുമായി നടത്തിയ കൂടിക്കാഴ്ചയ്ക്ക് ശേഷമാണ് അദ്ദേഹം ഈ നിർണായക പരാമർശം നടത്തിയത്.

ഇതിനെതിരെ ശക്തമായ പ്രതിഷേധവുമായി രംഗത്തുവന്ന പാക്കിസ്ഥാൻ, ഇസ്‌ലാമാബാദിലെ യുഎസ് നയതന്ത്ര പ്രതിനിധിയെ വിളിപ്പിച്ച് അതൃപ്തി അറിയിക്കുകയും ചെയ്തിരുന്നു.