സ്മാർട്ട്ഫോൺ ലോകത്ത് വയർലെസ് ചാർജിംഗ് സംവിധാനങ്ങൾക്ക് കൂടുതൽ കരുത്ത് പകരാനുള്ള നീക്കവുമായി വയർലെസ് പവർ കൺസോർഷ്യം (WPC) രംഗത്ത്. നിലവിൽ ലഭ്യമായ ചാർജിംഗ് വേഗതയെ 50W ആയി ഉയർത്താനാണ് കൺസോർഷ്യത്തിന്റെ തീരുമാനം.
ഈ പുതിയ സാങ്കേതികവിദ്യയുടെ പ്രായോഗികതയും നടപ്പാക്കലും സംബന്ധിച്ച് ചർച്ച ചെയ്യുന്നതിനായി ഷവോമി ഉൾപ്പെടെയുള്ള പ്രമുഖ സ്മാർട്ട്ഫോൺ നിർമ്മാതാക്കളുമായി പ്രത്യേക കൂടിക്കാഴ്ച നടത്തിക്കഴിഞ്ഞു. ആപ്പിളിന്റെ മാഗ്സേഫ് സാങ്കേതികവിദ്യയുടെ വിജയത്തിന് ശേഷം, ആൻഡ്രോയിഡ് മേഖലയിലും ഇത്തരമൊരു സംവിധാനത്തിന് വലിയ സ്വീകാര്യത ലഭിച്ചിരുന്നു.
എങ്കിലും, ചുരുക്കം ചില നിർമ്മാതാക്കൾ മാത്രമാണ് നിലവിൽ ഈ സാങ്കേതികവിദ്യ കാര്യക്ഷമമായി ഉപയോഗപ്പെടുത്തുന്നത്. ഇതിൽ ഗൂഗിൾ പോലുള്ള കമ്പനികൾ സ്വന്തം ആക്സസറികളുമായി മുന്നോട്ട് വന്നിട്ടുണ്ടെങ്കിലും, ആഗോളതലത്തിൽ ഈ സാങ്കേതികവിദ്യയുടെ സ്വീകാര്യത വർധിക്കേണ്ടതുണ്ട്.
റിപ്പോർട്ടുകൾ പ്രകാരം, ഈ പുതിയ മാറ്റം വിപണിയിൽ എത്തുന്നതിന് ഇനിയും സമയമെടുക്കും. 2028-ഓടെ മാത്രമേ ഈ സാങ്കേതികവിദ്യയിൽ അധിഷ്ഠിതമായ ഉൽപ്പന്നങ്ങൾ ഉപഭോക്താക്കളിലേക്ക് എത്തുകയുള്ളൂ എന്ന് ഐ.ടി.ഹോം പുറത്തുവിട്ട
വിവരങ്ങൾ സൂചിപ്പിക്കുന്നു. നിലവിൽ ഐഫോൺ, ഗൂഗിൾ പിക്സൽ തുടങ്ങിയ മുൻനിര ഫോണുകൾ 25W വേഗതയിലാണ് വയർലെസ് ചാർജിംഗ് പിന്തുണയ്ക്കുന്നത്.
ഇതിൽ നിന്ന് വലിയൊരു കുതിച്ചുചാട്ടമായിരിക്കും 50W ശേഷി കൈവരിക്കുന്നതിലൂടെ സംഭവിക്കുക. വയർഡ് ചാർജിംഗുമായി താരതമ്യം ചെയ്യുമ്പോൾ വയർലെസ് സംവിധാനങ്ങൾക്ക് വേഗത കുറവാണെന്നത് വസ്തുതയാണ്.
നിലവിൽ പല സ്മാർട്ട്ഫോണുകളും 100W-നും മുകളിലുള്ള വേഗതയിൽ വയർഡ് ചാർജിംഗ് വാഗ്ദാനം ചെയ്യുന്നുണ്ട്. എങ്കിലും, വയറുകളുടെ ഉപയോഗം കുറച്ച് ചാർജിംഗ് സ്റ്റാൻഡുകളിലൂടെ ഫോൺ, വാച്ച്, ഇയർബഡ്സ് എന്നിവ ഒരേസമയം ചാർജ് ചെയ്യാനുള്ള സൗകര്യം ഉപഭോക്താക്കൾക്കിടയിൽ വർദ്ധിച്ചുവരികയാണ്.
വയർലെസ് ചാർജിംഗിലെ ഈ സാങ്കേതിക മാറ്റം വരും വർഷങ്ങളിൽ ചാർജിംഗ് രംഗത്ത് വലിയ സ്വാധീനം ചെലുത്തുമെന്നാണ് വിലയിരുത്തപ്പെടുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
