യുഎഇയിൽ ഇന്ന് വർഷത്തിലെ ഏറ്റവും നീളമേറിയ പകൽ: വേനൽക്കാലത്തിന് തുടക്കം

യുഎഇയിൽ ഇന്ന് വർഷത്തിലെ ഏറ്റവും ദൈർഘ്യമേറിയ പകൽ അനുഭവപ്പെടും. ഭൂമിയുടെ ഉത്തരാർദ്ധഗോളത്തിൽ ജ്യോതിശാസ്ത്രപരമായ വേനൽക്കാലത്തിന്റെ ഔദ്യോഗിക തുടക്കം കുറിക്കുന്ന ‘സമ്മർ സോൾസ്റ്റിസ്’ പ്രതിഭാസമാണ് ഈ മാറ്റത്തിന് വഴിയൊരുക്കുന്നത്.

ഇതോടെ രാജ്യത്ത് ഏകദേശം 14 മണിക്കൂറോളം പകൽ വെളിച്ചം നീണ്ടുനിൽക്കും. യുഎഇ സമയം ഇന്ന് ഉച്ചയ്ക്ക് 12:25-നാണ് ഈ ജ്യോതിശാസ്ത്ര പ്രതിഭാസം സംഭവിക്കുന്നത്.

ഈ ഘട്ടത്തിൽ സൂര്യൻ ഭൂമിയുടെ വടക്കേ അറ്റത്തുള്ള കർക്കടക രേഖയ്ക്ക് (Tropic of Cancer) തൊട്ടു മുകളിൽ സ്ഥാനമുറപ്പിക്കുന്നു. ജൂൺ 18 മുതൽ 24 വരെയുള്ള ദിവസങ്ങളിൽ പകലിന്റെ ദൈർഘ്യം ഏകദേശം 13 മണിക്കൂറും 50 മിനിറ്റുമായിരിക്കുമെന്ന് എമിറേറ്റ്‌സ് അസ്‌ട്രോണമിക്കൽ സൊസൈറ്റി ചെയർമാനും അറബ് യൂണിയൻ ഫോർ അസ്‌ട്രോണമി ആൻഡ് സ്പേസ് സയൻസസ് അംഗവുമായ ഇബ്രാഹിം അൽ ജർവാൻ വ്യക്തമാക്കി.

സൂര്യൻ കർക്കടക രേഖയ്ക്ക് മുകളിൽ എത്തുന്നതോടെ, ഈ രേഖ കടന്നുപോകുന്ന പ്രദേശങ്ങളിൽ ഉച്ചസമയത്ത് നിഴലുകൾ പൂർണ്ണമായും അപ്രത്യക്ഷമാകുന്ന പ്രതിഭാസവും ഉണ്ടാകും. അറേബ്യൻ ഉപദ്വീപിലുടനീളം നിഴലിന്റെ നീളം വർഷത്തിലെ ഏറ്റവും കുറഞ്ഞ അളവിലേക്ക് ചുരുങ്ങുന്നതും ഈ സമയത്താണ്.

സെപ്റ്റംബറിലെ ശരത്കാല വിഷുവം വരെ പകലിന്റെ ദൈർഘ്യം ക്രമേണ കുറഞ്ഞുവരും. ഏറ്റവും നീളമേറിയ പകൽ അനുഭവപ്പെടുന്നുണ്ടെങ്കിലും, സമ്മർ സോൾസ്റ്റിസ് ദിനം വേനൽക്കാലത്തെ ഏറ്റവും ചൂടുകൂടിയ ദിവസമായിരിക്കില്ലെന്ന് കാലാവസ്ഥാ വിദഗ്ധർ മുന്നറിയിപ്പ് നൽകുന്നു.

വരും ആഴ്ചകളിൽ കരയും കടലും കൂടുതൽ താപം ആഗിരണം ചെയ്യുന്നതോടെ താപനില ഉയരുകയും, ജൂലൈ മുതൽ ഓഗസ്റ്റ് പകുതി വരെയുള്ള കാലയളവിൽ കടുത്ത ചൂട് അനുഭവപ്പെടുകയും ചെയ്യും. വേനലിന്റെ ആദ്യ പകുതിയായ ജൂൺ 21 മുതൽ ഓഗസ്റ്റ് 10 വരെയുള്ള കാലയളവിൽ ശരാശരി പകൽ താപനില 41 ഡിഗ്രി സെൽഷ്യസിനും 43 ഡിഗ്രി സെൽഷ്യസിനും ഇടയിലായിരിക്കും.

രാത്രിയിൽ ഇത് 27 ഡിഗ്രി സെൽഷ്യസ് മുതൽ 31 ഡിഗ്രി സെൽഷ്യസ് വരെ അനുഭവപ്പെടാം. ഈ കാലയളവിൽ ‘ബാറഹ്’ എന്നറിയപ്പെടുന്ന വടക്കൻ-വടക്കുപടിഞ്ഞാറൻ കാറ്റ് ശക്തമാകുന്നത് പൊടിക്കാറ്റിനും മണൽക്കൂനകൾ നീങ്ങുന്നതിനും കാരണമാകും.

ഉഷ്ണതരംഗങ്ങൾ ഉണ്ടാകുന്ന സാഹചര്യങ്ങളിൽ താപനില സാധാരണയേക്കാൾ 3 ഡിഗ്രി വരെ ഉയർന്നേക്കാമെന്നും, ചില പ്രദേശങ്ങളിൽ ചൂട് 50 ഡിഗ്രി സെൽഷ്യസ് കടന്നേക്കാമെന്നും അധികൃതർ ചൂണ്ടിക്കാട്ടുന്നു.