മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്റെ മകൾ ടി വീണ പ്രതിയായ മാസപ്പടി കേസിൽ നിർണ്ണായകമായ പല വിവരങ്ങളും പുറത്തുവരാനുണ്ടെന്ന് മാത്യു കുഴൽനാടൻ എംഎൽഎ വ്യക്തമാക്കി. ഈ വിഷയത്തിൽ സിബിഐ അന്വേഷണം പ്രഖ്യാപിക്കുകയാണെങ്കിൽ പിണറായി വിജയൻ പ്രതിപ്പട്ടികയിൽ ഉൾപ്പെടുമെന്ന് അദ്ദേഹം ആരോപിച്ചു.
യാതൊരുവിധ സേവനങ്ങളും നൽകാതെയാണ് ടി വീണ പണം കൈപ്പറ്റിയതെന്ന് മാത്യു കുഴൽനാടൻ ചൂണ്ടിക്കാട്ടി. കള്ളപ്പണം വെളുപ്പിക്കൽ നിരോധന നിയമപ്രകാരമാണ് നിലവിൽ അന്വേഷണം പുരോഗമിക്കുന്നത്.
സിഎംആർഎൽ എന്ന കമ്പനിക്ക് യഥാർത്ഥ സേവനം ലഭിച്ചത് പിവിയിൽ (പിണറായി വിജയൻ) നിന്നാണെന്നും, കരിമണൽ ഖനനത്തിന് മുൻ സർക്കാർ വഴിയൊരുക്കിയെന്നും അദ്ദേഹം ആരോപിച്ചു. ബാങ്ക് മുഖാന്തരമാണ് പണം കൈമാറിയതെങ്കിലും, നിയമപരമെന്ന് വരുത്തിത്തീർത്ത് കള്ളപ്പണം വെളുപ്പിക്കാനാണ് ശ്രമം നടന്നതെന്ന് അദ്ദേഹം കുറ്റപ്പെടുത്തി.
“ഒരു പ്രയോജനവും ഇല്ലാതെ ആരെങ്കിലും കോടികൾ കൊടുക്കുമോ” എന്നും അദ്ദേഹം ചോദിക്കുന്നു. ഭൂപരിധി നിയമം ലംഘിച്ച് 60 ഏക്കറിലധികം ഭൂമിക്ക് റവന്യൂ ഇളവ് നൽകിയതിലും പിണറായി വിജയന്റെ പങ്ക് വ്യക്തമാണെന്ന് മാത്യു കുഴൽനാടൻ ആരോപിച്ചു.
സിഎംആർഎൽ കമ്പനിക്ക് എല്ലാ സൗകര്യങ്ങളും ചെയ്തു കൊടുത്തത് പിണറായി വിജയൻ ആണെന്നും, കമ്പനി ഡയറക്ടറായ ടി വീണ തന്റെ വിലാസമായി എകെജി സെന്റർ നൽകിയത് എന്തുകൊണ്ടാണെന്ന് ചോദിക്കാൻ പാർട്ടിയിൽ ആർജ്ജവമുള്ളവർ ഇല്ലെന്നും അദ്ദേഹം വിമർശിച്ചു. ഇഡി റെയ്ഡ് നടത്തേണ്ടിയിരുന്നത് യഥാർത്ഥത്തിൽ എകെജി സെന്ററിലാണെന്ന് പറഞ്ഞ അദ്ദേഹം, ഇഡി വാഹനങ്ങൾ തകർക്കുന്ന പ്രവർത്തകർ പാർട്ടിയെയാണ് യഥാർത്ഥത്തിൽ പ്രതിരോധത്തിലാക്കുന്നതെന്നും കൂട്ടിച്ചേർത്തു.
തനിക്കെതിരെയുള്ള വേട്ടയാടലിന് പിന്നിൽ മകൾ ചെയ്ത കാര്യങ്ങളുടെ വ്യാപ്തി പിണറായിക്ക് അറിയാവുന്നതുകൊണ്ടാണെന്നും മാത്യു കുഴൽനാടൻ മാധ്യമങ്ങളോട് പ്രതികരിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
