ലെബനനെ പൂർണ്ണമായും ചുട്ടെരിക്കണമെന്ന ഇസ്രായേൽ ദേശീയ സുരക്ഷാ മന്ത്രി ഇതാമർ ബെൻ ഗ്വീറിന്റെ പ്രസ്താവനയ്ക്കെതിരെ രൂക്ഷ വിമർശനവുമായി ഇറാൻ വിദേശകാര്യ മന്ത്രി അബ്ബാസ് അരാഗ്ചി രംഗത്തെത്തി. മേഖലയിൽ നിരന്തരമായ സംഘർഷം നിലനിർത്താനാണ് ഇസ്രായേൽ ഭരണകൂടം ശ്രമിക്കുന്നതെന്ന് അദ്ദേഹം ആരോപിച്ചു.
ഹിസ്ബുള്ളയുടെ ആക്രമണത്തിൽ നാല് ഇസ്രായേലി സൈനികർ കൊല്ലപ്പെട്ടതിന് തൊട്ടുപിന്നാലെയാണ് ഇതാമർ ബെൻ ഗ്വീർ വിവാദപരമായ ഈ പരാമർശം നടത്തിയത്. സാമൂഹിക മാധ്യമമായ എക്സിലൂടെ പങ്കുവെച്ച പ്രതികരണത്തിൽ, ഇതൊരു വ്യക്തിയുടെ അഭിപ്രായമല്ലെന്നും മറിച്ച് ഇസ്രായേൽ ഭരണകൂടത്തിന്റെ ഔദ്യോഗിക നിലപാടാണെന്നും അബ്ബാസ് അരാഗ്ചി ചൂണ്ടിക്കാട്ടി.
ഇത്തരം വംശഹത്യാ ആഹ്വാനങ്ങൾ മുഴുവൻ മനുഷ്യരാശിക്കും വലിയ ഭീഷണിയാണെന്ന് അദ്ദേഹം ഓർമ്മിപ്പിച്ചു. അതിനിടെ, പശ്ചിമേഷ്യയിലെ സംഘർഷങ്ങൾക്ക് അറുതി വരുത്താൻ ലക്ഷ്യമിട്ട് ഇസ്രായേൽ-ഹിസ്ബുള്ള വെടിനിർത്തൽ ധാരണയായതായി റിപ്പോർട്ടുകൾ പുറത്തുവരുന്നുണ്ട്.
അമേരിക്കയുടെയും ഖത്തറിന്റെയും നേതൃത്വത്തിലാണ് ഈ സമാധാന ശ്രമങ്ങൾ നടന്നതെന്നാണ് വിവരം. സ്വിറ്റ്സർലൻഡിൽ വെച്ച് അമേരിക്കയുമായി നിശ്ചയിച്ചിരിക്കുന്ന നയതന്ത്ര ചർച്ചകൾക്ക് മുന്നോടിയായി ലെബനനിലെ സൈനിക നീക്കങ്ങൾ പൂർണ്ണമായും അവസാനിപ്പിക്കുമെന്ന് ഉറപ്പുവേണമെന്ന് ഇറാൻ നേരത്തെ ആവശ്യപ്പെട്ടിരുന്നു.
ഈ ആവശ്യത്തിന് പിന്നാലെയാണ് വെടിനിർത്തൽ സംബന്ധിച്ച നിർണ്ണായക റിപ്പോർട്ടുകൾ പുറത്തുവരുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
