റഷ്യയിൽ നിന്നുള്ള എണ്ണ ഇറക്കുമതി വർധിപ്പിച്ച് ഇന്ത്യ: നിർണായക വിവരങ്ങൾ പുറത്ത്

അമേരിക്ക അനുവദിച്ച ഇളവുകൾ പ്രയോജനപ്പെടുത്തി ഇന്ത്യൻ എണ്ണക്കമ്പനികൾ റഷ്യയിൽ നിന്നുള്ള ക്രൂഡ് ഓയിൽ ഇറക്കുമതി ഗണ്യമായി വർധിപ്പിച്ചു. യൂറോപ്യൻ ഗവേഷണ സ്ഥാപനമായ റിസർച്ച് ഓൺ എനർജി ആൻഡ് ക്ലീൻ എനർജി (സെറ) പുറത്തുവിട്ട

റിപ്പോർട്ടിലാണ് ഇക്കാര്യം വ്യക്തമാക്കുന്നത്. മേയ് മാസത്തിൽ മാത്രം 670 കോടി ഡോളറിന്റെ പെട്രോളിയം ഉൽപന്നങ്ങളാണ് റഷ്യയിൽ നിന്ന് ഇന്ത്യയിലെത്തിയത്.

റഷ്യൻ എണ്ണ ഇറക്കുമതി ചെയ്യുന്ന രാജ്യങ്ങളുടെ പട്ടികയിൽ നിലവിൽ ഇന്ത്യ രണ്ടാം സ്ഥാനത്താണ്. ഇന്ത്യയുടെ മൊത്തം എണ്ണ ഇറക്കുമതിയിൽ തൊട്ടു മുൻപുള്ള മാസത്തെ അപേക്ഷിച്ച് 8 ശതമാനം വർധനയുണ്ടായപ്പോൾ, റഷ്യൻ എണ്ണയുടെ കാര്യത്തിൽ 21 ശതമാനം വളർച്ചയാണ് രേഖപ്പെടുത്തിയത്.

രാജ്യത്തെ പ്രമുഖ എണ്ണശുദ്ധീകരണ ശാലകളിലും ഈ പ്രവണത പ്രകടമാണ്. ഗുജറാത്ത് വാഡിനാർ ശുദ്ധീകരണശാലയിൽ ഏപ്രിലിനെ അപേക്ഷിച്ച് 36 ശതമാനവും, ജാംനഗർ ശുദ്ധീകരണശാലയിൽ 14 ശതമാനവും അധികം റഷ്യൻ എണ്ണയെത്തി.

സമാനമായി വിശാഖപട്ടണം, ന്യൂമാംഗ്ലൂർ എന്നിവിടങ്ങളിലേക്കുള്ള ഇറക്കുമതിയിലും യഥാക്രമം 42 ശതമാനത്തിന്റെയും 13 ശതമാനത്തിന്റെയും വർധനയുണ്ടായി. അമേരിക്ക ഏർപ്പെടുത്തിയ അധിക തീരുവയെത്തുടർന്ന് കഴിഞ്ഞ നവംബറിൽ റഷ്യൻ എണ്ണ വാങ്ങുന്നത് നിർത്തിവെച്ചിരുന്ന ചില കമ്പനികൾ മാർച്ചിൽ അത് പുനരാരംഭിക്കുകയും ഇപ്പോൾ അളവ് വർധിപ്പിക്കുകയും ചെയ്തിട്ടുണ്ട്.

റഷ്യൻ എണ്ണയുടെ ഏറ്റവും വലിയ ഉപഭോക്താവ് ചൈനയാണ്, ആകെ കയറ്റുമതിയുടെ 50 ശതമാനവും അവർക്കാണ് ലഭിക്കുന്നത്. ഇന്ത്യ 36 ശതമാനം വിഹിതവുമായി തൊട്ടുപിന്നിലുണ്ട്.

തുർക്കിയും യൂറോപ്യൻ യൂണിയനുമാണ് മറ്റു പ്രധാന വാങ്ങലുകാർ. റഷ്യൻ ക്രൂഡ് ഉപയോഗിച്ച് ഇന്ത്യ, തുർക്കി, ജോർജിയ തുടങ്ങിയ രാജ്യങ്ങൾ ഉൽപാദിപ്പിച്ച 20 കോടി ഡോളറിന്റെ പെട്രോളിയം ഉൽപന്നങ്ങൾ യൂറോപ്യൻ രാജ്യങ്ങൾ ഇക്കഴിഞ്ഞ മേയ് മാസത്തിലും വാങ്ങിയെന്നത് ശ്രദ്ധേയമാണ്.

റഷ്യൻ എണ്ണ വാങ്ങുന്നതിന് അമേരിക്ക അനുവദിച്ച 30 ദിവസത്തെ പ്രത്യേക ഇളവ് ഉടൻ അവസാനിക്കാൻ പോവുകയാണ്. മേയ് 16 മുതൽ കണക്കാക്കിയ ഈ കാലാവധിക്ക് ശേഷം അമേരിക്ക സ്വീകരിക്കുന്ന നിലപാട് നിർണായകമാകും.

ഹോർമുസ് കടലിടുക്കിലെ അനിശ്ചിതത്വം കണക്കിലെടുത്താണ് അമേരിക്ക ഈ ഇളവ് അനുവദിച്ചത്. എന്നാൽ, അമേരിക്കയുടെ നിലപാട് എന്തുതന്നെയായാലും റഷ്യൻ എണ്ണ വാങ്ങുന്നത് തുടരുമെന്ന ഉറച്ച നിലപാടാണ് ഇന്ത്യ സ്വീകരിക്കുന്നത്.