കാസർകോട് ഗവ. കോളജിൽ ഒന്നാം വർഷ ബിരുദ വിദ്യാർഥിക്ക് നേരെയുണ്ടായ റാഗിങ് സംഭവത്തിൽ 13 വിദ്യാർഥികളെ സസ്പെൻഡ് ചെയ്തു.
കോളജ് പ്രിൻസിപ്പൽ വി.എസ്. അനിൽകുമാർ ആണ് അച്ചടക്ക നടപടി സ്വീകരിച്ചത്.
ബിരുദ കോഴ്സുകളിലെ രണ്ട്, മൂന്ന് വർഷ വിദ്യാർഥികളാണ് നടപടിക്ക് വിധേയരായത്. ജൂലൈ 13-നാണ് സംഭവം നടന്നത്.
കോളജ് ക്യാംപസിനുള്ളിൽ വെച്ച് ഒരു സംഘം വിദ്യാർഥികൾ ചേർന്ന് ഒന്നാം വർഷ വിദ്യാർഥിയെ തടഞ്ഞുനിർത്തുകയും ഭീഷണിപ്പെടുത്തുകയും ദേഹോപദ്രവം ഏൽപ്പിക്കുകയും ചെയ്തുവെന്നാണ് പരാതി. സംഭവത്തെത്തുടർന്ന് വിദ്യാർഥി മാതാപിതാക്കളെ വിവരം അറിയിക്കുകയും തുടർന്ന് പ്രിൻസിപ്പലിന് ഔദ്യോഗികമായി പരാതി നൽകുകയും ചെയ്തു.
പരാതി ലഭിച്ച ഉടൻ കോളജ് അധികൃതർ പ്രാഥമിക അന്വേഷണം നടത്തിയിരുന്നു. ഇതിൽ ആരോപണത്തിൽ കഴമ്പുണ്ടെന്ന് ബോധ്യപ്പെട്ടതിനെത്തുടർന്നാണ് 13 വിദ്യാർഥികളെ സസ്പെൻഡ് ചെയ്തുകൊണ്ട് ഉത്തരവിട്ടത്.
വിഷയത്തിന്റെ ഗൗരവം കണക്കിലെടുത്ത്, അന്വേഷണ റിപ്പോർട്ട് സഹിതം പൊലീസിൽ പരാതി നൽകാനാണ് കോളജ് അധികൃതരുടെ തീരുമാനം. ഇതിനുപുറമെ, ഇരയായ വിദ്യാർഥിയും സംഭവത്തിൽ പൊലീസിൽ പരാതി നൽകിയിട്ടുണ്ട്.
ക്യാംപസിനുള്ളിൽ റാഗിങ് പോലുള്ള പ്രവണതകൾ വച്ചുപൊറുപ്പിക്കില്ലെന്ന് കോളജ് അധികൃതർ വ്യക്തമാക്കി. വിദ്യാർഥികളുടെ സുരക്ഷ ഉറപ്പാക്കുന്നതിനായി വരുംദിവസങ്ങളിൽ കർശനമായ നടപടികൾ സ്വീകരിക്കുമെന്നും അധികൃതർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
