തിരുവിതാംകൂർ ദേവസ്വം ബോർഡിൽ ഗസറ്റഡ് ഉദ്യോഗസ്ഥരുടെ സ്ഥലംമാറ്റവുമായി ബന്ധപ്പെട്ട് വിവാദങ്ങൾ തുടരുകയാണ്. നിശ്ചയിക്കപ്പെട്ട
മാനദണ്ഡങ്ങൾ ലംഘിച്ച് നടത്തിയ സ്ഥലംമാറ്റ നടപടികൾക്കെതിരെ കോൺഗ്രസ് അനുകൂല സംഘടനയായ തിരുവിതാംകൂർ ദേവസ്വം എംപ്ലോയീസ് ഫ്രണ്ട്, ദേവസ്വം മന്ത്രിക്കും ബോർഡ് പ്രസിഡന്റിനും ഔദ്യോഗികമായി പരാതി നൽകിയിരുന്നു. ഇതിനു പിന്നാലെ, സംഘടനയുടെ സംസ്ഥാന പ്രസിഡന്റിനെ തൽസ്ഥാനത്തുനിന്ന് മാറ്റാനായി കേവലം 45 മിനിറ്റിനുള്ളിൽ രണ്ട് വ്യത്യസ്ത ഉത്തരവുകളാണ് ബോർഡ് പുറപ്പെടുവിച്ചത്.
ബോർഡിൽ നിലനിൽക്കുന്ന ക്രമക്കേടുകളിൽ മന്ത്രി കെ.മുരളീധരൻ അതൃപ്തി രേഖപ്പെടുത്തിയിട്ടുണ്ട്. ആസ്ഥാനത്തുനിന്നു ലഭിക്കുന്ന സൂചനകൾ പ്രകാരം സ്ഥലംമാറ്റപ്പട്ടികയിൽ ഇനിയും മാറ്റങ്ങൾ വരാൻ സാധ്യതയുണ്ട്.
നാല് ദിവസത്തിനുള്ളിൽ മൂന്ന് തവണ ഉത്തരവുകൾ പുതുക്കി ഇറക്കിയെങ്കിലും, കോഴ ആരോപണം നിലനിൽക്കുന്ന തസ്തികകളിൽ ഉദ്യോഗസ്ഥരെ നിലനിർത്തിയാണ് പുതിയ ഉത്തരവുകൾ പുറത്തുവന്നതെന്ന ഗുരുതരമായ ആക്ഷേപം ഉയർന്നിട്ടുണ്ട്. കൂടുതൽ വരുമാനമുള്ള ക്ഷേത്രങ്ങളിൽ അഡ്മിനിസ്ട്രേറ്റീവ് ഓഫിസർമാരായി നിയമനം ലഭിക്കാൻ വൻതോതിൽ കോഴ ഇടപാട് നടന്നതായി തിരുവിതാംകൂർ ദേവസ്വം എംപ്ലോയീസ് ഫ്രണ്ട് ആരോപിക്കുന്നു.
ഇതേത്തുടർന്നാണ് അവർ മന്ത്രിക്കു പരാതി നൽകിയത്. 12ന് ദേവസ്വം ബോർഡ് പുറത്തിറക്കിയ ഉത്തരവിൽ അഡ്മിനിസ്ട്രേറ്റീവ് ഓഫിസർ, അസിസ്റ്റന്റ് കമ്മിഷണർ തസ്തികകളിലെ നിയമനങ്ങൾ വിവാദമായിരുന്നു.
സ്വർണക്കൊള്ളക്കേസിലും ഓഡിറ്റ് റിപ്പോർട്ടുകളിലെ ക്രമക്കേടുകളിലും പ്രതികളായ ഉദ്യോഗസ്ഥർക്ക് വള്ളിയാങ്കാവ് ക്ഷേത്രത്തിലും വിജിലൻസ് ഓഫിസറായും നിയമനം നൽകിയത് പ്രതിഷേധത്തിനിടയാക്കി. തുടർന്ന് 16ന് രാത്രി 9.15ന് 27 പേരെ ഉൾപ്പെടുത്തി ബോർഡ് മറ്റൊരു ഉത്തരവ് പുറത്തിറക്കി.
ഇതിൽ സ്വർണക്കൊള്ളയുമായി ബന്ധപ്പെട്ട് തെറ്റായ വിവരം നൽകിയ ശ്യാം പ്രകാശിനെ വള്ളിയാങ്കാവിൽ നിന്നും കൊട്ടാരക്കര അസിസ്റ്റന്റ് ഓഡിറ്റ് ഓഫിസറായി മാറ്റി നിയമിച്ചു. ഇതേ ഉത്തരവിൽ, ശബരിമല അഡ്മിനിസ്ട്രേറ്റീവ് ഓഫിസർ സ്ഥാനത്തേക്ക് ആദ്യം നിയമനം നൽകിയ പി.ആർ.ശ്രീശങ്കറിനെ ദേവസ്വം ആസ്ഥാനത്തു ജനറൽ അഡ്മിനിസ്ട്രേഷൻ അസിസ്റ്റന്റ് കമ്മിഷണറായി നിയമിച്ചിരുന്നു.
എന്നാൽ ക്രമക്കേടുകൾക്കെതിരെ ശബ്ദമുയർത്തിയതിന്റെ പ്രതികാരമെന്നോണം, 16ന് രാത്രി 10ന് പുറത്തിറക്കിയ മൂന്നാമത്തെ ഉത്തരവിലൂടെ അദ്ദേഹത്തെ ഏറ്റുമാനൂർ ക്ഷേത്രത്തിലെ അസിസ്റ്റന്റ് കമ്മിഷണറായി മാറ്റി നിയമിച്ചു. ഈ സ്ഥലംമാറ്റ നടപടികളിൽ മന്ത്രിയുടെ ഓഫിസ് അനാവശ്യ സമ്മർദം ചെലുത്തിയെന്ന് ആരോപിച്ച് സിപിഎം അനുകൂല സംഘടനയായ തിരുവിതാംകൂർ ദേവസ്വം എംപ്ലോയീസ് കോൺഫെഡറേഷൻ രംഗത്തെത്തിയിട്ടുണ്ട്.
കോഴ വിവാദത്തിൽ ദേവസ്വം എംപ്ലോയീസ് ഫ്രണ്ട് നൽകിയ പരാതിയിൽ സംസ്ഥാന സർക്കാർ വിജിലൻസ് അന്വേഷണം പ്രഖ്യാപിക്കാനും സാധ്യതയുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
