ബിരുദ നേട്ടത്തിൽ ഹൻസിക കൃഷ്ണ; കോളേജ് കാലഘട്ടത്തിലെ അനുഭവങ്ങൾ പങ്കുവെച്ച് താരം

തിരുവനന്തപുരം മാർ ഇവാനിയോസ് കോളേജിൽ നിന്നും മികച്ച വിജയം കരസ്ഥമാക്കി ബിരുദ പഠനം പൂർത്തിയാക്കിയിരിക്കുകയാണ് നടിയും ഇൻഫ്ളുവൻസറുമായ ഹൻസിക കൃഷ്ണ. എ ഗ്രേഡോടുകൂടി ബിരുദം പൂർത്തിയാക്കിയ സന്തോഷം താരം തന്നെയാണ് സമൂഹമാധ്യമങ്ങളിലൂടെ പങ്കുവെച്ചത്.

കൃഷ്ണകുമാറിന്റെ മകളായ ഹൻസികയുടെ നേട്ടത്തിൽ കുടുംബാംഗങ്ങൾ ഒന്നടങ്കം പങ്കുചേർന്നു. ഷൂട്ടിംഗ് തിരക്കുകളും കണ്ടന്റ് ക്രിയേഷനും ഉൾപ്പെടെയുള്ള ഔദ്യോഗിക ജീവിതത്തിനിടയിലും പഠനത്തിന് താരം സമയം കണ്ടെത്തിയിരുന്നു.

“എയർപോർട്ടുകൾ, ട്രെയിനുകൾ, കാരവനുകൾ തുടങ്ങി എല്ലാ സ്ഥലങ്ങളിൽ നിന്നും പഠിക്കാൻ താൻ സമയം കണ്ടെത്തി” എന്ന് ഹൻസിക വ്യക്തമാക്കി. അധ്യാപകരിൽ നിന്നും ലഭിച്ച സ്നേഹവും അംഗീകാരവുമാണ് കഴിഞ്ഞ മൂന്ന് വർഷത്തെ തന്റെ ഏറ്റവും വലിയ നേട്ടമെന്ന് താരം കൂട്ടിച്ചേർത്തു.

പ്രശസ്തമായ കുടുംബത്തിൽ ജനിച്ചതുകൊണ്ട് മാത്രം കോളേജ് ജീവിതം എളുപ്പമായിരുന്നില്ലെന്ന് ഹൻസിക തുറന്നുപറയുന്നു. പലപ്പോഴും അനാവശ്യമായ മുൻവിധികളും ഒറ്റപ്പെടുത്തലുകളും നേരിടേണ്ടി വന്നിട്ടുണ്ട്.

പ്രശസ്തി കാര്യങ്ങൾ എളുപ്പമാക്കുമെന്ന പൊതുധാരണ തെറ്റാണെന്നും, ചില സന്ദർഭങ്ങളിൽ അത് വിപരീത ഫലമാണ് ഉണ്ടാക്കാറുള്ളതെന്നും താരം അഭിപ്രായപ്പെട്ടു. കോളേജ് കാലഘട്ടത്തിലെ സൗഹൃദങ്ങളെക്കുറിച്ചും ഹൻസിക വിവരിക്കുന്നുണ്ട്.

“താൻ വിശ്വസിച്ച ചിലരാൽ വഞ്ചിക്കപ്പെടുകയും ഉപയോഗിക്കപ്പെടുകയും ചെയ്ത കാലമുണ്ടായിരുന്നു. എന്നാൽ, വഞ്ചിക്കപ്പെടുകയാണെന്നോ ഉപയോഗിക്കപ്പെടുകയാണെന്നോ അന്ന് ആ പതിനേഴുകാരിക്ക് അറിയില്ലായിരുന്നു” എന്ന് ഹൻസിക കുറിച്ചു.

താൻ കൂടുതൽ കരുത്തയും ബുദ്ധിമതിയുമായി മാറിയാണ് കോളേജ് പടിയിറങ്ങുന്നതെന്നും, വഞ്ചിച്ചവർ പിന്നീട് ഖേദപ്രകടനവുമായി എത്തിയെങ്കിലും എല്ലാവർക്കും വീണ്ടും അവസരം നൽകേണ്ടതില്ലെന്ന് തിരിച്ചറിഞ്ഞതായും താരം വ്യക്തമാക്കി. കുടുംബത്തിന്റെയും യഥാർത്ഥ സുഹൃത്തുക്കളുടെയും പിന്തുണയ്ക്ക് നന്ദി അറിയിച്ചുകൊണ്ടാണ് ഹൻസിക തന്റെ കുറിപ്പ് അവസാനിപ്പിച്ചത്.