ചേർത്തല മേൽപാതയിലെ ഗർത്തം: ജല അതോറിറ്റിയുടെ മുന്നറിയിപ്പ് അവഗണിച്ചെന്ന് റിപ്പോർട്ട്

ചേർത്തല ദേശീയപാതയിൽ പുതുതായി നിർമിച്ച മേൽപാതയിൽ വലിയ ഗർത്തം രൂപപ്പെട്ട സംഭവത്തിൽ വിശദമായ പരിശോധനയ്ക്ക് പൊതുമരാമത്ത് വകുപ്പ് തയാറെടുക്കുന്നു.

ഉദ്യോഗസ്ഥർ നൽകുന്ന റിപ്പോർട്ടിന്റെ അടിസ്ഥാനത്തിലായിരിക്കും മേൽപാത ഗതാഗതത്തിനായി പൂർണമായി തുറന്നുനൽകുന്ന കാര്യത്തിൽ അന്തിമ തീരുമാനമെടുക്കുക. നിലവിൽ പൈപ്പുകൾ കടന്നുപോകുന്ന ഭാഗങ്ങളിൽ ആവശ്യമായ മാറ്റങ്ങൾ വരുത്താനുള്ള നടപടികൾ കരാർ കമ്പനി ആരംഭിച്ചിട്ടുണ്ടെങ്കിലും, അറ്റകുറ്റപ്പണികൾ എന്നാണ് പൂർത്തിയാകുകയെന്ന കാര്യത്തിൽ അധികൃതർ വ്യക്തത വരുത്തിയിട്ടില്ല.

ജല അതോറിറ്റിയുമായും ബന്ധപ്പെട്ട വകുപ്പുകളുമായും കൂടിയാലോചനകൾ നടത്തിയ ശേഷമേ തുടർനടപടികൾ സ്വീകരിക്കുകയുള്ളൂ.

വീഴ്ചകൾ ചൂണ്ടിക്കാട്ടി റിപ്പോർട്ട്
ജല അതോറിറ്റി നൽകിയ മുന്നറിയിപ്പുകൾ ഗൗരവത്തോടെ കാണാത്തതാണ് അപകടത്തിന് വഴിയൊരുക്കിയതെന്ന് വ്യക്തമാക്കുന്ന റിപ്പോർട്ട് പുറത്തുവന്നിട്ടുണ്ട്. കഴിഞ്ഞ ചൊവ്വാഴ്ചയാണ് പതിനൊന്നാം മൈലിലെ മേൽപാതയിൽ ഗർത്തം രൂപപ്പെട്ടത്.

നിലവിൽ കോൺക്രീറ്റ് മിശ്രിതം ഉപയോഗിച്ച് താൽക്കാലികമായി കുഴി അടച്ചിട്ടുണ്ട്. ജല അതോറിറ്റിയും പൊതുമരാമത്ത് വകുപ്പും ചേർന്ന് ജില്ലാ കലക്ടർക്ക് സമർപ്പിച്ച റിപ്പോർട്ടിലാണ് നിർമാണത്തിലെ ഗുരുതരമായ വീഴ്ചകൾ എടുത്തുപറയുന്നത്.

ദുരന്തസാധ്യത
ഏകദേശം ഒരു മാസം മുൻപ് പൈപ്പ് പൊട്ടിയ അതേ സ്ഥലത്താണ് ഇപ്പോൾ മണ്ണിടിഞ്ഞ് ഗർത്തമുണ്ടായിരിക്കുന്നത്. പൈപ്പുകളിൽ ചോർച്ചയുണ്ടായാൽ അതിന്റെ ആഘാതം പുറത്തറിയാൻ ഒരു മാസം മുതൽ മൂന്ന് മാസം വരെ സമയമെടുക്കാറുണ്ട്.

ഇക്കാലയളവിൽ മേൽപാതയ്ക്കടിയിലെ മണ്ണ് ഒലിച്ചുപോയത് വലിയ അപകടസാധ്യതയാണ് ഉയർത്തുന്നത്. തുടർഭീഷണികൾ
പത്മാക്ഷിക്കവല, വയലാർ കവല, തങ്കിക്കവല, 11–ാം മൈൽ, തിരുവിഴ, കണിച്ചുകുളങ്ങര, എസ്എൽപുരം എന്നിവിടങ്ങളിലും പൈപ്പ് മാറ്റിസ്ഥാപിക്കാത്തത് വലിയ ആശങ്കയാണ് സൃഷ്ടിക്കുന്നത്.

ഇവിടെ പൈപ്പ് ചോർച്ചയുണ്ടായാൽ മുൻപ് ഉണ്ടായതിനേക്കാൾ വലിയ അപകടങ്ങൾ സംഭവിക്കാൻ സാധ്യതയുണ്ടെന്ന് ജല അതോറിറ്റി മുന്നറിയിപ്പ് നൽകുന്നു. തുറവൂർ മുതൽ മാരാരിക്കുളം കളിത്തട്ടു വരെയുള്ള 14.5 കിലോമീറ്റർ ദൂരത്തിൽ പ്രധാന പമ്പിങ് പൈപ്പുകൾ സ്ഥാപിച്ചിട്ടുണ്ട്.

ഇതിൽ 13 കിലോമീറ്ററോളം ദൂരത്തിൽ പുതിയ പൈപ്പുകൾ സ്ഥാപിച്ചെങ്കിലും, പാതയ്ക്കടിയിലൂടെയുള്ള പഴയ പൈപ്പുകളിൽ നിന്ന് കണക്ഷൻ മാറ്റാതിരുന്നതാണ് നിലവിലെ പ്രതിസന്ധിക്ക് പ്രധാന കാരണമെന്നാണ് റിപ്പോർട്ട് പറയുന്നത്.