തമിഴ്‌നാട് മന്ത്രിസഭയിൽ വൻ അഴിച്ചുപണിക്ക് കളമൊരുങ്ങുന്നു; ബജറ്റ് സമ്മേളനത്തിന് ശേഷം തീരുമാനമെന്ന് സൂചന

മന്ത്രിമാരുടെ വകുപ്പുകളിലെ പ്രവർത്തന മികവും കാര്യക്ഷമതയും വിലയിരുത്തി ഭരണതലത്തിൽ പുനഃസംഘടനയ്ക്ക് ഒരുങ്ങി ടിവികെ സർക്കാർ. വിവിധ വിവാദങ്ങളിൽ ഉൾപ്പെട്ട

മന്ത്രിമാരെ ഒഴിവാക്കുന്നതിനൊപ്പം, പ്രകടനം അസംതൃപ്തമെന്ന് വിലയിരുത്തപ്പെട്ടവരുടെ വകുപ്പുകൾ മാറ്റാനുമാണ് നീക്കം. ഇതിന്റെ ഭാഗമായി മുഖ്യമന്ത്രി സി.ജോസഫ് വിജയ്യുടെ നേതൃത്വത്തിൽ ഉയർന്നതല യോഗം ചേർന്നിട്ടുണ്ടെന്നാണ് ലഭിക്കുന്ന വിവരം.

നാളെ ആരംഭിക്കുന്ന നിയമസഭാ ബജറ്റ് സമ്മേളനത്തിന് ശേഷമായിരിക്കും നിർണായക തീരുമാനങ്ങൾ ഔദ്യോഗികമായി പ്രഖ്യാപിക്കുക. അണ്ണാഡിഎംകെയിൽ നിന്നും പാർട്ടി വിട്ടുപോന്ന പ്രമുഖ നേതാക്കളായ സി.വിജയഭാസ്കർ, എം.ആർ.വിജയഭാസ്കർ എന്നിവർ പുതിയ മന്ത്രിസഭയിലേക്ക് ഇടംപിടിച്ചേക്കുമെന്നും ശക്തമായ അഭ്യൂഹങ്ങളുണ്ട്.

വിവിധ വിവാദങ്ങളിൽ അകപ്പെട്ട പ്രമുഖ മന്ത്രിമാരാണ് നിലവിൽ പുറത്താകൽ ഭീഷണി നേരിടുന്നത്.

ലഹരി വസ്തുക്കൾ ഉപയോഗിച്ചുവെന്ന തരത്തിലുള്ള ദൃശ്യങ്ങൾ സമൂഹമാധ്യമങ്ങളിൽ പ്രചരിച്ച് കനത്ത വിവാദത്തിന് വഴിവെച്ച മാനവ വിഭവശേഷി വകുപ്പ് മന്ത്രി ഡി.ശരത്കുമാർ, ടിവികെ നേതാവിനെതിരെ ഭീഷണി മുഴക്കിയതുമായി ബന്ധപ്പെട്ട് പ്രതിക്കൂട്ടിലായ സാമൂഹിക ക്ഷേമ വകുപ്പ് മന്ത്രി കെ.ജഗദീശ്വരി, വകുപ്പുതല പ്രവർത്തനങ്ങളിലെ ഇടപെടലുകൾ കാരണം നിരന്തരം വിമർശനങ്ങൾ ഏറ്റുവാങ്ങിയ ഗതാഗത മന്ത്രി വിജയ് തമിഴൻ പാർഥിപൻ, കരാർ ഇടപാടുകളിലെ ക്രമക്കേടുകൾ സംബന്ധിച്ച് ഗുരുതര ആരോപണങ്ങൾ നേരിടുന്ന ഖനന വകുപ്പ് മന്ത്രി ടി.കെ.പ്രഭു എന്നിവരാണ് ഈ നിരയിലുള്ളത്. പോക്സോ കേസ് ആരോപണങ്ങളിൽ ഉൾപ്പെട്ടിട്ടുള്ള കോൺഗ്രസ് മന്ത്രി പി.വിശ്വനാഥനും മന്ത്രിസ്ഥാനം നഷ്ടപ്പെടാൻ സാധ്യതയുണ്ട്.

പ്രവീൺ ചക്രവർത്തിക്ക് രാജ്യസഭാ സീറ്റ് അനുവദിച്ച പശ്ചാത്തലത്തിൽ, കോൺഗ്രസ് പാർട്ടിക്ക് ലഭിച്ചിരിക്കുന്ന മന്ത്രിസ്ഥാനങ്ങളിൽ ഒന്ന് തിരിച്ചുപിടിക്കുന്നത് സംബന്ധിച്ചും ചർച്ചകൾ സജീവമാണെന്ന് രാഷ്ട്രീയ നിരീക്ഷകർ വിലയിരുത്തുന്നു. ടിവികെ മന്ത്രിസഭയിലെ ഏറ്റവും പ്രായം കുറഞ്ഞ മന്ത്രിമാരായ എസ്.കമാലി, എസ്.കീർത്തന എന്നിവരുടെ വകുപ്പുകളിൽ മാറ്റം വരുത്താനും ആലോചനയുണ്ട്.

നിലവിൽ വ്യവസായ വകുപ്പാണ് കീർത്തന കൈകാര്യം ചെയ്യുന്നതെങ്കിൽ, മൃഗസംരക്ഷണ വകുപ്പാണ് കമാലിക്ക് നൽകിയിരിക്കുന്നത്. അതേസമയം, കോൺഗ്രസ് നിയമസഭാ കക്ഷി നേതാവായ എസ്.രാജേഷ് കുമാർ ടൂറിസം വകുപ്പിൽ നിന്നും മാറ്റി താരതമ്യേന പ്രാധാന്യമുള്ള മറ്റൊരു പ്രധാന വകുപ്പിലേക്ക് പരിഗണിക്കപ്പെടുന്നുണ്ട്.

ഉപതിരഞ്ഞെടുപ്പുകളിൽ വിജയം സുരക്ഷിതമാക്കുന്നതിന്റെ ഭാഗമായി തങ്ങൾക്ക് അർഹമായ മന്ത്രിസ്ഥാനം നൽകണമെന്നാണ് അണ്ണാഡിഎംകെയിൽ നിന്ന് രാജിവെച്ച എംഎൽഎമാരുടെ പ്രധാന ആവശ്യം. എങ്കിലും, ഈ വിഷയങ്ങളിൽ മുഖ്യമന്ത്രി അന്തിമമായി എന്തു തീരുമാനമെടുക്കും എന്നതിനെ ആശ്രയിച്ചായിരിക്കും മന്ത്രിസഭയുടെ ഭാവി മുഖം.