ഇന്ത്യൻ വാഹന വിപണിയിലേക്ക് തങ്ങളുടെ ആദ്യ ഹൈബ്രിഡ് എസ്യുവിയുമായി പ്രമുഖ ജാപ്പനീസ് വാഹന നിർമാതാക്കളായ ഹോണ്ട എത്തിയിരിക്കുന്നു. ആഗോളതലത്തിൽ അവതരിപ്പിച്ച് രണ്ട് മാസങ്ങൾക്ക് ശേഷമാണ് ഈ പുതിയ വാഹനം രാജ്യത്ത് എത്തിച്ചിരിക്കുന്നത്.
47.99 ലക്ഷം രൂപയാണ് ഈ എസ്യുവിയുടെ ആമുഖ എക്സ്ഷോറൂം വില നിശ്ചയിച്ചിരിക്കുന്നത്. ജപ്പാനിൽ നിന്ന് പൂർണമായും നിർമിച്ച CBU യൂണിറ്റായാണ് ഈ വാഹനം ഇന്ത്യയിലേക്ക് ഇറക്കുമതി ചെയ്യുന്നത്.
വാഹനത്തിന്റെ ഡെലിവറി നടപടികൾ ഉടൻ തന്നെ ആരംഭിക്കുമെന്ന് കമ്പനി വ്യക്തമാക്കിയിട്ടുണ്ട്. നിലവിൽ ഹോണ്ട
കാർസ് ഇന്ത്യ രാജ്യത്ത് വിൽപനയ്ക്ക് എത്തിക്കുന്ന കാറുകളിൽ ഏറ്റവും വലിപ്പമുള്ള മോഡലാണ് ഇസഡ്ആർ-വി. 4,657 മില്ലീമീറ്റർ നീളവും 1,840 മില്ലീമീറ്റർ വീതിയും 1,621 മില്ലീമീറ്റർ ഉയരവുമുള്ള ഈ വാഹനത്തിന് 2,655 മില്ലീമീറ്റർ വീൽബേസാണുള്ളത്.
ഗ്ലോസ് ബ്ലാക്ക് ഫിനിഷിലുള്ള വലിയ ഗ്രിൽ, സ്ലീക്ക് എൽഇഡി ഹെഡ്ലാമ്പുകൾ, എയർ വെന്റുകൾ എന്നിവ മുൻവശത്തെ ആകർഷകമാക്കുന്നു. പിൻഭാഗത്ത് യു ആകൃതിയിലുള്ള എൽഇഡി ടെയിൽ ലാമ്പുകൾ, റൂഫ് സ്പോയിലർ, ഡ്യുവൽ എക്സ്ഹോസ്റ്റ് ഔട്ട്ലെറ്റുകൾ എന്നിവയോടൊപ്പം 18 ഇഞ്ച് അലോയ് വീലുകളുമാണ് ഇന്ത്യൻ പതിപ്പിൽ നൽകിയിട്ടുള്ളത്.
പൂർണമായും കറുപ്പ് നിറം നൽകിയിരിക്കുന്ന കാബിനിൽ പ്രീമിയം ലെതർ സീറ്റുകൾ, സോഫ്റ്റ് ടച്ച് മെറ്റീരിയലുകൾ എന്നിവ ഉൾപ്പെടുത്തിയിരിക്കുന്നു. ഒമ്പത് ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, പത്ത് ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഡ്യുവൽ സോൺ ക്ലൈമറ്റ് കൺട്രോൾ, 12 സ്പീക്കറുകളുള്ള ബോസ് ഓഡിയോ സിസ്റ്റം, മെമ്മറി ഫങ്ഷനോടുകൂടിയ ഇലക്ട്രിക് അഡ്ജസ്റ്റബിൾ മുൻസീറ്റുകൾ, വയർലെസ് ചാർജിങ് എന്നിവ ഉൾക്കൊള്ളിച്ചിരിക്കുന്നു.
സുരക്ഷയ്ക്ക് വലിയ പ്രാധാന്യമാണ് വാഹനത്തിൽ നൽകിയിട്ടുള്ളത്. എട്ട് എയർബാഗുകൾ, നാല് ചക്രങ്ങളിലും ഡിസ്ക് ബ്രേക്കുകൾ എന്നിവയ്ക്ക് പുറമെ അഡാപ്റ്റീവ് ക്രൂയിസ് കൺട്രോൾ, ഓട്ടോമാറ്റിക് എമർജൻസി ബ്രേക്കിങ്, ലെയ്ൻ കീപ്പ് അസിസ്റ്റ് തുടങ്ങിയ നൂതന ഡ്രൈവർ അസിസ്റ്റൻസ് സിസ്റ്റങ്ങളും ഇതിലുണ്ട്.
രണ്ട് ലിറ്റർ പെട്രോൾ എൻജിനും ഇലക്ട്രിക് മോട്ടോറും ചേർന്ന ശക്തമായ ഹൈബ്രിഡ് സംവിധാനമാണ് ഇതിന്റെ കരുത്ത്. 181 ബിഎച്ച്പിയും 315 എൻഎം ടോർക്കും ഉൽപ്പാദിപ്പിക്കുന്ന ഈ വാഹനം 7.9 സെക്കൻഡിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കും.
മണിക്കൂറിൽ 173 കിലോമീറ്ററാണ് പരമാവധി വേഗത. ലിറ്ററിന് 22.80 കിലോമീറ്റർ മൈലേജാണ് കമ്പനി വാഗ്ദാനം ചെയ്യുന്നത്.
വിപണിയിൽ സ്കോഡ കൊഡിയാക്, ഫോക്സ്വാഗൺ ടൈറോൺ, ജീപ്പ് മെറിഡിയൻ തുടങ്ങിയ പ്രീമിയം മോഡലുകളുമായാണ് ഇത് മത്സരിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
