സോഷ്യൽ മീഡിയയിലൂടെ സൗഹൃദം സ്ഥാപിച്ച് ഉപയോഗിക്കാനായി നൽകിയ വാഹനം തട്ടിയെടുത്തതായി പരാതി. വിഴിഞ്ഞം കോട്ടപ്പുറം സ്വദേശിയാണ് തന്റെ സ്വിഫ്റ്റ് കാറുമായി പ്രതി കടന്നുകളഞ്ഞെന്ന് കാട്ടി വിഴിഞ്ഞം പോലീസിൽ പരാതി നൽകിയത്.
ഓട്ടോ ഡ്രൈവറായ യുവാവിന്റെ ഉടമസ്ഥതയിലുള്ള വാഹനം കഴിഞ്ഞ ജൂലൈ ആറിനാണ് കവർച്ച ചെയ്യപ്പെട്ടത്. പത്തനംതിട്ട
സ്വദേശിയാണെന്ന് സ്വയം പരിചയപ്പെടുത്തിയ പ്രതി, സാമൂഹിക മാധ്യമങ്ങൾ വഴിയാണ് പരാതിക്കാരനുമായി അടുത്തത്. തുടർന്ന് ജോയൽ എന്ന പേരിൽ യുവാവിന്റെ ഫോണിലേക്ക് കോൾ എത്തുകയായിരുന്നു.
ഒന്നുരണ്ട് ദിവസത്തേക്ക് ആവശ്യാനുസരണം കാർ ഓടിക്കാൻ നൽകണമെന്നും, പിന്നീട് വാഹനം കൃത്യമായി തിരികെ എത്തിക്കാമെന്നും ഇയാൾ വാഗ്ദാനം ചെയ്തു. ഇതിന്റെ മുൻകൂർ പണമായി ഗൂഗിൾ പേ വഴി രണ്ട് തവണകളായി 3500 രൂപ പ്രതി പരാതിക്കാരന്റെ അക്കൗണ്ടിലേക്ക് അയച്ചുനൽകി.
കാർ തിരിച്ചേൽപ്പിക്കുമ്പോൾ ഈ തുക തിരികെ നൽകിയാൽ മതിയെന്നായിരുന്നു ഇരുവരും തമ്മിലുള്ള ധാരണയെന്ന് ഇരുപത്തൊൻപതുകാരനായ പരാതിക്കാരൻ വ്യക്തമാക്കി. നിശ്ചയിച്ച സമയം കഴിഞ്ഞിട്ടും വാഹനം മടക്കിക്കിട്ടാത്തതിനെ തുടർന്ന് പ്രതിയുടെ നമ്പറിലേക്ക് പലതവണ ബന്ധപ്പെടാൻ ശ്രമിച്ചെങ്കിലും ഫോൺ സ്വിച്ച് ഓഫ് ചെയ്ത നിലയിലായിരുന്നു.
താൻ വഞ്ചിക്കപ്പെട്ടുവെന്ന് ബോധ്യപ്പെട്ടതോടെ വ്യാഴാഴ്ചയോടെ യുവാവ് പോലീസിനെ സമീപിക്കുകയായിരുന്നു. സംഭവവുമായി ബന്ധപ്പെട്ട് സമീപപ്രദേശങ്ങളിലെ സി.സി.ടി.വി ദൃശ്യങ്ങൾ ഉൾപ്പെടെയുള്ളവ പരിശോധിച്ച് ഊർജിതമായ അന്വേഷണം ആരംഭിച്ചതായി പോലീസ് ഉദ്യോഗസ്ഥർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
