ക്രൂഡോയിൽ വിലയിടിവ് ആശ്വാസമാകുന്നു; ആഗോള വിപണികളിൽ സമ്മിശ്ര പ്രതികരണം

ആയുധശേഖരം കുറഞ്ഞുവെന്ന മുന്നറിയിപ്പുകളെ തുടർന്ന് യുഎസ് തൽക്കാലത്തേക്ക് ഇറാനിലെ ആക്രമണങ്ങൾ നിർത്തിവെച്ചു. ഇതിനുപിന്നാലെ, യുഎസ് ആക്രമിച്ചില്ലെങ്കിൽ തിരിച്ചടിയുണ്ടാകില്ലെന്ന ഇറാന്റെ പ്രസ്താവന രാജ്യാന്തര വിപണികൾക്ക് വലിയ ആശ്വാസമാണ് നൽകിയിരിക്കുന്നത്.

എങ്കിലും, യുക്രെയ്ൻ സേന ഇറാൻ കപ്പലിനെ ആക്രമിച്ചതും ഇതിന് ശക്തമായ തിരിച്ചടി നൽകുമെന്ന് ഇറാൻ ഭീഷണി മുഴക്കിയതും നിക്ഷേപകരിൽ ആശങ്ക നിലനിർത്തുന്നുണ്ട്. യുഎസ് കേന്ദ്രങ്ങളെ ആക്രമിക്കാൻ ഇറാന് റഷ്യൻ ഉപഗ്രഹങ്ങളുടെ പിന്തുണ ലഭിച്ചെന്ന യുക്രെയ്ൻ ആരോപണവും ഇരുരാജ്യങ്ങളും തമ്മിലുള്ള ബന്ധം കൂടുതൽ വഷളാക്കിയിട്ടുണ്ട്.

ചെങ്കടലിൽ ഹൂതികളുടെ ഭീഷണിയും ഒപ്പം നിലനിൽക്കുന്നുണ്ട്. ഈ സംഭവവികാസങ്ങളുടെ പശ്ചാത്തലത്തിൽ ക്രൂഡോയിൽ വില അഞ്ചു ശതമാനത്തോളം ഇടിഞ്ഞു.

ഇത് ഓഹരി വിപണികൾക്ക് ഉണർവേകുമെന്ന പ്രതീക്ഷയിലാണ് നിക്ഷേപകർ. ഏഷ്യൻ വിപണികൾ നേട്ടത്തിലേക്ക് കടന്നപ്പോൾ സ്വർണവില ഒരു ശതമാനത്തോളം ഉയർന്നു.

അടുത്ത ദിവസങ്ങളിൽ ആരംഭിക്കുന്ന യുഎസ് ഫെഡറൽ റിസർവിന്റെ പണനയ യോഗത്തിലെ തീരുമാനങ്ങൾ ഇനി ആഗോള വിപണിക്ക് നിർണായകമാകും. നാളെ ആരംഭിക്കുന്ന യോഗത്തിന്റെ അന്തിമ തീരുമാനം ബുധനാഴ്ച പ്രഖ്യാപിക്കും.

എണ്ണവിലയിൽ വൻ ഇടിവ് യുഎസ് ആക്രമണം താൽക്കാലികമായി നിർത്തിയതോടെ ക്രൂഡോയിൽ വില കുത്തനെ താഴേക്ക് പോയി. രണ്ടാഴ്ചയായി തുടരുന്ന സംഘർഷത്തിന് അയവുവരുമെന്ന പ്രതീക്ഷയിൽ ഹോർമുസ്, ചെങ്കടൽ പാതകളിലൂടെയുള്ള കപ്പൽ ഗതാഗതം സുഗമമാകുമെന്നാണ് വിലയിരുത്തൽ.

യുഎസ് ബ്രെന്റ് ക്രൂഡോയിൽ വില അഞ്ച് ശതമാനത്തോളം ഇടിഞ്ഞ് ബാരലിന് 92.69 ഡോളർ എന്ന നിലയിലെത്തി. കഴിഞ്ഞ ആഴ്ച ഇത് 100 ഡോളർ കടന്നിരുന്നു.

ഡബ്ല്യുടിഐ ക്രൂഡ് ബാരലിന് 85 ഡോളറും യുഎഇയുടെ മർബൻ ക്രൂഡ് ബാരലിന് 97 ഡോളറുമാണ് നിലവിലെ വില. മർബൻ വിലയിൽ ഏകദേശം 10 ശതമാനത്തിന്റെ ഇടിവാണ് രേഖപ്പെടുത്തിയിട്ടുള്ളത്.

ആയുധങ്ങൾ കുറഞ്ഞതിനാൽ നിലവിൽ ഇറാനെ ആക്രമിക്കുന്നത് ബുദ്ധിപരമല്ലെന്ന അടുത്ത ഉപദേശകരുടെ അഭിപ്രായം മാനിച്ചാണ് ട്രംപ് താൽക്കാലിക യുദ്ധവിരാമത്തിന് മുതിർന്നതെന്നാണ് പുറത്തുവരുന്ന വിവരങ്ങൾ. ഇറാന്റെ ആക്രമണങ്ങൾ പ്രതിരോധിക്കാൻ ആവശ്യമായ പാട്രിയറ്റ് മിസൈലുകളും വ്യോമ പ്രതിരോധ സംവിധാനങ്ങളും യുഎസ് സൈന്യത്തിന് കുറവാണെന്ന് റിപ്പോർട്ടുകളുണ്ട്.

ഇറാനെതിരെ ആക്രമണം തുടരുന്നത് സെൻട്രൽ കമാൻഡിന്റെ ആയുധശേഷിയെ ബാധിക്കുമെന്ന് വൈസ് പ്രസിഡന്റ് ജെ.ഡി.വാൻസ് അടക്കമുള്ളവർ മുന്നറിയിപ്പ് നൽകിയിരുന്നു. എന്നാൽ ഈ റിപ്പോർട്ടുകൾ ട്രംപ് ഔദ്യോഗികമായി തള്ളിക്കളഞ്ഞു.

ലോകത്തിലെ മറ്റേത് രാജ്യത്തിനുള്ളതിനേക്കാളും അധികം ആയുധങ്ങൾ യുഎസിനുണ്ടെന്നായിരുന്നു അദ്ദേഹത്തിന്റെ പ്രതികരണം. ഇറാനുമായി സമാധാന ചർച്ചകൾ തുടരുന്നതിനാണ് ആക്രമണങ്ങൾക്കിടയിൽ ഇടവേള നൽകിയതെന്ന് ഐക്യരാഷ്ട്ര സഭയിലെ യുഎസ് അംബാസഡറും ട്രംപിന്റെ അനുയായിയുമായ മൈക്ക് വാൾട്സ് വ്യക്തമാക്കിയത് നിക്ഷേപകർക്ക് ആശ്വാസമായിട്ടുണ്ട്.

വിപണിയിൽ തിരിച്ചുവരവിന്റെ സൂചനകൾ തുടർച്ചയായ അഞ്ചു ദിവസത്തെ നഷ്ടത്തിന് ശേഷം ഇന്ത്യൻ വിപണികൾ ഇന്ന് ഉണർവോടെ വ്യാപാരം ആരംഭിക്കുമെന്നാണ് നിരീക്ഷകരുടെ വിലയിരുത്തൽ. ഗിഫ്റ്റ് നിഫ്റ്റി മികച്ച മുന്നേറ്റമാണ് കാഴ്ചവെക്കുന്നത്.

എണ്ണവിലയിടിവ് രൂപയുടെ വിനിമയ നിരക്ക് മെച്ചപ്പെടുത്തുമെന്നും വിദേശ നിക്ഷേപകർ തിരികെ എത്തുമെന്നും പ്രതീക്ഷിക്കപ്പെടുന്നു. ഇന്ന് ഏകദേശം എഴുപതോളം കമ്പനികൾ തങ്ങളുടെ ഒന്നാം പാദ ഫലങ്ങൾ പുറത്തുവിടും.

ഭാരത് ഇലക്ട്രോണിക്സ്, കോൾ ഇന്ത്യ, ഇൻഡസ് ടവേഴ്സ്, കോഫോർജ്, കാനറ ബാങ്ക്, ടാറ്റ പവർ തുടങ്ങിയ പ്രമുഖ കമ്പനികളുടെ ഫലങ്ങൾ വിപണിയുടെ ഗതിയെ നിർണയിക്കുന്നതിൽ പ്രധാന പങ്കുവേവിക്കും. അവസാന വ്യാപാരദിനമായ വെള്ളിയാഴ്ച സെൻസെക്സ് 0.43 ശതമാനം ഇടിഞ്ഞ് 76,408ലും നിഫ്റ്റി 0.43 ശതമാനം താഴ്ന്ന് 23,767ലുമാണ് ക്ലോസ് ചെയ്തത്.

ഏഷ്യൻ ഓഹരികളിൽ ഉണർവ് ക്രൂഡോയിൽ വിലയിടിവും പണപ്പെരുപ്പ ഭീഷണി കുറഞ്ഞതും ഏഷ്യൻ വിപണികൾക്ക് കരുത്തേകി. ഷാൻഹായ്, ഹോങ്കോങ് വിപണികൾ മികച്ച നേട്ടത്തിലാണ്.

എങ്കിലും, യുഎസ് കേന്ദ്രബാങ്ക് പലിശ നിരക്ക് വർധിപ്പിച്ചേക്കുമെന്ന ആശങ്കയും കമ്പനികളുടെ പാദഫലങ്ങളും നിക്ഷേപകരിൽ ജാഗ്രത നിലനിർത്തുന്നുണ്ട്. ജപ്പാനിലെ നിക്കെയ് സൂചിക നഷ്ടത്തിലാണ് വ്യാപാരം തുടരുന്നത്.

സാംസങ്, എസ്കെ ഹൈനിക്സ് തുടങ്ങിയ പ്രമുഖ ടെക് കമ്പനികളുടെ ഓഹരികൾ ഇടിഞ്ഞത് ദക്ഷിണ കൊറിയൻ വിപണിയെയും പ്രതികൂലമായി ബാധിച്ചു. ഈ ആഴ്ചയിലെ വിപണിയുടെ പോക്ക് പ്രധാനമായും ഇറാൻ-യുഎസ് സംഘർഷം, ക്രൂഡോയിൽ വില, യുഎസ് പലിശ നിരക്ക് സംബന്ധിച്ച പ്രഖ്യാപനങ്ങൾ എന്നിവയെ ആശ്രയിച്ചായിരിക്കും.

എണ്ണവില ഉയർന്നുനിൽക്കുന്നത് പണപ്പെരുപ്പം വർധിപ്പിക്കുമെന്ന ആശങ്കയും നിലനിൽക്കുന്നുണ്ട്. സെപ്റ്റംബറിൽ യുഎസ് ഫെഡറൽ റിസർവ് അടിസ്ഥാന പലിശ നിരക്ക് ഉയർത്തിയാൽ ഇന്ത്യ പോലുള്ള വളർന്നുവരുന്ന വിപണികളിൽ നിന്ന് വിദേശ നിക്ഷേപകർ പിൻവാങ്ങാൻ സാധ്യതയുണ്ട്.

ട്രംപ് പ്രഖ്യാപിച്ച പുതിയ തീരുവകളും ഇന്ത്യൻ കയറ്റുമതി മേഖലയ്ക്ക് വെല്ലുവിളിയാകുമെന്ന് വിദഗ്ധർ മുന്നറിയിപ്പ് നൽകുന്നുണ്ട്. അവസാന വ്യാപാരദിനത്തിൽ ആർട്ടിഫിഷ്യൽ ഇന്റലിജൻസ് മേഖലയിലെ അമിത ചെലവുകളെക്കുറിച്ചുള്ള ആശങ്കകൾ കാരണം യുഎസ് വിപണിയും നഷ്ടത്തിലാണ് അവസാനിച്ചത്.

ഗൂഗിളിന്റെ മാതൃകമ്പനിയായ ആൽഫബെറ്റ് എഐ രംഗത്ത് കൂടുതൽ നിക്ഷേപം നടത്തുമെന്ന് പ്രഖ്യാപിച്ചിരുന്നുവെങ്കിലും, അതിനനുസരിച്ചുള്ള വരുമാനം ലഭിക്കുന്നില്ലെന്നത് നിക്ഷേപകരെ ആശങ്കപ്പെടുത്തുന്നുണ്ട്. മൈക്രോസോഫ്റ്റ്, ആമസോൺ, മെറ്റ, ആപ്പിൾ തുടങ്ങിയ വൻകിട

കമ്പനികളുടെ വരാനിരിക്കുന്ന പാദഫലങ്ങളാണ് നിക്ഷേപകർ ഇപ്പോൾ ഉറ്റുനോക്കുന്നത്. *(Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി/ഐപിഒ/സ്വർണം മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.

ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക)* *(Disclaimer: ഈ വാർത്തയ്ക്കൊപ്പം ഉപയോഗിച്ചിരിക്കുന്ന ചിത്രം മലയാള മനോരമയുടേതല്ല.

ഇത് Whitehouse.gov, X/Ammar Ali Qureshi എന്നിവിടങ്ങളിൽ നിന്ന് എടുത്തിട്ടുള്ളതാണ്. ഈ വാർത്ത കൂടുതൽ വ്യക്തവും സമഗ്രവുമാക്കുന്നതിനാണ് ഈ ചിത്രം ഉപയോഗിച്ചിരിക്കുന്നത്.)*