കേരളത്തിന്റെ വ്യവസായ-അടിസ്ഥാന സൗകര്യ വികസന മേഖലകളിൽ പുതിയ ഉണർവേകാൻ ലക്ഷ്യമിട്ടുള്ള സുപ്രധാന പ്രഖ്യാപനവുമായി സർക്കാർ രംഗത്ത്. സംസ്ഥാന ബജറ്റിൽ അവതരിപ്പിച്ച ‘ഭൂപരിഷ്കരണം 2’ എന്ന ആശയത്തിലൂടെ ഭൂമി ലഭ്യമാക്കുന്നതിലെ കാലതാമസവും നിയമപരമായ അവ്യക്തതകളും പരിഹരിക്കാനാണ് ഭരണകൂടം മുൻഗണന നൽകുന്നത്.
സമഗ്രമായ ലാൻഡ് മാനേജ്മെന്റ് നയം രൂപീകരിക്കുന്നതിലൂടെ വികസന മുന്നേറ്റത്തിന് വേഗത കൂട്ടാനാണ് സർക്കാരിന്റെ തീരുമാനം. ചരിത്രപരമായ മാറ്റങ്ങൾ
1970-ൽ സി.അച്യുതമേനോൻ സർക്കാർ നടപ്പാക്കിയ ആദ്യ ഭൂപരിഷ്കരണ നിയമത്തിൽ നിന്ന് തികച്ചും വ്യത്യസ്തമാണ് വരാനിരിക്കുന്ന പദ്ധതികൾ.
അന്നത്തെ നിയമം കർഷകർക്ക് ഭൂമിയുടെ അവകാശം ഉറപ്പാക്കുന്നതിലായിരുന്നു ഊന്നൽ നൽകിയതെങ്കിൽ, പുതിയ പദ്ധതി വ്യവസായ വളർച്ചയ്ക്കും ഡിജിറ്റൽ യുഗത്തിലെ ആവശ്യങ്ങൾക്കും അനുസൃതമായാണ് രൂപകൽപ്പന ചെയ്തിരിക്കുന്നത്. ‘ഭൂമി പിടിച്ചെടുക്കലല്ല, മറിച്ച് പങ്കുവെക്കലും വിനിയോഗവുമാണ്’ രണ്ടാം ഭൂപരിഷ്കരണത്തിന്റെ കാതൽ.
പ്രധാന പദ്ധതികൾ
* ലാൻഡ് ബാങ്ക്: വിവിധ സർക്കാർ വകുപ്പുകളുടെയും പൊതുമേഖലാ സ്ഥാപനങ്ങളുടെയും ഉപയോഗശൂന്യമായി കിടക്കുന്ന അധികഭൂമി കണ്ടെത്തി ‘ലാൻഡ് ബാങ്ക്’ രൂപീകരിക്കും. ഇത് വ്യവസായ സംരംഭകർക്ക് വേഗത്തിൽ ലഭ്യമാക്കും.
* ഡിജിറ്റൽ സർവേ: ‘എന്റെ ഭൂമി’ പദ്ധതി വഴി സംസ്ഥാനത്ത് സമ്പൂർണ്ണ ഡിജിറ്റൽ സർവേ പൂർത്തിയാക്കി ഭൂമിയുടെ അതിരുകൾ നിർണയിക്കും.
* ലാൻഡ് പൂളിങ്: വൻകിട
വികസന പദ്ധതികൾക്കായി ഭൂവുടമകൾക്ക് സ്വമേധയാ ഭൂമി പങ്കുവെക്കാവുന്ന ലാൻഡ് പൂളിങ് രീതി നടപ്പാക്കും. ഇതിലൂടെ ഭൂമിയുടെ മൂല്യവർധനവിന്റെ വിഹിതം ഉടമകൾക്ക് ലഭിക്കും.
* നിയമ ഭേദഗതി: വ്യവസായ ആവശ്യങ്ങൾക്കായി ഭൂമി തരംമാറ്റുന്നതിലെ തടസ്സങ്ങൾ നീക്കാനും കാലഹരണപ്പെട്ട
ഭൂനിയമങ്ങൾ ഭേദഗതി ചെയ്യാനും സർക്കാർ ഉദ്ദേശിക്കുന്നു. കിൻഫ്ര, ഇൻകൽ എന്നീ ഏജൻസികളുടെ നേതൃത്വത്തിൽ ഭൂമി ഏറ്റെടുക്കൽ നടപടികൾ സുതാര്യവും വേഗത്തിലുമാക്കാനാണ് ലക്ഷ്യമിടുന്നത്.
ഐടി പാർക്കുകൾ, വ്യവസായ ഇടനാഴികൾ എന്നിവയ്ക്കായി പ്രത്യേക ഊന്നൽ നൽകിക്കൊണ്ടുള്ള പുതിയ ഭൂവിനിയോഗ ചട്ടക്കൂട് ഉടൻ നിലവിൽ വരും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
