ന്യൂഡൽഹി: പ്രധാനമന്ത്രിയുടെ വസതിയിലേക്ക് രാഹുൽ ഗാന്ധിയുടെ നേതൃത്വത്തിൽ നടന്ന പ്രതിഷേധ പ്രകടനം തലസ്ഥാനത്ത് വലിയ രാഷ്ട്രീയ പ്രതിസന്ധിക്ക് വഴിവെച്ചു. അപ്രതീക്ഷിതമായി നടന്ന ഈ പ്രതിഷേധത്തെ നേരിടാൻ തുടക്കത്തിൽഡൽഹി പൊലീസ് കടുത്ത നിലപാടാണ് സ്വീകരിച്ചത്.
സമരമുഖത്തുണ്ടായിരുന്ന നേതാക്കളെ ഉൾപ്പെടെ ബലം പ്രയോഗിച്ച് കസ്റ്റഡിയിൽ എടുക്കാനുള്ള പൊലീസിന്റെ നീക്കം വലിയ സംഘർഷത്തിന് കാരണമായി. ഇടുക്കി എംപി ഡീൻ കുര്യാക്കോസ് ഉൾപ്പെടെയുള്ള നേതാക്കളെ പൊലീസ് വലിച്ചിഴച്ചാണ് അറസ്റ്റ് ചെയ്തത്.
ജനപ്രതിനിധികൾക്കെതിരായ ഇത്തരം നടപടികൾ വലിയ രാഷ്ട്രീയ പ്രത്യാഘാതങ്ങൾ ഉണ്ടാക്കുമെന്ന് തിരിച്ചറിഞ്ഞതോടെയാണ് കേന്ദ്രസർക്കാർ അനുനയ നീക്കങ്ങളിലേക്ക് കടന്നത്. പ്രതിപക്ഷ നേതാവ് രാഹുൽ ഗാന്ധിക്കൊപ്പം വി.ഡി.
സതീശൻ, ഡി.കെ. ശിവകുമാർ തുടങ്ങിയ പ്രമുഖ നേതാക്കളും സമരപ്പന്തലിൽ അണിനിരന്നു.
പി.സി. വിഷ്ണുനാഥ് ഉൾപ്പെടെയുള്ളവരും സമരത്തിൽ സജീവമായി പങ്കെടുത്തു.
സ്ഥിതിഗതികൾ വഷളായതോടെ അനുനയ ചർച്ചകൾക്കായി പ്രധാനമന്ത്രിയുടെ ഓഫിസിന്റെ ചുമതലയുള്ള കേന്ദ്രമന്ത്രി ജിതേന്ദ്ര സിങ് സ്ഥലത്തെത്തി. ആഭ്യന്തര സെക്രട്ടറിയും അദ്ദേഹത്തോടൊപ്പം സന്നിഹിതനായിരുന്നു.
പ്രതിപക്ഷ നേതാക്കളുമായി ഇവർ കൂടിക്കാഴ്ച നടത്തിയെങ്കിലും, കോൺഗ്രസ് മുന്നോട്ടുവെച്ച ആവശ്യങ്ങളിൽ വിട്ടുവീഴ്ച ചെയ്യാൻ രാഹുൽ ഗാന്ധി തയ്യാറായില്ല. ഇതിനിടെ, റാപ്പിഡ് ആക്ഷൻ ഫോഴ്സ് അടക്കമുള്ള സുരക്ഷാ സേനയെ സ്ഥലത്ത് വിന്യസിച്ചിട്ടുണ്ട്.
കൂടുതൽ കോൺഗ്രസ് പ്രവർത്തകർ ഡൽഹിയിലേക്ക് എത്തിക്കൊണ്ടിരിക്കുന്നതിനാൽ തലസ്ഥാനത്ത് അതീവ സംഘർഷഭരിതമായ അന്തരീക്ഷമാണ് നിലനിൽക്കുന്നത്. പ്രതിഷേധക്കാർ സ്വയം പിരിഞ്ഞുപോകാൻ തയ്യാറാകാത്ത സാഹചര്യത്തിൽ പൊലീസ് വീണ്ടും കർശന നടപടികളിലേക്ക് കടക്കുമോ എന്ന ആശങ്കയും ശക്തമാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
