ഗൂഗിൾ പിക്സൽ 11 സീരീസ് ഓഗസ്റ്റ് 12ന് പുറത്തിറങ്ങും; പുതിയ ഫീച്ചറുകൾ ഔദ്യോഗികമായി സ്ഥിരീകരിച്ചു

സ്മാർട്ട്ഫോൺ വിപണിയിൽ വലിയ പ്രതീക്ഷകൾ ഉണർത്തിക്കൊണ്ട് തങ്ങളുടെ പുതിയ ഫ്ലാഗ്ഷിപ്പ് മോഡലുകളായ പിക്സൽ 11 സീരീസ് അവതരിപ്പിക്കാൻ തയ്യാറെടുക്കുകയാണ് ഗൂഗിൾ. ഓഗസ്റ്റ് 12-ന് നടക്കുന്ന ചടങ്ങിലൂടെ ഈ പുതിയ ശ്രേണി വിപണിയിലെത്തും.

കഴിഞ്ഞയാഴ്ച പിക്സൽ 11 കുടുംബത്തിന്റെ വരവ് ഔദ്യോഗികമായി സ്ഥിരീകരിച്ചതിന് പിന്നാലെ, കമ്പനിയുടെ ഔദ്യോഗിക ഓൺലൈൻ സ്റ്റോറിന്റെ ഹോംപേജിൽ ഒരു പുതിയ ടീസർ വീഡിയോയും പുറത്തിറക്കിയിട്ടുണ്ട്. ഏറെ നാളായി സാങ്കേതിക ലോകത്ത് ചർച്ചയായിരുന്ന പിക്സൽ ഗ്ലോ എന്ന പുതിയ സവിശേഷതയുടെ പേര് ഈ ടീസർ വീഡിയോയിലൂടെ കമ്പനി സ്ഥിരീകരിച്ചിരിക്കുകയാണ്.

വൃത്താകൃതിയിലുള്ള എൽഇഡി ലൈറ്റുകളാണ് ടീസറിൽ കാണുന്നത്. നോട്ടിഫിക്കേഷനുകൾക്കായി പ്രത്യേകം രൂപകൽപ്പന ചെയ്ത ഈ സംവിധാനത്തിൽ, ഓരോ ആപ്പുകൾക്കും അനുസൃതമായി വ്യത്യസ്ത നിറങ്ങൾ ക്രമീകരിക്കാൻ സാധിക്കുമെന്നാണ് പുറത്തുവരുന്ന സൂചനകൾ.

എങ്കിലും, ഇതുസംബന്ധിച്ച കൂടുതൽ വ്യക്തത ഓഗസ്റ്റ് 12-ലെ ലോഞ്ച് ചടങ്ങിൽ മാത്രമെ ലഭ്യമാകൂ. ലോഞ്ച് ദിനം മുതൽ തന്നെ പ്രീ-ഓർഡർ സൗകര്യം ലഭ്യമാകുമെന്ന് കമ്പനി വ്യക്തമാക്കിയിട്ടുണ്ട്.

പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ്എൽ, പിക്സൽ 11 പ്രോ ഫോൾഡ് എന്നിങ്ങനെ നാല് വ്യത്യസ്ത മോഡലുകളാണ് വിപണിയിലെത്തുക. പിക്സൽ 11 പ്രോ ഫോൾഡ് പൈൻ, മിഡ്‌നൈറ്റ് നിറങ്ങളിലും, പിക്സൽ 11 പ്രോ മോഡൽ ഡ്യൂൺ, ലൈറ്റ് ഫോഗ്, പൈൻ, സ്റ്റെർലിങ് എന്നീ നിറങ്ങളിലും ലഭ്യമാകും.

സാധാരണ മോഡലുകളിൽ തിരശ്ചീനമായ ക്യാമറ ബാർ ഡിസൈൻ തന്നെ തുടരുമ്പോൾ, പിക്സൽ 11 പ്രോ ഫോൾഡിൽ പുനർരൂപകൽപ്പന ചെയ്ത ക്യാമറ ഐലൻഡ് ആയിരിക്കും ഉൾപ്പെടുത്തുക. ഡിസ്പ്ലേയുടെ കാര്യത്തിൽ വലിയ മാറ്റങ്ങൾ പ്രതീക്ഷിക്കുന്നില്ല.

പിക്സൽ 11, പിക്സൽ 11 പ്രോ എന്നിവയിൽ 6.3 ഇഞ്ച് ഒഎൽഇഡി ഡിസ്പ്ലേയും, പിക്സൽ 11 പ്രോ എക്സ്എല്ലിൽ 6.8 ഇഞ്ച് ഒഎൽഇഡി പാനലും ഉണ്ടായിരിക്കും. ഫോൾഡബിൾ മോഡലിൽ 6.4 ഇഞ്ച് പുറം ഡിസ്പ്ലേയും 8 ഇഞ്ച് അകത്തെ സ്ക്രീനും നൽകാനാണ് സാധ്യത.

ടിഎസ്എംസിയുടെ 2 നാനോമീറ്റർ സാങ്കേതികവിദ്യയിൽ നിർമ്മിച്ച ടെൻസർ ജി6 പ്രോസസറാണ് ഈ സീരീസിന്റെ കരുത്ത്. ടെൻസർ ജി5 ചിപ്പിനെ അപേക്ഷിച്ച് മികച്ച കാര്യക്ഷമതയും വൈദ്യുതി ഉപയോഗത്തിൽ കുറവും പുതിയ ചിപ്പ് വാഗ്ദാനം ചെയ്യുന്നു.

സാംസങ്ങിന് പകരം മീഡിയടെക്കിന്റെ എം90 മോഡം ഉപയോഗിക്കുന്നതും ഇത്തവണത്തെ പ്രത്യേകതയാണ്. ആൻഡ്രോയിഡ് 17 ഓപ്പറേറ്റിങ് സിസ്റ്റത്തിലായിരിക്കും ഈ ഫോണുകൾ പ്രവർത്തിക്കുക.